રાજકોટમાં સોશિયલ મીડિયા પર ઈરાનના નેતાના સમર્થનમાં વિવાદાસ્પદ વીડિયો બનાવી પોલીસ અને ગુજરાતના ગૃહ રાજ્યમંત્રી હર્ષ સંઘવીને ધમકી આપનાર યુવકની ધરપકડ કરવામાં આવી છે. રાજકોટ સાયબર ક્રાઈમ પોલીસે ટેકનિકલ સર્વેલન્સના આધારે આરોપીને તેલંગાણાના હૈદરાબાદથી ઝડપી પાડ્યો છે.
આરોપીનું નામ આતિફ ઉર્ફે બુધો હનીફભાઈ કુંઢા હોવાનું સામે આવ્યું છે, જે રાજકોટના રસૂલપરા વિસ્તારમાં રહે છે.
ઈરાનના નેતાના સમર્થનમાં વિવાદાસ્પદ ટિપ્પણી
માહિતી અનુસાર, આતિફે સોશિયલ મીડિયા પર એક વીડિયો વાયરલ કર્યો હતો જેમાં તેણે ઈરાનના સુપ્રીમ લીડર આયાતુલ્લાહ ખામેનેઈના સમર્થનમાં વિવાદાસ્પદ નિવેદનો આપ્યા હતા.
વિડિયોમાં તેણે આરોપ લગાવ્યો હતો કે અમદાવાદમાં ખામેનેઈ અને કુરાનનું અપમાન કરવામાં આવ્યું છે, પરંતુ તેની સામે કોઈ કાર્યવાહી કેમ નથી થઈ રહી તે અંગે પ્રશ્નો ઉઠાવ્યા હતા.
ગૃહ રાજ્યમંત્રીને ધમકી અને પોલીસને પડકાર
વિડિયોમાં આરોપીએ ગુજરાતના ગૃહ રાજ્યમંત્રી હર્ષ સંઘવી વિશે અત્યંત અભદ્ર ભાષાનો ઉપયોગ કર્યો હતો. એટલું જ નહીં, તેણે તેમને હત્યા કરવાની ધમકી આપતા પોલીસને ખુલ્લો પડકાર પણ ફેંક્યો હતો.
વિડિયો સોશિયલ મીડિયા પર વાયરલ થતા જ રાજકોટ સાયબર ક્રાઈમ પોલીસે તાત્કાલિક તપાસ શરૂ કરી હતી.
વિડિયો વાયરલ થયા બાદ આરોપી પોલીસની કાર્યવાહીથી બચવા માટે રાજકોટ છોડીને ફરાર થઈ ગયો હતો. સાયબર ક્રાઈમ પોલીસ સ્ટેશનના પીઆઈ કૈલા અને તેમની ટીમે ટેકનિકલ તપાસ કરીને તેનું લોકેશન હૈદરાબાદમાં શોધી કાઢ્યું હતું. પોલીસે તાત્કાલિક કાર્યવાહી કરીને તેને હૈદરાબાદથી ઝડપી રાજકોટ લાવવામાં આવ્યો હતો.
અગાઉ ચોરીના ગુનામાં પણ સંડોવણી
પોલીસ પૂછપરછ દરમિયાન આરોપી અંગે વધુ એક ચોંકાવનારી માહિતી સામે આવી છે. તપાસમાં જાણવા મળ્યું કે આતિફ અગાઉ ચોરીના ગુનામાં પણ સંડોવાયેલો હતો. મે 2025માં તેણે પોતાના મિત્ર સલમાન નકુમના ઘરેથી અંદાજે ₹1.50 લાખની ચોરી કરી હતી. સલમાન નિકાહમાં ગયો હતો ત્યારે વિશ્વાસમાં આવીને તેણે ઘરની ચાવી આતિફને સોંપી હતી.
આ તકનો લાભ લઈ આતિફે કબાટમાંથી રૂપિયા ચોરી લીધા હતા. બાદમાં તેણે ફોન કરીને પૈસા લીધાની કબૂલાત પણ કરી હતી પરંતુ પૈસા પરત આપ્યા વગર ફરાર થઈ ગયો હતો. આ મામલે રાજકોટ તાલુકા પોલીસ સ્ટેશનમાં ફરિયાદ નોંધાઈ હતી.
હાલમાં રાજકોટ પોલીસે આરોપી વિરુદ્ધ સોશિયલ મીડિયા પર ભડકાઉ વીડિયો પોસ્ટ કરવો, પોલીસને પડકાર ફેંકવો અને હત્યાની ધમકી આપવાના ગુનાઓ હેઠળ કાયદેસરની કાર્યવાહી શરૂ કરી છે. પોલીસ દ્વારા આ મામલે વધુ તપાસ હાથ ધરવામાં આવી છે અને સોશિયલ મીડિયા પર કાયદા-વ્યવસ્થાને ભંગ કરવાના પ્રયાસો સામે કડક પગલાં લેવામાં આવશે તેવી ચેતવણી આપવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
