અમદાવાદમાં ફરી એકવાર ડ્રિન્ક એન્ડ ડ્રાઈવનો ચોંકાવનારો કિસ્સો સામે આવ્યો છે. 22 માર્ચની રાત્રે અમદાવાદના દૂધેશ્વર સર્કલ ખાતે કોંગ્રેસના પૂર્વ ધારાસભ્ય હિંમતસિંહ પટેલના દીકરા યુવરાજ પટેલ દારૂના નશામાં ઝડપાયા હતા. મળતી માહિતી મુજબ, યુવરાજે નશાની હાલતમાં માત્ર વાહન ચલાવ્યું જ નહીં પરંતુ પોલીસ સાથે પણ તકરાર કરી હતી.
ઘટનાસ્થળે હાજર સ્થાનિક લોકોએ કાર રોકી તપાસ કરતાં તેમાં દારૂની બોટલો મળી આવી હતી. ત્યારબાદ ટ્રાફિકના TRB જવાનને જાણ કરવામાં આવી અને 112 પર કોલ કરવામાં આવ્યો. પોલીસે યુવરાજ અને તેના મિત્રને કસ્ટડીમાં લઈને માધવપુરા પોલીસ સ્ટેશન લઈ જવામાં આવ્યા હતા. જોકે, આશ્ચર્યજનક રીતે શરૂઆતમાં બંને સામે કોઈ સત્તાવાર કાર્યવાહી કરવામાં આવી નહોતી અને સમાધાન કરીને છોડી મુકાયા હતા.
આ સમગ્ર ઘટનાનો વીડિયો સોશિયલ મીડિયા પર વાયરલ થતા મામલો ગરમાયો છે. વીડિયોમાં સ્પષ્ટપણે કારમાં દારૂની બોટલો અને પોલીસની હાજરી વચ્ચે થયેલી હલચલ જોવા મળે છે. હવે મામલે સી આર રાણાએ જણાવ્યું છે કે વાયરલ થયેલા વીડિયોના આધારે કેસ નોંધવામાં આવશે.
આ મુદ્દે વધુ તપાસ માટે સેક્ટર-1ના જેસીપી નીરજ બડગુજરએ પણ નિવેદન આપ્યું છે કે સમાધાન કેમ થયું તેની તપાસ કરવામાં આવશે. બીજી તરફ, હિંમતસિંહ પટેલએ સ્વીકાર્યું કે ગાડી તેમના દીકરાની જ છે, પરંતુ ઘટનાની વિગતો અંગે અજાણ હોવાનું જણાવ્યું છે.
ઉલ્લેખનીય છે કે આ પહેલીવાર નથી જ્યારે પરિવાર સાથે સંકળાયેલો એવો કિસ્સો સામે આવ્યો હોય. 1 ફેબ્રુઆરી 2026ના રોજ મણિનગર વિસ્તારમાં હિંમતસિંહ પટેલના ભાણિયા વિશાલ ગુર્જરે દારૂના નશામાં ગાડી ચલાવી અકસ્માત સર્જ્યો હતો, જેમાં બે વાહનોને ટક્કર મારી હતી.
આ ઘટનાએ પોલીસની કાર્યવાહી અને રાજકીય દબાણ અંગે અનેક સવાલો ઉભા કર્યા છે. હાલમાં સોશિયલ મીડિયા પર લોકો દ્વારા કડક કાર્યવાહી કરવાની માંગ ઉઠી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
