ગુજરાત રાજ્યમાં સરકારી સેવાઓને વધુ સરળ, ઝડપી અને પારદર્શક બનાવવા માટે ગુજરાત સરકારના વિજ્ઞાન અને પ્રોદ્યોગિકી (DST) વિભાગે એક મહત્વપૂર્ણ ઠરાવ અમલમાં મૂક્યો છે. વહીવટી સુધારણા આયોગની ભલામણોને આધારે હવે ડિજિટલ ગુજરાત પોર્ટલ પર સૌથી વધુ ઉપયોગમાં લેવાતી ‘ટોપ-હાઈ વોલ્યુમ સર્વિસિસ’ માટે આધાર વેરિફિકેશન ફરજિયાત બનાવવામાં આવ્યું છે. આ નિર્ણયનો મુખ્ય હેતુ નાગરિકોને ઝડપી સેવા, ભ્રષ્ટાચારમુક્ત વ્યવસ્થા અને સરકારી લાભો સીધા પાત્ર વ્યક્તિ સુધી પહોંચાડવાનો છે.
ગુજરાત વહીવટી સુધારણા આયોગના પાંચમા અહેવાલમાં આપવામાં આવેલી ભલામણ મુજબ આ પગલું લેવામાં આવ્યું છે. આધાર પ્રમાણીકરણ દ્વારા એક જ વ્યક્તિ અલગ-અલગ ઓળખ બનાવી વારંવાર લાભ લે તે અટકાવવામાં આવશે. નાણાંકીય સહાય, સબસિડી અને અન્ય કલ્યાણકારી યોજનાઓમાં પારદર્શિતા વધશે અને સરકારી નાણાંનો દુરુપયોગ રોકવામાં મદદ મળશે.
આ ઠરાવ અમલમાં આવ્યા બાદ આવકના દાખલા, જાતિ અને સામાજિક વર્ગના પ્રમાણપત્રો, રેશનકાર્ડમાં નામ ઉમેરવા કે સુધારવા, સોગંદનામા સહિત અંદાજે 20થી વધુ મહત્વની સરકારી સેવાઓમાં આધાર વેરિફિકેશન જરૂરી બનશે. ડિજિટલ ગુજરાત પોર્ટલ મારફતે આ સેવાઓ મેળવતી વખતે આધાર પ્રમાણીકરણ ફરજિયાત રહેશે.
નાગરિકોને આ નિર્ણયથી અનેક ફાયદા મળશે. આધાર પ્રમાણીકરણના કારણે વારંવાર ઓળખ અને રહેઠાણના પુરાવા આપવાની ઝંઝટમાંથી મુક્તિ મળશે. ગવર્નન્સ પ્રોસેસ રી-એન્જિનિયરિંગ (GPR) અને બિઝનેસ પ્રોસેસ રી-એન્જિનિયરિંગ (BPR)ના અમલથી સરકારી પ્રક્રિયાઓ વધુ ટૂંકી, સરળ અને ઝડપી બનશે. સાથે જ ડેટા સુરક્ષા માટે માત્ર ચાર અંકનું ‘માસ્ક આધાર’ ઉપયોગમાં લેવામાં આવશે અને 2021ના નિયમો મુજબ પ્રાઈવસીનું સંપૂર્ણ રક્ષણ કરવામાં આવશે.
સરકાર દ્વારા આધાર પ્રમાણીકરણ માટે વિવિધ વિકલ્પો પણ ઉપલબ્ધ કરાવવામાં આવ્યા છે, જેમાં રજિસ્ટર્ડ મોબાઈલ નંબર પર OTP, ફિંગરપ્રિન્ટ અથવા આઈરીસ સ્કેનનો સમાવેશ થાય છે. જો કોઈ તકનીકી કારણોસર આધાર પ્રમાણીકરણ શક્ય ન બને, તો વૈકલ્પિક વ્યવસ્થા દ્વારા પણ લાભાર્થીને સેવા આપવામાં આવશે, જેથી કોઈ પણ પાત્ર નાગરિક લાભથી વંચિત ન રહી જાય.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
