નર્મદા જિલ્લાની યુવા પ્રતિભાને ખેલકૂદ અને કલા મંચ પ્રદાન કરવાના આશય સાથે કલેક્ટર કચેરીના કોન્ફરન્સ હોલ ખાતે જિલ્લા કલેક્ટર શ્રીમતી શ્વેતા તેવતિયાની અધ્યક્ષતામાં ખેલ મહાકુંભ ૨.૦ અને કલામહાકુભમાં રજીસ્ટ્રેશન અને પાર્ટીસીપેશન અંગે જિલ્લા-તાલુકાના અમલીકરણ અધિકારીઓ સાથે આયોજન સંદર્ભે બેઠક યોજાઈ હતી.
જિલ્લા કલેક્ટર તેવતિયાએ જણાવ્યું કે, આપણો જિલ્લો આદિવાસી વસ્તી ધરાવતો જિલ્લો હોય નવ યુવાનો કલા અને ખેલ પ્રત્યે ખૂબજ રસ ધરાવે છે. માટે જ રમત-કલા સ્પર્ધામાં વધુમાં વધુ બાળકો, સ્પર્ધકો સહભાગી થાય તે માટે વધુમાં વધુ રજીસ્ટ્રેશન કરાવે અને પોતાની ભાગીદારી નોંધાવે તે સુનિશ્વિત કરવા સંબંધિત અધિકારી-કર્મચારીશ્રીઓને રચનાત્મક સૂચનો સાથે જરૂરી માર્ગદર્શન પુરૂં પાડ્યું હતું.
ખેલ મહાકુંભ ૨.૦ના ઓનલાઈન રજીસ્ટ્રેશન માટે ગ્રામ્ય, તાલુકા, જિલ્લા, કક્ષાએ યોજાનાર તબક્કાવાર સ્પર્ધામાં ૯ થી ૬૦ વર્ષ સુધીના વયજૂથના ખેલાડીઓ અલગ-અલગ સ્પર્ધાઓ જેવીકે એથ્લેટીક્સ, વોલીબોલ, કબડ્ડી, ખો-ખો સહિતની રમતમાં રજીસ્ટ્રેશન કરાવી શકે છે. અને જિલ્લાને મળેલા ૭૫ હજાર કરતા વધુ રજીસ્ટ્રેશનના લક્ષ્યાંક સુધી પહોંચવા મહત્તમ પ્રયત્નો કરવા શ્રીમતી તેવતિયાએ મામલતદારને તાલુકા કક્ષાએ બેઠક યોજીને રજીસ્ટ્રેશનની કામગીરી વેગવંતી બનાવવા જણાવ્યું હતું. સાથે જિલ્લાની તમામ કચેરીના અધિકારીઓ અને કર્મચારીઓ પણ રજીસ્ટ્રેશન કરાવી પોતાની મનગમતી સ્પર્ધામાં ભાગ લે તેવી અપીલ પણ કરી હતી.
અત્રે ઉલ્લેખનીય છે કે, ખેલ મહાકુંભ ૨.૦માં અંડર-૯ અને અંડર-૧૧ના ખેલાડીઓનું રજીસ્ટ્રેશન ઓનલાઈન થાય તે જરૂરી છે. કારણ કે, આ સ્પર્ધામાં ઓનલાઈન રજીસ્ટ્રેશન થયા બાદ કોઈ ખેલાડી જિલ્લા કે રાજ્ય કક્ષા સુધી ઉત્તમ પ્રદર્શન કરે તો તેને જિલ્લાકક્ષાની સ્પોર્ટસ ઓથોરિટી ખાતે રહેવા-જમવાની તમામ નિઃશુલ્ક સુવિધા સાથે સ્પોર્ટસની તાલીમ અને શિક્ષણની સુવિધા રાજ્ય સરકાર દ્વારા ઉપલબ્ધ કરાવવામાં આવે છે. જેથી શાળા કક્ષાએથી ઓનલાઈન રજીસ્ટ્રેશન થાય તેના ઉપર ખાસ ભાર મૂકવામાં આવ્યો હતો.
સાથોસાથ જિલ્લામાં કલામહાકુંભમાં ભાગ લેવા ઈચ્છુક સ્પર્ધકો માટે રજીસ્ટ્રેશન ઓફલાઈન રહેશે. જેમાં તાલુકાકક્ષાએ વિવિધ કૃતિઓની સ્પર્ધા યોજાશે જે જિલ્લાકક્ષા, પ્રદેશ કક્ષા અને રાજ્યકક્ષા સુધી શ્રેષ્ઠ કૃતિઓને તબક્કાવાર લઈ જવામાં આવશે. જિલ્લામાંથી કલાકારોને યોગ્ય પ્લેટફોર્મ મળી રહે તેના ઉપર ભાર મૂકતા જિલ્લા કલેક્ટર શ્રીમતી તેવતિયાએ જિલ્લા શિક્ષણાધિકારી, જિલ્લા પ્રાથમિક શિક્ષણાધિકારીશ્રીઓને શાળાઓમાં બંન્ને સ્પર્ધાઓનું વધુમાં વધુ રજીસ્ટ્રેશન કરવા સૂચના આપી હતી.
આ બેઠકમાં જિલ્લા વિકાસ અધિકારી અંકિત પન્નુ, નાયબ કલેક્ટર સુશ્રી પ્રતિભા દહિયા, જિલ્લા રમત વિકાસ અધિકારી વિષ્ણુ વસાવા, જિલ્લા યુવા વિકાસ અધિકારી ડી.બી.દેસાઈ, તમામ મામલતદારઓ, તાલુકા વિકાસ અધિકારીઓ, વિવિધ રમતના કોચ સહિત સંબંધિત વિભાગના અધિકારીઓ-કર્મચારીઓ હાજર રહ્યાં હતાં.
રિપોર્ટ-શૈશવ રાવ રાજપીપળા
