નાઇજીરિયાના અશાંત ઉત્તર-પૂર્વીય વિસ્તારમાં ફરી એક વખત ભયાનક આતંકી હુમલો સામે આવ્યો છે, જેમાં બોર્નો રાજ્યની રાજધાની મેદુગુરીમાં આવેલી એક મસ્જિદમાં બુધવારે સાંજે નમાજ દરમિયાન થયેલા વિસ્ફોટમાં ઓછામાં ઓછા 7 લોકોનાં મોત થયા છે અને અનેક લોકો ગંભીર રીતે ઈજાગ્રસ્ત થયા છે.
આ હુમલો મેદુગુરીના વ્યસ્ત ગામ્બોરુ માર્કેટ વિસ્તારમાં આવેલી મસ્જિદમાં 24 ડિસેમ્બરની સાંજે આશરે છ વાગ્યાના અરસામાં થયો હતો, જ્યારે મોટી સંખ્યામાં નમાજીઓ સાંજની નમાજ અદા કરી રહ્યા હતા. પ્રાથમિક અહેવાલો અનુસાર આ આત્મઘાતી હુમલો હોવાની આશંકા છે અથવા તો મસ્જિદની અંદર પહેલેથી જ વિસ્ફોટકો ગોઠવવામાં આવ્યા હતા. મસ્જિદના અગ્રણી મલામ અબુના યુસુફે જણાવ્યું હતું કે મૃત્યુઆંક વધીને 8 સુધી પહોંચી શકે છે.
વિસ્ફોટ એટલો પ્રચંડ હતો કે મસ્જિદના અંદરના ભાગમાં ભારે નુકસાન થયું હતું અને ઘણા લોકો ગંભીર રીતે દાઝી ગયા અથવા ઘાયલ થયા હતા, જેમને તાત્કાલિક નજીકની હોસ્પિટલોમાં ખસેડવામાં આવ્યા છે. હાલ સુધી કોઈ પણ આતંકવાદી સંગઠને હુમલાની જવાબદારી સ્વીકારી નથી, પરંતુ આ વિસ્તાર લાંબા સમયથી બોકો હરામ અને તેના ફાંટા ISWAP (ઇસ્લામિક સ્ટેટ વેસ્ટ આફ્રિકા પ્રોવિન્સ)ની હિંસાથી પીડાતો રહ્યો છે.
છેલ્લા કેટલાક મહિનાઓમાં અહીં આત્મઘાતી હુમલાઓમાં ફરી વધારો જોવા મળ્યો છે, જેને લઈને સુરક્ષા એજન્સીઓ ચિંતિત છે. સ્થાનિક એન્ટી-જેહાદી મિલિશિયા નેતા બાબકુરા કોલોએ આ હુમલો આયોજિત હોવાનું પુષ્ટિ કરી છે, જ્યારે આતંકવાદ સામે લાંબા સમયથી મુખ્ય કેન્દ્ર રહેલા મેદુગુરીમાં સુરક્ષા વ્યવસ્થા વધુ કડક બનાવી દેવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
