ગુજરાતનું આર્થિક પાટનગર અને ‘સેફ સિટી’ ગણાતું અમદાવાદ ફરી એકવાર હિંસક ઘટનાને કારણે ચર્ચામાં આવ્યું છે. શહેરના શાહઆલમ વિસ્તારમાં કાર પાર્કિંગ જેવી સામાન્ય બાબતે ઉશ્કેરાયેલા કારચાલકે કાર વોશિંગની દુકાનમાં ઘૂસી બાપ-દીકરા પર છરીથી જીવલેણ હુમલો કર્યો હતો. ઘટનાએ સમગ્ર વિસ્તારમાં ચકચાર મચાવી છે.
શું હતી સમગ્ર ઘટના?
મળતી માહિતી મુજબ, શાહઆલમ વિસ્તારમાં આવેલી એક કાર વોશિંગની દુકાન પાસે એક કારચાલક પોતાની ગાડી પાર્ક કરી રહ્યો હતો. દુકાન માલિકે ત્યાં ગાડી પાર્ક કરવાની ના પાડતા બંને વચ્ચે ઉગ્ર બોલાચાલી અને ગાળાગાળી થઈ હતી.
મામલો શાંત થવાને બદલે વધુ બગડ્યો હતો. આરોપી કારચાલક પોતાની ગાડીમાંથી તીક્ષ્ણ છરી કાઢીને સીધો જ દુકાનની અંદર ઘૂસી ગયો હતો. તેણે દુકાન માલિક અને તેમના પુત્ર પર આડેધડ છરીના ઘા ઝીંક્યા હતા. ઓચિંતા હુમલાથી પિતા-પુત્ર લોહીલુહાણ થઈ ગયા હતા.
CCTVમાં કેદ થયો ભયાનક હુમલો
આ સમગ્ર ઘટના દુકાનમાં લાગેલા CCTV કેમેરામાં કેદ થઈ ગઈ છે. ફૂટેજમાં સ્પષ્ટ જોવા મળે છે કે હુમલાખોર આક્રમક મૂડમાં દુકાનમાં પ્રવેશ કરે છે અને જોતજોતામાં બાપ-દીકરા પર તૂટી પડે છે.
આસપાસના લોકોએ તરત જ દોડી આવી હુમલાખોરને કાબૂમાં લીધો અને વધુ જાનહાની ટાળી હતી.
એલ.જી. હોસ્પિટલમાં સારવાર
હુમલામાં ગંભીર રીતે ઘાયલ થયેલા પિતા અને પુત્રને તાત્કાલિક સારવાર માટે
L. G. Hospital
ખસેડવામાં આવ્યા છે. હોસ્પિટલ સૂત્રો મુજબ બંનેની હાલત નાજુક હોવાનું જાણવા મળી રહ્યું છે.
પોલીસે CCTV ફૂટેજના આધારે ગુનો નોંધી વધુ તપાસ હાથ ધરી છે.
શહેરમાં વધતી હિંસક ઘટનાઓથી ભયનો માહોલ
અમદાવાદમાં છેલ્લા કેટલાક સમયથી નજીવી બાબતોને લઈને હત્યા અને હુમલાની ઘટનાઓમાં વધારો નોંધાઈ રહ્યો છે. આવી ઘટનાઓને કારણે સ્થાનિક રહીશોમાં ભય અને અસુરક્ષાની લાગણી ફેલાઈ રહી છે. કાયદો-વ્યવસ્થાની સ્થિતિ અંગે પણ સવાલો ઉઠી રહ્યા છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
