પાકિસ્તાનની નેશનલ એસેમ્બ્લીના ભૂતપૂર્વ ડેપ્યુટી સ્પીકર અને પીટીઆઈ (તહરિક-એ-ઇન્સાફ)ના વરિષ્ઠ નેતા કાસિમ ખાન સુરી ફરી એકવાર ચર્ચામાં આવ્યા છે. સોશિયલ મીડિયા પર વાયરલ થયેલા એક વીડિયોમાં સુરીએ પોતાની હાલની પરિસ્થિતિ વિશે ખુલાસો કરતાં જણાવ્યું છે કે, એક સમયે પાકિસ્તાનની સંસદના સત્રની અધ્યક્ષતા કરનાર તેઓ આજે અમેરિકામાં ઉબર ચલાવીને જીવન નિર્વાહ કરવા મજબૂર બન્યા છે. અમેરિકન મીડિયાના અહેવાલો અનુસાર આ વીડિયોમાં તેમણે પોતાના આર્થિક સંકટ અને રાજકીય પરિસ્થિતિ અંગે વિગતવાર વાત કરી છે.
સુરીએ આરોપ લગાવ્યો છે કે પાકિસ્તાનના ભૂતપૂર્વ વડાપ્રધાન ઈમરાન ખાનનું સમર્થન કરવાના કારણે તેમને ભારે રાજકીય ઉત્પીડનનો સામનો કરવો પડ્યો છે. તેમના કહેવા મુજબ પાકિસ્તાન સરકારે તેમના વિરુદ્ધ અનેક મનઘડંત કેસ દાખલ કર્યા, બેન્ક ખાતાઓ સીલ કરી દીધા અને તેમની સંપત્તિ જપ્ત કરી લીધી. તેમણે વધુમાં દાવો કર્યો કે તેમના પરિવારના સભ્યોનું અપહરણ કરવામાં આવ્યું હતું, જેના કારણે તેમને ભારે મજબૂરીમાં દેશ છોડવો પડ્યો.
આ મુશ્કેલીઓ વચ્ચે પણ કાસિમ ખાન સુરીએ ઈમરાન ખાનના સમર્થનમાં ઉભા રહેવા બદલ કોઈ પસ્તાવો ન હોવાનો ઉલ્લેખ કર્યો. તેમણે જણાવ્યું કે ઈમરાન ખાન સાથે ઉભા રહેવાની કિંમત ચૂકવવી પડે તો પણ તેઓ પોતાના નિર્ણય પર અડગ છે. સુરીએ 2023થી જેલમાં બંધ ઈમરાન ખાન અને તેમની પત્નીની સ્થિતિ અંગે ચિંતા વ્યક્ત કરી અને તેમને અન્યાયપૂર્ણ રીતે જેલમાં રાખવામાં આવ્યા હોવાનો દાવો કર્યો.
આ વીડિયો વાયરલ થયા બાદ પાકિસ્તાનની રાજનીતિ અને વિદેશમાં રહેલા નેતાઓની પરિસ્થિતિ અંગે નવી ચર્ચાઓ શરૂ થઈ છે. આ મુદ્દે પાકિસ્તાન સરકાર અથવા સંબંધિત સત્તાવાળાઓ તરફથી હજુ સુધી કોઈ સત્તાવાર પ્રતિસાદ સામે આવ્યો નથી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
