દિલ્હીમાં યોજાયેલી AI ઈમ્પેક્ટ સમિટ દરમિયાન ચીની રોબો ડોગને લઈને ઊભા થયેલા વિવાદમાં આખરે ગલગોટિયા યુનિવર્સિટીએ માફી માગી છે અને ઘટનાને લઈને સ્પષ્ટીકરણ આપ્યું છે. સમિટ દરમિયાન રજૂ કરાયેલા રોબોટિક્સ પ્રોડક્ટ અંગે ખોટી માહિતી સામે આવતા સોશિયલ મીડિયા અને ટેક વર્તુળોમાં ભારે ચર્ચા શરૂ થઈ હતી. વિવાદ વધતા યુનિવર્સિટીએ સત્તાવાર નિવેદન જાહેર કરીને જણાવ્યું કે પેવેલિયનમાં હાજર એક પ્રતિનિધિ દ્વારા માહિતીના અભાવે ખોટા દાવા કરવામાં આવ્યા હતા.
યુનિવર્સિટીના નિવેદન મુજબ, “AI સમિટમાં સર્જાયેલી મૂંઝવણ માટે અમે માફી માગીએ છીએ. અમારા એક પ્રતિનિધિએ પ્રોડક્ટની ટેકનિકલ ઓરિજિન અંગે સંપૂર્ણ જાણકારી વગર મીડિયા સમક્ષ વાત કરી દીધી હતી. તેમને કેમેરા સામે આવવાની સત્તાવાર પરવાનગી પણ નહોતી, છતાં ઉત્સાહમાં અમુક તથ્યાત્મક રીતે ખોટી માહિતી આપી દીધી હતી.” યુનિવર્સિટીએ વધુમાં ઉમેર્યું કે આ સમગ્ર મામલે સંસ્થાનો કોઈ ખોટો ઇરાદો નહોતો અને પારદર્શિતા તથા જવાબદારી પ્રત્યે તેઓ પ્રતિબદ્ધ છે. આયોજકોની વિનંતિને માન આપી યુનિવર્સિટીએ પોતાનો સ્ટોલ ખાલી કરી દીધો હોવાનું પણ જણાવ્યું.
— Galgotias University (@GalgotiasGU) February 18, 2026
યુનિવર્સિટીએ જે પ્રતિનિધિનો ઉલ્લેખ કર્યો છે તેઓ નેહા સિંહ હોવાનું સામે આવ્યું છે, જેઓ યુનિવર્સિટીના કમ્યુનિકેશન વિભાગમાં કાર્યરત છે. તેમણે વાતચીત દરમિયાન દાવો કર્યો હતો કે રોબો ડોગ યુનિવર્સિટી દ્વારા બનાવવામાં આવ્યો છે. પરંતુ આ વીડિયો વાયરલ થતાં સોશિયલ મીડિયા યુઝર્સે ધ્યાન દોર્યું કે આ રોબો ડોગ વાસ્તવમાં એક ચીની કંપની દ્વારા બનાવવામાં આવેલ કોમર્શિયલ પ્રોડક્ટ છે, જે બજારમાં ખરીદી શકાય છે.
મામલો સામે આવ્યા બાદ ન્યૂઝની ક્લિપ અનેક પ્લેટફોર્મ પરથી હટાવવામાં આવી હોવાનું પણ જાણવા મળ્યું. શરૂઆતમાં યુનિવર્સિટીએ દાવો કર્યો હતો કે તેમણે ક્યારેય આ પ્રોડક્ટ પોતાનું સર્જન હોવાનું કહ્યું નહોતું, પરંતુ અધ્યાપિકાનો વીડિયો વાયરલ થતાં વિવાદ વધુ ઘેરાયો. ત્યારબાદ યુનિવર્સિટીએ ‘નેગેટિવ પ્રોપગેન્ડા’ના આક્ષેપો પણ કર્યા, છતાં ચર્ચા શમતી ન હતી. આખરે યુનિવર્સિટીએ માફી માગીને ઘટનાની જવાબદારી વ્યક્તિગત સ્તરે ઠાલવી છે, જેના કારણે શિક્ષણ અને ટેક સમુદાયમાં પારદર્શિતા અને વિશ્વસનીયતા અંગે નવા સવાલો ઊભા થયા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
