કેનેડા સ્ટડી વિઝામાં ભારે ઘટાડો : ગુજરાતી વિદ્યાર્થીઓ માટે વિદેશ અભ્યાસનું સ્વપ્ન બન્યું મુશ્કેલ

કેનેડામાં ઉચ્ચ અભ્યાસ માટે જવાની ઈચ્છા રાખતા ભારતીય અને ખાસ કરીને ગુજરાતી વિદ્યાર્થીઓ માટે છેલ્લા એક વર્ષમાં સ્થિતિ કઠિન બની છે. તાજેતરના અહેવાલો દર્શાવે છે કે કેનેડા સરકારે આંતરરાષ્ટ્રીય વિદ્યાર્થીઓને આપવામાં આવતા સ્ટડી પરમિટમાં નોંધપાત્ર ઘટાડો કર્યો છે. આ કારણે વિદેશમાં ભણવાનું સ્વપ્ન જોનારા હજારો વિદ્યાર્થીઓ અને તેમના વાલીઓમાં નિરાશા અને અનિશ્ચિતતા જોવા મળી રહી છે.

કેનેડા વિઝામાં 50%નો મોટો ઘટાડો

આંતરરાષ્ટ્રીય શિક્ષણ સલાહકાર સંસ્થા ICEF Monitorના તાજેતરના અહેવાલ મુજબ કેનેડાએ ભારતીય વિદ્યાર્થીઓને આપવામાં આવતા અભ્યાસ પરમિટમાં લગભગ 50%નો ઘટાડો કર્યો છે. વર્ષ 2024માં જ્યાં લગભગ 1,88,255 ભારતીય વિદ્યાર્થીઓને સ્ટડી પરમિટ આપવામાં આવ્યા હતા, ત્યાં વર્ષ 2025ના પ્રથમ સાત મહિનામાં માત્ર 52,765 પરમિટ જ મંજૂર થયા છે. અંદાજ મુજબ આખા વર્ષ દરમિયાન આ આંકડો લગભગ 90,454 સુધી પહોંચી શકે છે. આ આંકડા દર્શાવે છે કે વર્ષ 2023ની સરખામણીમાં લગભગ 67.5%નો મોટો ઘટાડો નોંધાયો છે.

લાખો રૂપિયાના ખર્ચ છતાં વિઝામાં અનિશ્ચિતતા

ગુજરાતના અમદાવાદ, સુરત, વડોદરા, રાજકોટ અને ભાવનગર જેવા શહેરોમાંથી દર વર્ષે હજારો વિદ્યાર્થીઓ કેનેડામાં ભણવા માટે અરજી કરે છે. વાલીઓ પોતાના બાળકોના ભવિષ્ય માટે કોચિંગ ક્લાસ, IELTS પરીક્ષા, વિઝા પ્રોસેસિંગ અને યુનિવર્સિટી એપ્લિકેશન માટે લાખો રૂપિયા ખર્ચે છે. છતાં હાલની સ્થિતિમાં ઘણા વિદ્યાર્થીઓને વિઝા મંજૂરી ન મળતા તેમની મહેનત અને રોકાણ પર પ્રશ્નચિહ્ન ઊભું થયું છે.

ICEF મોનિટરનો ચોંકાવનારો રિપોર્ટ

ICEF Monitorના અહેવાલ મુજબ જાન્યુઆરીથી જૂન 2025 દરમિયાન વિશ્વભરના વિદ્યાર્થીઓ તરફથી કુલ 1,43,485 સ્ટડી પરમિટ અરજીઓ પ્રોસેસ કરવામાં આવી હતી. તેમાંમાંથી 1,04,980 નવી અરજીઓ હતી. પરંતુ આમાંથી માત્ર 31,580 અરજીઓને જ મંજૂરી મળી છે. એટલે કે વિઝા મંજૂરી દર ઘટીને લગભગ 30% સુધી આવી ગયો છે, જ્યારે ગયા વર્ષે આ દર લગભગ 51% હતો.

કેનેડામાં વિદ્યાર્થીઓની સંખ્યામાં પણ ઘટાડો

આ કડક નીતિઓની સીધી અસર કેનેડામાં ભણતા વિદ્યાર્થીઓની કુલ સંખ્યામાં પણ જોવા મળી રહી છે. જાન્યુઆરી 2024માં કેનેડામાં લગભગ 10,23,785 વિદ્યાર્થીઓ એક્ટિવ સ્ટડી પરમિટ સાથે ભણતા હતા. પરંતુ જુલાઈ 2025 સુધીમાં આ સંખ્યા ઘટીને 7,85,830 થઈ ગઈ છે. એટલે કે કુલ વિદ્યાર્થીઓની સંખ્યામાં લગભગ 23.2%નો ઘટાડો નોંધાયો છે.

વિદ્યાર્થીઓ હવે અન્ય દેશો તરફ વળી રહ્યા

દર વર્ષે ગુજરાતમાંથી અંદાજે 15,000 જેટલા વિદ્યાર્થીઓ ઉચ્ચ અભ્યાસ માટે કેનેડા જાય છે. પરંતુ હાલની કડક વિઝા નીતિઓને કારણે ઘણા વિદ્યાર્થીઓ હવે અન્ય વિકલ્પો પર વિચાર કરી રહ્યા છે. કેટલાક વિદ્યાર્થીઓ યુનાઇટેડ કિંગડમ, ઓસ્ટ્રેલિયા, જર્મની અને યુનાઇટેડ સ્ટેટ્સ જેવા દેશોમાં અભ્યાસ માટે અરજી કરવાની યોજના બનાવી રહ્યા છે, જ્યારે કેટલાક વિદ્યાર્થીઓ ભારતમાં જ સારી યુનિવર્સિટીઓમાં પ્રવેશ લેવાનો વિકલ્પ પસંદ કરી રહ્યા છે.

કેનેડાની નવી કડક નીતિઓને કારણે ગુજરાતી વિદ્યાર્થીઓ અને તેમના વાલીઓમાં ભવિષ્યને લઈને ચિંતા વધી રહી છે અને વિદેશ અભ્યાસ માટેના વિકલ્પો ફરીથી વિચારવા જેવી સ્થિતિ ઉભી થઈ છે.

અમારી યુટ્યુબ ચેનલને લાઈક, શેર અને સબસ્ક્રાઈબ કરશો

हमारी यूट्यूब चैनल को लाइक, शेयर और सब्सक्राइब करे

Like, Share and Subscribe our YouTube channel

🔗 https://www.youtube.com/@oneindianewscom-Gujarat

🔗 https://www.youtube.com/@oneindianewscom