છેલ્લા ત્રણ દિવસથી હિમાચલ પ્રદેશમાં સતત થઈ રહેલી ભારે બરફવર્ષાએ જનજીવન સંપૂર્ણ રીતે અસ્તવ્યસ્ત કરી દીધું છે. સિમલા, કુલ્લુ, મનાલી, સોલંગ, ધર્મશાલા અને ચંબા સહિતના પ્રવાસન વિસ્તારોમાં હજ્જારો વાહનો બરફીલા રસ્તાઓ પર ફસાઈ ગયા છે, જેમાં મોટી સંખ્યામાં ગુજરાતી પ્રવાસીઓ પણ અટવાયેલા હોવાના સમાચાર છે. 26 જાન્યુઆરીની રજા સાથે શનિ-રવિની રજાને જોડીને બરફવર્ષાનો આનંદ લેવા ગયેલા ઉત્તર ભારતના હજ્જારો પ્રવાસીઓ સાથે અસંખ્ય ગુજરાતી પરિવારો હાલ વીસ કિલોમીટર લાંબા ટ્રાફિક જામ, કડકડતી ઠંડી અને ખોરાક-પાણીની અછતનો સામનો કરી રહ્યા છે. બે ફૂટ સુધી જમેલા બરફ અને બ્લેક આઈસના કારણે વાહનો આગળ વધે તે શક્ય નથી, પરિણામે કુલ્લુ-મનાલી અને આસપાસના વિસ્તારોમાં કારોમાં ફસાયેલા લોકો કિલોમીટરો સુધી પગપાળા ચાલીને ક્યાંક રહેવાની વ્યવસ્થા શોધતા જોવા મળી રહ્યા છે.
પરિસ્થિતિ એટલી વિકટ બની ગઈ છે કે હોટલો 100 ટકા ભરાઈ ગઈ છે અને જે જગ્યાએ રૂમ મળે છે ત્યાં 20 ગણા સુધીના મોંઘા ભાડા ચૂકવવા પ્રવાસીઓને મજબૂર થવું પડી રહ્યું છે. કુલ્લુ હાઈવે પર હાલમાં અંદાજે 20 કિલોમીટરનો ટ્રાફિક જામ છે અને લોકો પાસે પાણી તથા ખોરાકની પૂરતી વ્યવસ્થા નથી. કેટલાંક પરિવારો તો છેલ્લા 24 કલાકથી વધુ સમયથી રઝળી રહ્યા છે છતાં કોઈ વ્યવસ્થા મળી નથી.
પ્રવાસીઓનું કહેવું છે કે લાંબા વીકએન્ડ અને સિઝનની પહેલી બરફવર્ષાને કારણે ભારે ભીડ ઉમટી પડી છે, જેના કારણે રસ્તાઓ પર વાહનો થીજી ગયા છે. અનેક લોકોએ બરફમાં રાત પસાર કરી છે અને ખોરાક-પાણી વિના 10થી 20 કિલોમીટર ચાલવું પડ્યું છે. લપસી જવાય તેવા રસ્તાઓ અને બ્લેક આઈસના કારણે અસંખ્ય વાહનો ફસાયા છે અને ટ્રાફિક એટલો ઘન છે કે તંત્રની JCB મશીનો પણ ત્યાં પહોંચી શકતી નથી. શિમલામાં પણ 3થી 4 કિલોમીટર લાંબા ટ્રાફિક જામ જોવા મળી રહ્યા છે અને હોટલોના ભાડા આસમાને પહોંચ્યા છે.
પરિસ્થિતિને ધ્યાનમાં રાખીને હિમાચલ સરકાર અને પોલીસ દ્વારા એડવાઈઝરી જારી કરવામાં આવી છે, જેમાં બિનજરૂરી મુસાફરી ટાળવાની અને અગાઉથી બુકિંગ કરાવેલા પ્રવાસીઓને જ આવવાની અપીલ કરવામાં આવી છે. કોઈ મોટી જાનહાની કે અકસ્માત ન સર્જાય તે માટે ઈમરજન્સી ટીમોને સ્ટેન્ડબાય રાખવામાં આવી છે. રાજ્યમાં હાલ કુલ 655 રસ્તા બંધ છે, જેમાં મનાલી વિસ્તાર સૌથી વધુ પ્રભાવિત થયો છે. હવામાન વિભાગે 31 જાન્યુઆરીથી વધુ બરફવર્ષાની આગાહી કરી હોવાથી આગામી દિવસોમાં સ્થિતિ વધુ બગડવાની આશંકા વ્યક્ત કરવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
