સંયુક્ત રાષ્ટ્ર સુરક્ષા પરિષદ (UNSC)ના તાજેતરના અહેવાલમાં પાકિસ્તાન સ્થિત આતંકવાદી સંગઠન જૈશ-એ-મોહમ્મદ (JeM) અને તેના નેતા મસૂદ અઝહર અંગે મહત્વપૂર્ણ ખુલાસા કરવામાં આવ્યા છે. અહેવાલ મુજબ, ગત 9 નવેમ્બરે દિલ્હીના ઐતિહાસિક લાલ કિલ્લા પર થયેલા આતંકવાદી હુમલા પાછળ જૈશ-એ-મોહમ્મદનો સીધો હાથ હતો. આ હુમલામાં 15 નિર્દોષ લોકોનાં મોત થયા હતા, જેના કારણે દેશભરમાં ભારે આક્રોશ ફેલાયો હતો.
UN રિપોર્ટમાં હુમલાની જવાબદારી અંગે સ્પષ્ટ ઉલ્લેખ
યુએન રિપોર્ટના પેરેગ્રાફ 95માં જણાવાયું છે કે એક સભ્ય દેશે માહિતી આપી છે કે જૈશ-એ-મોહમ્મદે આ હુમલાની જવાબદારી સ્વીકારી હતી. અહેવાલમાં સ્પષ્ટપણે દર્શાવવામાં આવ્યું છે કે લાલ કિલ્લા પર થયેલો આતંકવાદી હુમલો સંગઠિત આતંકી ષડયંત્રનો ભાગ હતો. આ ખુલાસો ભારત દ્વારા લાંબા સમયથી કરવામાં આવતા તે દાવાઓને મજબૂત બનાવે છે, જેમાં પાકિસ્તાની ધરતી પરથી ચલાવવામાં આવતા આતંકવાદી નેટવર્ક તરફ આંગળી ઉઠાવવામાં આવી રહી હતી.
મસૂદ અઝહર અને નવી મહિલા પાંખ અંગે ચિંતા
રિપોર્ટમાં વધુ એક ચિંતાજનક બાબત તરીકે મસૂદ અઝહર દ્વારા શરૂ કરવામાં આવેલી ‘જમાત-ઉલ-મોમિનાત’ નામની મહિલા પાંખનો ઉલ્લેખ કરવામાં આવ્યો છે. 8 ઑક્ટોબરના રોજ આ નવી વિંગની જાહેરાત કરવામાં આવી હતી, જે આતંકી સંગઠનના વિસ્તરણ અને નવી ભરતીના પ્રયાસો તરફ ઈશારો કરે છે. નિષ્ણાતોના મતે, આ પ્રકારની રચનાઓ આતંકવાદી પ્રવૃત્તિઓને વધુ મજબૂત બનાવવાનો પ્રયાસ હોઈ શકે છે.
ભારત વિરુદ્ધ અસ્થિરતા ફેલાવવાના પ્રયાસો
UNSC અહેવાલ અનુસાર, જૈશ-એ-મોહમ્મદ સતત ભારતમાં અસ્થિરતા ફેલાવવાનો પ્રયાસ કરી રહ્યું છે. ગત વર્ષે જુલાઈમાં જમ્મુ-કાશ્મીરના પહલગામમાં થયેલા હુમલામાં પણ જૈશના જોડાણની માહિતી સામે આવી હતી. જોકે, પાકિસ્તાન તરફથી હંમેશની જેમ આ સંગઠનોને નિષ્ક્રિય ગણાવી આંતરરાષ્ટ્રીય સમુદાયને ગેરમાર્ગે દોરવાનો પ્રયાસ કરવામાં આવી રહ્યો હોવાનું રિપોર્ટમાં સૂચિત કરવામાં આવ્યું છે.
ભારતનો કડક પ્રતિસાદ
ભારતે આતંકવાદ સામે કડક વલણ અપનાવ્યું છે. મે મહિનામાં ભારતીય સેનાએ સરહદ પાર આતંકી ઠેકાણાઓ પર પ્રિસિઝન સ્ટ્રાઈક્સ કરીને જૈશ અને લશ્કર સાથે જોડાયેલા અનેક ઠેકાણાઓને નિશાન બનાવ્યા હતા. ભારતે સ્પષ્ટ કર્યું છે કે રાષ્ટ્રીય સુરક્ષા માટે જરૂરી તમામ પગલાં લેવામાં આવશે અને આતંકવાદ સામે ઝીરો ટોલરન્સની નીતિ ચાલુ રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
