આંતરરાષ્ટ્રીય સ્તરે ફરી એકવાર કાશ્મીર મુદ્દે તણાવ જોવા મળ્યો છે, જ્યારે અમેરિકાના વેપાર પ્રતિનિધિના કાર્યાલય (USTR) દ્વારા શેર કરાયેલા એક નકશામાં સમગ્ર જમ્મુ-કાશ્મીર, પીઓકે (PoK) અને અક્સાઈ ચીનને ભારતના હિસ્સા તરીકે દર્શાવવામાં આવ્યા હતા. આ નકશો સોશિયલ મીડિયા પર વાયરલ થતાં જ પાકિસ્તાનમાં રાજકીય અને કૂટનીતિક હલચલ મચી ગઈ અને પાકિસ્તાને તરત જ અમેરિકા સામે સત્તાવાર વિરોધ નોંધાવ્યો.
નકશો વાયરલ થતાં પાકિસ્તાનમાં હડકંપ
મીડિયા રિપોર્ટ્સ મુજબ, નકશો વાયરલ થયા બાદ પાકિસ્તાનના વિદેશ મંત્રાલયે તરત જ અમેરિકી અધિકારીઓ સાથે સંપર્ક સાધ્યો અને તેને ‘ખોટો’ ગણાવ્યો. પાકિસ્તાની વિદેશ મંત્રાલયના પ્રવક્તા તાહિર અંદ્રાબીએ બ્રીફિંગ દરમિયાન જણાવ્યું કે આ મેપ સંયુક્ત રાષ્ટ્રના માપદંડો સાથે સુસંગત નથી અને કાશ્મીરને વિવાદિત વિસ્તાર તરીકે દર્શાવવો જોઈએ.
પાકિસ્તાનના દબાણ બાદ અમેરિકી અધિકારીઓએ આ પોસ્ટ પોતાના અધિકૃત ‘X’ હેન્ડલ પરથી હટાવી દીધી હોવાનું જાણવા મળ્યું છે.
ભારત-અમેરિકા વેપાર કરાર પછી શરૂ થયો વિવાદ
આ સમગ્ર વિવાદની શરૂઆત ત્યારે થઈ જ્યારે ગયા અઠવાડિયે ભારત અને અમેરિકા વચ્ચે એક મોટા વેપાર કરારની જાહેરાત કરવામાં આવી હતી. આ કરારનો હેતુ બંને દેશો વચ્ચે વેપાર વધારવાનો અને લાંબા ગાળે અર્થવ્યવસ્થાને મજબૂત બનાવવાનો છે. આ ડીલની વિગતો શેર કરતી વખતે અમેરિકી કાર્યાલયે જે નકશો રજૂ કર્યો હતો, તેમાં પીઓકે અને અક્સાઈ ચીનને સ્પષ્ટ રીતે ભારતની સરહદમાં દર્શાવવામાં આવ્યા હતા, જેને લઈને પાકિસ્તાનમાં ભારે અસંતોષ જોવા મળ્યો.
કાશ્મીર મુદ્દે કૂટનીતિક સંકેતો?
કૂટનીતિક નિષ્ણાતોના મત મુજબ, ભલે અમેરિકાએ પોસ્ટ હટાવીને વિવાદ શાંત કરવાનો પ્રયાસ કર્યો હોય, પરંતુ આ ઘટના દક્ષિણ એશિયાની રાજનીતિમાં મહત્વપૂર્ણ સંકેત તરીકે જોવામાં આવી રહી છે. કેટલાક વિશ્લેષકો માને છે કે ભારત અને અમેરિકાની વધતી વ્યૂહાત્મક નજીકતા પાકિસ્તાન અને ચીન માટે ચિંતાનો વિષય બની રહી છે.
પાકિસ્તાન આ ઘટનાને પોતાની કૂટનીતિક સફળતા તરીકે રજૂ કરવાનો પ્રયાસ કરી રહ્યું છે, પરંતુ નિષ્ણાતો કહે છે કે આ ઘટના તેની આંતરરાષ્ટ્રીય ચિંતા અને ભારત-અમેરિકા સંબંધોની વધતી નજીકતાને લઈને તેની બેચેની દર્શાવે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
