લગ્નની લાલચ આપી શારીરિક સંબંધ બાંધવાના કેસમાં સુપ્રીમ કોર્ટ દ્વારા કરવામાં આવેલી ટિપ્પણી હાલ ચર્ચાનો વિષય બની છે. સુપ્રીમ કોર્ટની ન્યાયમૂર્તિ બી.વી. નાગરત્નાની અધ્યક્ષતાવાળી બેંચે કહ્યું કે લગ્ન પહેલા શારીરિક સંબંધ બાંધતા પહેલા યુવતીઓએ ખાસ સાવધાની રાખવી જોઈએ.
સુનાવણી દરમિયાન જસ્ટિસ નાગરત્નાએ જણાવ્યું હતું કે, “કદાચ અમારા વિચારો જુના કે જુનવાણી લાગી શકે, પરંતુ લગ્ન પહેલા કોઈ પર વિશ્વાસ ન કરવો જોઈએ.” તેમણે વધુમાં કહ્યું કે લગ્ન પહેલા છોકરો અને છોકરી એકબીજાને સંપૂર્ણ રીતે ઓળખતા નથી, ત્યારે સંબંધ સારા છે કે ખરાબ – એ સ્પષ્ટ ન હોવા છતાં શારીરિક સંબંધમાં કેવી રીતે જોડાઈ જાય છે, તે સમજાતું નથી.
લગ્નના જુઠા વચનનો મામલો શું છે?
આ કેસ લગ્નના જુઠા વચન આપી શારીરિક સંબંધ બાંધવાના આરોપ સાથે જોડાયેલો છે. ફરિયાદ અનુસાર, વર્ષ 2022માં એક યુવતી અને યુવક એક મેટ્રિમોનિયલ વેબસાઇટ મારફતે મળ્યા હતા. બાદમાં બંને વચ્ચે નજીકતા વધી અને શારીરિક સંબંધ પણ બાંધવામાં આવ્યો. જોકે, પછી કોઈ કારણસર યુવકે લગ્ન કરવાની ના પાડી દીધી.
આ બાદ યુવતીએ યુવક વિરુદ્ધ ફરિયાદ નોંધાવી હતી કે તેને લગ્નનું વચન આપી શારીરિક સંબંધ બાંધવામાં આવ્યો હતો, જે પછી લગ્નથી ઈનકાર કરવામાં આવ્યો.
દુબઈ યાત્રા પર કોર્ટનો સવાલ
મામલો સુપ્રીમ કોર્ટ સુધી પહોંચતા જસ્ટિસ નાગરત્નાની બેંચે યુવતીને સવાલ કર્યો હતો કે, “તમે તમારી પોતાની મરજીથી આરોપી સાથે દુબઈ કેમ ગયા હતા?” આ પ્રશ્નને લઈને કોર્ટરૂમમાં મહત્વપૂર્ણ ચર્ચા થઈ હતી.
યુવતી તરફથી હાજર સરકારી વકીલે દલીલ કરી હતી કે આરોપીએ યુવતીની સંમતિ વિના કેટલાક અંગત પળોના વીડિયો બનાવ્યા હતા. આ વીડિયોના આધારે યુવતીને બ્લેકમેલ કરવામાં આવતી હતી અને વીડિયો જાહેર કરવાની ધમકી પણ આપવામાં આવી હતી. આ આક્ષેપોને કારણે કેસ વધુ ગંભીર બન્યો છે.
સુપ્રીમ કોર્ટે આ મામલે બુધવારે વધુ સુનાવણી રાખી છે. કોર્ટની ટિપ્પણીઓ બાદ લગ્નના વચન, સંમતિ અને શારીરિક સંબંધ જેવા સંવેદનશીલ મુદ્દાઓ પર ફરી એકવાર કાનૂની અને સામાજિક ચર્ચા શરૂ થઈ ગઈ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
