બાંગ્લાદેશમાં ગુરુવારે (12 ફેબ્રુઆરી 2026) સામાન્ય ચૂંટણી માટે મતદાન ચાલી રહ્યું છે, ત્યારે દેશમાં લઘુમતી સુરક્ષાને લઈને ચિંતા વધારતી એક ગંભીર ઘટના સામે આવી છે. મૌલવીબજાર જિલ્લાના ચમ્પારા ચા બગીચામાં કામ કરતા 23 વર્ષીય હિંદુ યુવક રતન સહુકારની નિર્મમ હત્યા કરવામાં આવી હોવાનું સામે આવ્યું છે. ચૂંટણીના લોકશાહી ઉત્સવ વચ્ચે આવી ઘટના બનતા કાયદો-વ્યવસ્થા અને લઘુમતી સમુદાયની સલામતી અંગે પ્રશ્નો ઉઠી રહ્યા છે.
અહેવાલો અનુસાર, રતન સહુકાર 11 ફેબ્રુઆરીની સવારે પોતાના કામ પર પહોંચ્યો ન હતો, જેના કારણે તેના સાથી કર્મચારીઓ અને પરિવારજનો દ્વારા શોધખોળ શરૂ કરવામાં આવી હતી. તપાસ દરમિયાન ચાના બગીચામાંથી તેનો મૃતદેહ મળી આવ્યો હતો. મૃતદેહ પર ગંભીર ઘાના નિશાન જોવા મળ્યા હતા અને તેના હાથ-પગ દોરડાથી બાંધેલા હોવાનું પણ જણાવાયું છે. પ્રાથમિક આશંકા મુજબ, રતનની હત્યા અન્ય સ્થળે કરીને પુરાવા છુપાવવા માટે મૃતદેહને બગીચામાં ફેંકી દેવામાં આવ્યો હોઈ શકે છે.
ઘટનાની માહિતી મળતા જ સ્થાનિક પોલીસે સ્થળ પર પહોંચી તપાસ હાથ ધરી હતી. પોલીસે મૃતદેહને કબજામાં લઈને મૌલવીબજાર સદર હોસ્પિટલમાં પોસ્ટમોર્ટમ માટે મોકલી આપ્યો છે. અધિકારીઓએ જણાવ્યું છે કે કેસની ગંભીરતાથી તપાસ ચાલી રહી છે અને આરોપીઓને ઝડપી પાડવા માટે વિશેષ ટીમો કાર્યરત કરવામાં આવી છે.
મૃતકના ભાઈ લક્ષ્મણ કરે જણાવ્યું કે રતન ગત રાતથી જ ગુમ હતો અને પરિવાર સતત તેની શોધમાં હતો. બાદમાં ચાના બગીચામાં મળેલા મૃતદેહની ઓળખ રતન તરીકે કરવામાં આવી હતી. જોકે હત્યા પાછળનું ચોક્કસ કારણ હજુ સુધી સ્પષ્ટ થયું નથી અને પરિવાર પણ કારણ અંગે અજાણ હોવાનું કહે છે.
આ ઘટના એકલદોકલ નથી. રતનની હત્યાના એક દિવસ પહેલાં મૈમનસિંગ વિસ્તારમાં 62 વર્ષીય હિંદુ વેપારી સુશેન ચંદ્ર સરકારની પણ હત્યા કરવામાં આવી હતી. અજાણ્યા હુમલાખોરોએ તેમની દુકાનમાં ઘૂસી ધારદાર હથિયારો વડે હુમલો કરીને લૂંટ ચલાવી હતી. સતત બનતી આવી ઘટનાઓને કારણે બાંગ્લાદેશમાં હિંદુ સમુદાયની સુરક્ષા અંગે ચિંતાઓ વધી રહી છે.
અહેવાલો અનુસાર છેલ્લા બે વર્ષથી દેશમાં લઘુમતી હિંદુઓ વિરુદ્ધ અત્યાચાર અને હિંસાની ઘટનાઓમાં વધારો નોંધાયો છે. ખાસ કરીને ડિસેમ્બર 2025માં ઉસ્માન હાદીનાં મોત બાદ હિંસાના આંકડામાં વધારો જોવા મળ્યો હોવાના દાવા કરવામાં આવી રહ્યા છે. હવે સામાન્ય ચૂંટણી દરમિયાન આવી ઘટનાઓ સામે આવતા, લઘુમતી સમુદાયની સુરક્ષા અને રાજકીય સ્થિરતા અંગે ગંભીર ચર્ચાઓ શરૂ થઈ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
