કર્ણાટકના કોપ્પલ જિલ્લામાં આવેલી ફર્સ્ટ એડિશનલ ડિસ્ટ્રિક્ટ એન્ડ સેશન્સ કોર્ટ ગંગાવતીએ 6 માર્ચ 2025ના રોજ વિદેશી પર્યટકો સાથે બનેલી જઘન્ય ઘટનામાં ત્રણ દોષીઓને મૃત્યુદંડની સજા સંભળાવી છે. કોર્ટે આ કેસને ‘રેયરેસ્ટ ઑફ રેયર’ શ્રેણીમાં ગણાવીને કહ્યું કે ગુનાની ગંભીરતા અને ક્રૂરતાને ધ્યાનમાં રાખતા મહત્તમ સજા યોગ્ય છે. જસ્ટિસ સદાનંદ નાગપ્પા નાઇકે મલ્લેશ ઉર્ફે હંડિમલ્લ, સાઇ અને શરણપ્પાને ગેંગરેપ અને હત્યાના આરોપોમાં દોષિત ઠેરવી ફાંસીની સજા ફટકારી છે.
શું હતો સમગ્ર મામલો?
ઘટના 6 માર્ચ 2025ની રાત્રે કર્ણાટકના વિશ્વવિખ્યાત પર્યટન સ્થળ હમ્પી નજીકના સનાપુર ઝીલ વિસ્તારમાં બની હતી. ડિનર બાદ સ્ટારગેઝિંગ માટે ગયેલા એક જૂથમાં 27 વર્ષની ઇઝરાયેલી મહિલા, 29 વર્ષની હોમસ્ટે સંચાલિકા અને અમેરિકા, ઓડિશા તથા મહારાષ્ટ્રના ત્રણ પુરુષ પર્યટકો સામેલ હતા. તુંગભદ્રા નહેર પાસે ગિટાર વગાડતા અને સંગીત માણતા સમયે બાઇક પર આવેલા ત્રણ આરોપીઓએ પહેલા રસ્તો પૂછ્યો અને બાદમાં પૈસાની માંગણી કરી હતી.
ફરિયાદ મુજબ પૈસા આપવા ઇનકાર કરતાં આરોપીઓએ હુમલો કર્યો. ત્રણેય પુરુષ પર્યટકોને નહેરમાં ધક્કો મારવામાં આવ્યો. ત્યારબાદ બે આરોપીઓએ હોમસ્ટે સંચાલિકા સાથે દુષ્કર્મ કર્યું જ્યારે ત્રીજા આરોપીએ ઇઝરાયેલી મહિલાનું યૌન શોષણ કર્યું. આરોપીઓએ મોબાઇલ અને રોકડ લૂંટી લીધા હતા. નહેરમાં પડેલા ત્રણમાંથી બે લોકો બચી ગયા પરંતુ અમેરિકન પર્યટકનું ડૂબી જવાથી મોત થયું, જેના કારણે કેસમાં હત્યાની કલમ ઉમેરાઈ.
દેશભરમાં આક્રોશ અને પર્યટકોની સુરક્ષા પર સવાલો
વિશ્વ હેરિટેજ સાઇટ નજીક બનેલી આ ઘટનાએ દેશભરમાં ભારે આક્રોશ જગાવ્યો હતો. રાજકીય નેતાઓ તેમજ વિવિધ સંગઠનોએ વિદેશી પર્યટકોની સુરક્ષા અંગે ગંભીર પ્રશ્નો ઉઠાવ્યા હતા. ઘટના બાદ પોલીસે વિશેષ ટીમો બનાવી ઝડપી તપાસ હાથ ધરી અને થોડા દિવસોમાં ત્રણેય આરોપીઓને ઝડપી લીધા.
11 મહિના બાદ કોર્ટનો મહત્વપૂર્ણ ચુકાદો
લગભગ 11 મહિનાની ન્યાયિક પ્રક્રિયા બાદ કોર્ટે સ્પષ્ટ કર્યું કે ગુનો અત્યંત ક્રૂર અને માનવતાવિહીન છે તેમજ તેમાં વિદેશી નાગરિકોને ટાર્ગેટ બનાવવામાં આવ્યા હતા. કોર્ટ મુજબ આવા ગુનાઓ માટે કડક સજા જરૂરી છે જેથી સમાજમાં કડક સંદેશ જાય. જોકે, દોષીઓને હાઈકોર્ટમાં અપીલ કરવાનો કાનૂની અધિકાર રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
