ગુજરાત વિધાનસભામાં નાણાકીય વર્ષ 2026-27 માટે કુલ ₹4,08,053 કરોડનું બજેટ રજૂ કરવામાં આવ્યું છે. ગયા વર્ષની સરખામણીમાં બજેટમાં ₹37,803 કરોડનો વધારો નોંધાયો છે. રાજ્ય સરકારે ₹974 કરોડની પુરાંતવાળું બજેટ રજૂ કરી વિકાસ, સુરક્ષા, શિક્ષણ, ઉદ્યોગ અને રોજગારને પ્રાથમિકતા આપી છે. ખાસ કરીને યુવાનો માટે નવી ભરતીની જાહેરાતો સાથે અનેક મહત્વપૂર્ણ યોજનાઓ જાહેર કરવામાં આવી છે.
DIAL 112 જનરક્ષક પ્રોજેક્ટ હેઠળ 3000 નવી ભરતી
વર્ષ 2026-27ના બજેટમાં ગૃહ વિભાગ માટે કુલ ₹14,265 કરોડની જોગવાઈ કરવામાં આવી છે. તેમાં DIAL 112 જનરક્ષક પ્રોજેક્ટ હેઠળ 3000 નવી જગ્યાઓ ઉભી કરવાની જાહેરાત કરવામાં આવી છે, જેના કારણે નજીકના સમયમાં ભરતી પ્રક્રિયા શરૂ થવાની શક્યતા વધી છે.
પોલીસ ઈન્ફ્રાસ્ટ્રક્ચર મજબૂત બનાવવા માટે આગામી પાંચ વર્ષમાં 20,444 પોલીસ રહેણાક મકાનો બનાવવાનું આયોજન કરવામાં આવ્યું છે, જેના માટે ₹1571 કરોડ ફાળવાયા છે. ઉપરાંત:
- પોલીસ સ્ટેશન અને કચેરીઓ માટે 107 બિન રહેણાક મકાનો – ₹136 કરોડ
- Rogue Drone સામે સુરક્ષા માટે 4 Anti-Drone System – ₹20 કરોડ
- સરહદી વિસ્તારોમાં પેટ્રોલિંગ માટે 50 Special Operational Vehicles – ₹9 કરોડ
મહેસૂલ વિભાગમાં 1546 નવી જગ્યાઓ
મહેસૂલ વિભાગ માટે કુલ ₹5552 કરોડની જોગવાઈ કરવામાં આવી છે. વિવિધ મહેસૂલી કચેરીઓમાં 1546 નવી જગ્યાઓ ઉભી કરવાની જાહેરાત સાથે રાજ્યમાં રોજગારની તકો વધશે.
કુદરતી આફતો સામે રાહત માટે ₹2145 કરોડ ફાળવાયા છે. સુરેન્દ્રનગર, મહુધા, માળીયા, લાઠી, ટંકારા, ઉમરેઠ અને અબ્રામા ખાતે નવા મહેસૂલી ભવન બનશે. દસક્રોઇ, ઠાસરા અને પાટણ ખાતે હાલના ભવનોનું વિસ્તરણ કરવામાં આવશે. 51 તાલુકામાં મહેસૂલી કર્મચારીઓ માટે વસાહતો બનાવવા ₹240 કરોડ ફાળવાયા છે.
ગાંધીનગરમાં દેશની સૌથી મોટી ‘નમો સેન્ટ્રલ લાઇબ્રેરી’
ગાંધીનગર ખાતે અત્યાધુનિક ડિજિટલ સુવિધાઓ સાથે ‘નમો સેન્ટ્રલ લાઇબ્રેરી’ સ્થાપવામાં આવશે. દેશની સૌથી મોટી લાઇબ્રેરી તરીકે વિકસાવવાના આ પ્રોજેક્ટ માટે ₹100 કરોડની જોગવાઈ કરવામાં આવી છે. ઉપરાંત આદિજાતિ વિસ્તારોમાં ભગવાન બિરસા મુંડા લાઇબ્રેરી યોજના હેઠળ આ વર્ષે 15 તાલુકામાં નવી લાઇબ્રેરીઓ સ્થાપવામાં આવશે.
શિક્ષણ અને વિજ્ઞાન માટે ખાસ યોજનાઓ
નમો સરસ્વતી વિજ્ઞાન સાધના યોજના માટે ₹250 કરોડ ફાળવવામાં આવ્યા છે. આ યોજનાના કારણે છેલ્લા બે વર્ષમાં વિજ્ઞાન પ્રવાહમાં પ્રવેશમાં 19% વધારો નોંધાયો છે.
દિવ્યાંગ વિદ્યાર્થીઓ માટે ટ્રાન્સપોર્ટ/એસ્કોર્ટ એલાઉન્સ સહિત વિવિધ સુવિધાઓ માટે પણ ખાસ જોગવાઈ કરવામાં આવી છે.
આદિવાસી વિસ્તારોમાં પાંચ નવી GIDC
ઔદ્યોગિકીકરણ અને રોજગાર વધારવા માટે રાજ્યમાં પાંચ નવી GIDC વસાહતો સ્થાપવામાં આવશે. દાહોદ જિલ્લાના ઝાલોદ અને ગરબાડા તાલુકા ઉપરાંત અરવલ્લી સહિત અન્ય જિલ્લાઓમાં આ ઔદ્યોગિક વસાહતો વિકસાવવામાં આવશે.
MSME અને સ્ટાર્ટઅપ ઇકોસિસ્ટમને પ્રોત્સાહન
ગુજરાતના ઔદ્યોગિક વિકાસમાં MSME ક્ષેત્રનું મહત્વપૂર્ણ યોગદાન ધ્યાનમાં રાખીને આત્મનિર્ભર ગુજરાત સ્કીમ ફોર આસિસ્ટન્સ ટુ MSME માટે ₹1775 કરોડ ફાળવાયા છે. રાજ્યમાં 29 લાખથી વધુ MSME નોંધણી સાથે ગુજરાત રોજગારી સર્જનમાં અગ્રેસર છે.
મહિલાઓ અને વિદ્યાર્થીઓ માટે નવી યોજનાઓ
- નમો લક્ષ્મી યોજના માટે ₹1250 કરોડ – ધોરણ 9 થી 12ની વિદ્યાર્થીનીઓના શિક્ષણને પ્રોત્સાહન
- ITIમાં અભ્યાસ કરતી દીકરીઓ માટે નવી “નમો કૌશલ્ય લક્ષ્મી યોજના” – ₹40 કરોડ
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
