ઈરાન અને અમેરિકા વચ્ચે વધતા તણાવ અને પરમાણુ મંત્રણાઓની અનિશ્ચિતતા વચ્ચે દક્ષિણ ઈરાનમાં આવેલા 5.5 તીવ્રતાના ભૂકંપે વૈશ્વિક સ્તરે ચર્ચા જગાવી છે. ગુરુવારે બપોરે આવેલા આ ભૂકંપના આંચકાઓ સ્થાનિક વિસ્તારોમાં સ્પષ્ટ રીતે અનુભવાયા હતા, જેના કારણે લોકોમાં ગભરાટનું વાતાવરણ સર્જાયું. જર્મનીના ભૂ-વિજ્ઞાન સંશોધન કેન્દ્ર (GFZ) મુજબ, ભૂકંપની તીવ્રતા રિક્ટર સ્કેલ પર 5.5 નોંધાઈ હતી અને તેનું કેન્દ્રબિંદુ જમીનથી માત્ર 10 કિલોમીટરની ઊંડાઈએ હતું. ઓછી ઊંડાઈને કારણે ધ્રુજારી વધુ જોરદાર અનુભવાઈ હોવાનું નિષ્ણાતોએ જણાવ્યું છે.
આ ઘટના ત્યારે બની છે જ્યારે ઈરાન અને અમેરિકા વચ્ચે રાજકીય અને સૈન્ય તણાવ વધ્યો છે અને પરમાણુ કાર્યક્રમને લઈને બંને દેશો વચ્ચે મતભેદો ચાલુ છે. આવી સંવેદનશીલ પરિસ્થિતિમાં ભૂકંપ આવતા સોશિયલ મીડિયા અને આંતરરાષ્ટ્રીય વર્તુળોમાં વિવિધ અટકળો શરૂ થઈ ગઈ છે. કેટલાક લોકો આ આંચકાને ઈરાન દ્વારા સંભવિત ગુપ્ત પરમાણુ પરીક્ષણ સાથે જોડીને જોઈ રહ્યા છે, જોકે અત્યાર સુધી કોઈ સત્તાવાર એજન્સી અથવા આંતરરાષ્ટ્રીય સંસ્થાએ આવા દાવાની પુષ્ટિ કરી નથી.
ભૂસ્તરશાસ્ત્રીઓનું કહેવું છે કે દક્ષિણ ઈરાન ટેક્ટોનિક પ્લેટોની ગતિને કારણે ભૂકંપ માટે સંવેદનશીલ વિસ્તાર ગણાય છે અને આ પ્રકારની તીવ્રતા તથા ઊંડાઈ ધરાવતા ભૂકંપો સામાન્ય રીતે કુદરતી હોય છે. આંતરરાષ્ટ્રીય વૈજ્ઞાનિક સંસ્થાઓ હાલમાં સીસ્મિક ડેટાનો વિશ્લેષણ કરી રહી છે જેથી સ્પષ્ટ થઈ શકે કે આ ઘટના સંપૂર્ણપણે કુદરતી હતી કે તેમાં કોઈ માનવસર્જિત પરિબળ સામેલ હતું.
હાલની સ્થિતિ મુજબ ઈરાન સરકારે અસરગ્રસ્ત વિસ્તારોમાં ડિઝાસ્ટર મેનેજમેન્ટ ટીમોને હાઈ એલર્ટ પર રાખી છે. અત્યાર સુધી કોઈ મોટી જાનહાનિ અથવા ગંભીર નુકસાનના અહેવાલ મળ્યા નથી, છતાં ક્ષેત્રમાં વધતા રાજકીય તણાવને ધ્યાનમાં રાખીને સુરક્ષા એજન્સીઓ સતર્ક બની ગઈ છે અને સમગ્ર પરિસ્થિતિ પર નજીકથી નજર રાખી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
