ગુજરાતના મુખ્યમંત્રી ભૂપેન્દ્ર પટેલે રાજ્યના સર્વગ્રાહી અને સંતુલિત વિકાસને પ્રોત્સાહન આપવા માટે એક મહત્વપૂર્ણ નિર્ણય લીધો છે. રાજ્યમાં વધુ 11 નવા તાલુકાઓને ‘વિકાસશીલ તાલુકા’ તરીકે જાહેર કરવામાં આવ્યા છે. આ નિર્ણય હેઠળ, દરેક તાલુકાને વિકાસ કાર્યો માટે વાર્ષિક કુલ ₹3 કરોડની ગ્રાન્ટ ફાળવવામાં આવશે — જેમાં વિકાસશીલ તાલુકા યોજના હેઠળ ₹2 કરોડ અને ‘આપણો તાલુકો વાઈબ્રન્ટ તાલુકો (ATVT)’ યોજના અંતર્ગત ₹1 કરોડનો સમાવેશ થાય છે. આ નાણાકીય ફાળવણીથી સ્થાનિક સુવિધાઓ, ઇન્ફ્રાસ્ટ્રક્ચર, ગ્રામ વિકાસ, માર્ગો, પાણી, આરોગ્ય અને શિક્ષણ જેવી આવશ્યક સેવાઓને વધુ મજબૂતી મળશે.
મુખ્યમંત્રીએ છેલ્લા સમયમાં જરૂરિયાતને ધ્યાનમાં રાખીને રાજ્યમાં 17 નવા તાલુકાઓની રચના કરી હતી. તાજેતરમાં જાહેર કરાયેલા 11 વિકાસશીલ તાલુકાઓમાં એવા તાલુકાઓનો સમાવેશ થયો છે, જેમના કુલ ગામોમાંથી 50%થી વધુ ગામો અગાઉના વિકાસશીલ તાલુકાઓમાંથી નવી રચનામાં સામેલ થયા છે. તેથી આવા તાલુકાઓને વધારાની નાણાકીય સહાયતા આવશ્યક હોવાથી તેમને વિકાસશીલ તાલુકા જાહેર કરવાનો નિર્ણય લેવામાં આવ્યો છે.
નવી યાદીમાં સમાવેશ થયેલા તાલુકાઓ છે:
કદવાલ (છોટાઉદેપુર), ઉકાઈ (તાપી), ગોવિંદ ગુરુ લીમડી (દાહોદ), સુખસર (દાહોદ), ચીકદા (નર્મદા), રાહ (વાવ થરાદ), ધરણીધર (વાવ થરાદ), ઓગડ (બનાસકાંઠા), હડાદ (બનાસકાંઠા), ગોધર (મહીસાગર) અને નાનાપોંઢા (વલસાડ).
આ નિર્ણય રાજ્યના દૂર–દરાજના તેમજ નવા રચાયેલા પ્રશાસનિક વિસ્તારોમાં ઝડપી વિકાસ લાવવા માટે અત્યંત મહત્વનો છે. વધારાની ગ્રાન્ટના સહારે આ તાલુકાઓ ઇન્ફ્રાસ્ટ્રક્ચર, જીવન સુવિધાઓ અને વિકાસના વિવિધ ક્ષેત્રોમાં વધુ અસરકારક રીતે પ્રગતિ કરી શકશે. મુખ્યમંત્રી ભૂપેન્દ્ર પટેલના આ પ્રજાકલ્યાણકારી નિર્ણયથી ગુજરાતની વિકાસયાત્રામાં આ નવા 11 તાલુકાઓનું યોગદાન વધુ મજબૂત બનશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
