પશ્ચિમ બંગાળની વિધાનસભા ચૂંટણી નજીક આવતાં મુખ્યમંત્રી મમતા બેનર્જી ફરી એકવાર ચર્ચાના કેન્દ્રમાં આવી ગઈ છે. હેડલાઈનોમાં રહેવા અને રાજકીય માહોલ ગરમ રાખવા માટે મમતા બેનર્જી સતત નવા પગલાં લઈ રહી છે. તાજા ઘટનાક્રમમાં તેઓ સુપ્રીમ કોર્ટમાં પોતાનો કેસ ‘પાર્ટી ઇન પર્સન’ તરીકે લડવા માટે ખુદ હાજર થયા છે, જેને રાજકીય વર્તુળોમાં મહત્વપૂર્ણ ઘટનાક્રમ તરીકે જોવામાં આવી રહ્યો છે.
શું છે ‘પાર્ટી ઇન પર્સન’નો અર્થ?
‘પાર્ટી ઇન પર્સન’નો અર્થ એ થાય છે કે અરજદાર પોતે જ કોર્ટમાં હાજર રહીને કેસની દલીલો કરે, કોઈ વકીલ મારફતે નહીં. આ માટે કોર્ટની વિશેષ મંજૂરી જરૂરી હોય છે. સામાન્ય રીતે રાજકારણીઓ અને નાગરિકો પોતાના કેસ વકીલ દ્વારા જ લડતા હોય છે, પરંતુ મમતા બેનર્જીએ આ પરંપરાથી અલગ રસ્તો પસંદ કર્યો છે.
SIR વિરુદ્ધ સુપ્રીમ કોર્ટમાં અરજી
મમતા બેનર્જીએ પશ્ચિમ બંગાળમાં ચાલી રહેલી મતદાર યાદી સુધારણા માટેની Special Intensive Revision (SIR) પ્રક્રિયા સામે સુપ્રીમ કોર્ટમાં અરજી દાખલ કરી છે. તેમણે દલીલ કરી છે કે આ પ્રક્રિયા દ્વારા મોટા પ્રમાણમાં લોકોના મતાધિકાર છીનવાઈ શકે છે અને આ પગલું ચૂંટણી પંચ (ECI) દ્વારા લેવામાં આવેલું ગેરબંધારણીય, ગેરકાયદેસર, અસ્પષ્ટ અને અવિચારી છે.
જૂની મતદાર યાદી પરથી ચૂંટણી કરાવવાની માંગ
મમતા બેનર્જીએ પોતાની અરજીમાં સુપ્રીમ કોર્ટને માંગ કરી છે કે SIR પ્રક્રિયા પર વિશ્વાસ ન હોવાથી, કોર્ટ ગત વર્ષની મતદાર યાદીના આધારે જ પશ્ચિમ બંગાળની ચૂંટણી યોજવા માટે આદેશ આપે. તેમણે આ પ્રક્રિયાને લોકશાહીના મૂળ સિદ્ધાંતો માટે ખતરારૂપ ગણાવી છે.
મીડિયા રિપોર્ટ્સ મુજબ શક્ય છે કે આ પહેલી વખત બને જ્યારે કોઈ સિટિંગ ચીફ મિનિસ્ટર ખુદ સુપ્રીમ કોર્ટમાં ‘પાર્ટી ઇન પર્સન’ તરીકે કેસ લડે. આ કારણે આ મામલો માત્ર કાનૂની નહીં પરંતુ રાજકીય રીતે પણ અત્યંત મહત્વનો બની ગયો છે.
મમતા બેનર્જી પાસે LLBની ડિગ્રી છે, પરંતુ ભારતીય કાયદા મુજબ માત્ર કાયદાની ડિગ્રી હોવી પૂરતી નથી. વકીલ તરીકે પ્રેક્ટિસ કરવા માટે બાર કાઉન્સિલમાં નોંધણી અને લાઈસન્સ જરૂરી હોય છે. જોકે, કોર્ટની મંજૂરી મળ્યા બાદ કોઈપણ વ્યક્તિ કાયદાની ડિગ્રી વગર પણ ‘પાર્ટી ઇન પર્સન’ તરીકે પોતાનો કેસ લડી શકે છે.
રાજકીય સંદેશ કે કાનૂની લડત?
કાનૂની નિષ્ણાતોનું માનવું છે કે સામાન્ય રીતે અરજી લિસ્ટ થયા બાદની પ્રથમ સુનાવણીમાં કોર્ટ કોઈ વિશેષ ટિપ્પણી કરતી નથી અને માત્ર નોટિસ જારી કરવામાં આવે છે. આવી સ્થિતિમાં મમતા બેનર્જીની વ્યક્તિગત હાજરીથી કાયદાકીય રીતે તાત્કાલિક કોઈ મોટો ફેરફાર થવાની શક્યતા ઓછી છે. પરંતુ રાજકીય રીતે આ પગલું ચર્ચાઓ જગાવવાનું અને ચૂંટણી પહેલાં સમર્થકોને સંદેશ આપવાનું અસરકારક સાધન બની શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
