દેશમાં રાજકીય નેતાઓ દ્વારા અપાતી હેટ સ્પીચને લઈને દાખલ થયેલી જાહેર હિત અરજી (PIL) પર સુપ્રીમ કોર્ટે મહત્વપૂર્ણ ટિપ્પણીઓ કરી છે. કોર્ટએ જણાવ્યું કે રાજકીય પક્ષો અને રાજનેતાઓએ ચૂંટણી દરમિયાન ભાઈચારો વધે તેવા પ્રયાસો કરવા જોઈએ અને બંધારણીય મૂલ્યોનું પાલન કરવું જરૂરી છે. જોકે હેટ સ્પીચ રોકવા માટે નવી ગાઇડલાઇન જાહેર કરવાની માગણી સુપ્રીમ કોર્ટે હાલ ફગાવી દીધી છે, પરંતુ કેટલાક સુધારા સાથે નવી અરજી દાખલ કરવાની અરજદારને છૂટ આપવામાં આવી છે.
હેમંતા બિસ્વા સરમાના ભાષણ મુદ્દે દાખલ થઈ હતી PIL
આ અરજી આસામના મુખ્યમંત્રી હેમંતા બિસ્વા સરમાના કથિત હેટ સ્પીચ મુદ્દે દાખલ કરવામાં આવી હતી. મુખ્ય ન્યાયાધીશ સૂર્યકાંત, ન્યાયાધીશ બી.વી. નાગરત્ના અને ન્યાયાધીશ જોયમાલ્યા બાગ્ચીની બેંચે આ કેસની સુનાવણી કરી હતી. નવ અરજદારો દ્વારા દાખલ થયેલી પિટિશનમાં બંધારણીય પદ પર રહેલી વ્યક્તિઓ દ્વારા ગેરબંધારણીય ભાષણો પર રોક લગાવવા માટે માર્ગદર્શિકા (Guidelines) જાહેર કરવાની માંગ કરવામાં આવી હતી.
કપિલ સિબ્બલની દલીલ: હેટ સ્પીચ ટોક્સિક બની રહી છે
અરજદારો તરફથી હાજર વરિષ્ઠ વકીલ કપિલ સિબ્બલે દલીલ કરી કે નેતાઓ દ્વારા આપવામાં આવતી હેટ સ્પીચ સમાજ માટે ટોક્સિક બની રહી છે અને તેને રોકવા માટે યોગ્ય પગલાં લેવાની જરૂર છે. તેમણે કહ્યું કે અરજી કોઈ વ્યક્તિગત ટાર્ગેટ માટે નથી. જોકે મુખ્ય ન્યાયાધીશ સૂર્યકાંતે નોંધ્યું કે પિટિશનમાં માત્ર હેમંતા બિસ્વા સરમાના ભાષણનો જ ઉલ્લેખ હોવાથી તે વ્યક્તિગત ટાર્ગેટ જેવું લાગે છે. ત્યારબાદ સિબ્બલે તે ઉલ્લેખ દૂર કરવાની તૈયારી દર્શાવી.
ન્યાયાધીશ નાગરત્નાની ટિપ્પણી: વિચારને કેવી રીતે નિયંત્રિત કરી શકાય?
સુનાવણી દરમિયાન ન્યાયાધીશ બી.વી. નાગરત્નાએ મૌખિક ટિપ્પણી કરતાં કહ્યું કે રાજનેતાઓએ દેશમાં ભાઈચારો વધે તેવા પ્રયત્નો કરવા જોઈએ. તેમણે એક મહત્વનો સવાલ ઉઠાવ્યો કે વ્યક્તિ બોલે તે પહેલાં તેના મનમાં વિચાર આવે છે, તો વિચારને કેવી રીતે નિયંત્રિત કરી શકાય? તેમણે એ પણ પૂછ્યું કે જો હેટ સ્પીચ રોકવા માટે ગાઇડલાઇન જાહેર કરવામાં આવે તો શું તેનું યોગ્ય પાલન થશે?
સુપ્રીમ કોર્ટે અરજદારોને સુધારા સાથે નવી અરજી દાખલ કરવાની મંજૂરી આપી છે. આ મામલે આગળની સુનાવણી બે સપ્તાહ બાદ કરવાનો નિર્ણય લેવામાં આવ્યો છે. આ કેસને રાજકીય ભાષણોની મર્યાદા અને બંધારણીય જવાબદારી અંગે મહત્વપૂર્ણ માનવામાં આવી રહ્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
