અમેરિકાના Texas રાજ્યની રાજધાની Austin માં રવિવારે વહેલી સવારે ભયાનક ગોળીબારની ઘટના બની હતી. આ હુમલામાં 21 વર્ષીય ભારતીય મૂળની વિદ્યાર્થિની સવિતા શાન અને અન્ય એક વ્યક્તિએ જીવ ગુમાવ્યો છે, જ્યારે 14 લોકો ગંભીર રીતે ઘાયલ થયા છે. આ ઘટનાએ અમેરિકામાં વસતા ભારતીય સમુદાય અને વિદ્યાર્થીઓમાં શોકની લાગણી ફેલાવી છે.
હુમલાખોરે અંધાધૂંધ ગોળીબાર કર્યો
પોલીસ મુજબ હુમલાખોરની ઓળખ 53 વર્ષીય સેનેગાલીઝ ઇમિગ્રન્ટ ન્ડિયાગા ડાયગ્ને તરીકે થઈ છે. તેણે શહેરના એક વ્યસ્ત બીયર ગાર્ડન નજીક કાર પાર્ક કરી અને બેઠેલા લોકો પર પિસ્તોલથી ગોળીબાર શરૂ કર્યો હતો. ત્યારબાદ કારમાંથી બહાર આવી રાઈફલ વડે પસાર થતા લોકોને નિશાન બનાવ્યા હતા.
પોલીસે ત્વરિત કાર્યવાહી કરતા હુમલાખોરને ઘટનાસ્થળે જ ઠાર માર્યો હતો. પ્રાથમિક માહિતી મુજબ હુમલાખોરે ઈરાની ધ્વજવાળી ટી-શર્ટ પહેરી હતી, જેના કારણે તપાસ એજન્સીઓ આતંકવાદી એંગલથી તપાસ કરી રહી છે.
Federal Bureau of Investigation (FBI) એ આ ઘટનાને સંભવિત આતંકવાદી કાવતરાની દિશામાં તપાસ શરૂ કરી છે. FBI ના ડિરેક્ટર Kash Patel એ જણાવ્યું છે કે દેશભરમાં સુરક્ષા એજન્સીઓને હાઈ એલર્ટ પર રાખવામાં આવી છે.
કોણ હતી સવિતા શાન?
સવિતા શાન University of Texas at Austin ની તેજસ્વી વિદ્યાર્થિની હતી. તે અર્થશાસ્ત્ર અને મેનેજમેન્ટ ઇન્ફર્મેશન સિસ્ટમ્સમાં ડ્યુઅલ બેચલર ડિગ્રી મેળવી રહી હતી અને આ વર્ષે સ્નાતક થવાની હતી.
યુનિવર્સિટીના પ્રમુખ Jim Davis એ તેને શ્રદ્ધાંજલિ આપતા જણાવ્યું કે સવિતા “દુનિયા બદલવાની ક્ષમતા ધરાવતી યુવતી” હતી.
સવિતા સામાજિક રીતે સક્રિય હતી અને ઓસ્ટિન તમિલ સંગમમાં સ્વયંસેવક તરીકે સેવા આપતી હતી. તેણે પોતાનો ઈ-કોમર્સ વ્યવસાય શરૂ કર્યો હતો અને PricewaterhouseCoopers (PwC) જેવી પ્રતિષ્ઠિત કંપનીમાં ઇન્ટર્નશિપ પણ કરી હતી.
પોલીસ તપાસ અને વધારેલી સુરક્ષા
ઓસ્ટિન પોલીસ વડા Lisa Davis એ જણાવ્યું છે કે હુમલાખોરની પૃષ્ઠભૂમિ અને સંભવિત આંતરરાષ્ટ્રીય જોડાણોની ઊંડાણપૂર્વક તપાસ ચાલી રહી છે.
હાલ ઓસ્ટિન શહેર અને શૈક્ષણિક સંસ્થાઓની આસપાસ સુરક્ષા વધારી દેવામાં આવી છે. અધિકારીઓએ લોકોને સાવચેત રહેવા અને કોઈપણ શંકાસ્પદ હિલચાલ અંગે તરત જ પોલીસને જાણ કરવા અપીલ કરી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
