અમદાવાદ શહેરને મુખ્યમંત્રી ભૂપેન્દ્ર પટેલે ₹583.85 કરોડના વિવિધ વિકાસકાર્યોની ભેટ આપી છે. ‘સેવા, સંકલ્પ અને સમર્પણ અભિયાન’ અંતર્ગત મુખ્યમંત્રીએ અમદાવાદમાં ₹279.80 કરોડના 6 વિકાસકાર્યોનું લોકાર્પણ અને ₹304.05 કરોડના 6 કામોનું ખાતમુહૂર્ત કર્યું હતું. આ સાથે નવનિર્મિત આવાસોના ડ્રો તેમજ અમદાવાદ મ્યુનિસિપલ કોર્પોરેશનમાં નવનિયુક્ત કર્મચારીઓને નિમણૂક પત્રો પણ એનાયત કરવામાં આવ્યા હતા.
પંડિત દીનદયાળ ઉપાધ્યાય ઑડિટોરિયમ ખાતે આયોજિત કાર્યક્રમમાં મુખ્યમંત્રી ભૂપેન્દ્ર પટેલની ઉપસ્થિતિમાં 450થી વધુ નવનિયુક્ત સહાયક ટેકનિકલ સુપરવાઇઝર અને આશરે 50 જુનિયર ક્લાર્કને નિમણૂક પત્રો એનાયત કરવામાં આવ્યા હતા.
₹279.80 કરોડના 6 કામોનું લોકાર્પણ
અમદાવાદના ઈન્ફ્રાસ્ટ્રક્ચર અને નાગરિક સુવિધાઓને વધુ મજબૂત બનાવવા માટે મુખ્યમંત્રી ભૂપેન્દ્ર પટેલે ₹279.80 કરોડના કુલ 6 વિકાસકાર્યોનું લોકાર્પણ કર્યું હતું.
આ સાથે ₹304.05 કરોડના અન્ય 6 વિકાસકાર્યોનું ખાતમુહૂર્ત કરવામાં આવ્યું હતું. આમ, અમદાવાદને કુલ ₹583.85 કરોડના 12 વિકાસકાર્યો મળ્યા છે.
‘સેવા, સંકલ્પ અને સમર્પણ અભિયાન’ અંતર્ગત શહેરમાં ઈન્ફ્રાસ્ટ્રક્ચર, આવાસ, સ્વચ્છતા, માનવ સંસાધન અને અન્ય નાગરિકલક્ષી સુવિધાઓ સાથે જોડાયેલા વિકાસકાર્યોને વધુ ગતિ આપવાનો પ્રયાસ કરવામાં આવી રહ્યો છે.
સેવા.. સંકલ્પ.. સમર્પણ..
આદરણીય વડાપ્રધાન શ્રી નરેન્દ્રભાઈ મોદીના જનસેવાના 25 વર્ષની ઉજવણી અંતર્ગત આજે અમદાવાદમાં AMCના ₹584 કરોડના જનસુવિધાના કાર્યોનું લોકાર્પણ અને ખાતમુહૂર્ત કર્યું.
શહેરીજનોનું 'ઇઝ ઓફ લિવિંગ' વધારતા નવા ફ્લાયઓવર અને ઓવરબ્રિજ, આધુનિક રોડ નેટવર્ક, ડ્રેનેજ અને… pic.twitter.com/c79Ha2j6kw
— Bhupendra Patel (@Bhupendrapbjp) September 24, 2026
નવનિર્મિત આવાસોના ડ્રો યોજાયા
વિકાસકાર્યોના લોકાર્પણ અને ખાતમુહૂર્ત ઉપરાંત કાર્યક્રમમાં નવનિર્મિત આવાસોના ડ્રો પણ કરવામાં આવ્યા હતા. અમદાવાદ શહેરમાં આવાસ સહિતની નાગરિક સુવિધાઓ વધારવા માટે અમદાવાદ મ્યુનિસિપલ કોર્પોરેશન દ્વારા વિવિધ પ્રોજેક્ટ પર કામગીરી કરવામાં આવી રહી છે.
મહાનગરપાલિકાના જણાવ્યા પ્રમાણે, શહેરમાં હાથ ધરવામાં આવતી વિકાસલક્ષી કામગીરીનો સીધો લાભ નાગરિકો સુધી પહોંચે તે દિશામાં આયોજન કરવામાં આવી રહ્યું છે.
500 જેટલા નવનિયુક્ત કર્મચારીઓને નિમણૂક પત્ર
કાર્યક્રમનું અન્ય એક મહત્વનું પાસું AMCમાં થયેલી નવી ભરતી રહ્યું હતું. 450થી વધુ સહાયક ટેકનિકલ સુપરવાઇઝર અને આશરે 50 જુનિયર ક્લાર્કને નિમણૂક પત્રો આપવામાં આવ્યા હતા.
મુખ્યમંત્રી ભૂપેન્દ્ર પટેલે નવનિયુક્ત કર્મચારીઓને અભિનંદન પાઠવી પ્રામાણિકતા અને સંપૂર્ણ નિષ્ઠા સાથે કામગીરી કરવા જણાવ્યું હતું. તેમણે કર્મચારીઓને સ્વચ્છતા પ્રત્યે સભાન રહેવા અને ટેક્નોલોજીનો શ્રેષ્ઠ ઉપયોગ કરીને ગુણવત્તાયુક્ત પ્રજાસેવા કરવાનો સંકલ્પ લેવા આહવાન કર્યું હતું.
મુખ્યમંત્રીએ જણાવ્યું કે રાજ્ય સરકારના વિવિધ વિભાગોમાં મહત્વનાં પદો પર સમયસર નિમણૂક થાય તે માટે સરકાર સતત કાર્યરત છે.
અમદાવાદમાં વિકાસનો ઉત્સવ..
માનનીય વડાપ્રધાન શ્રી નરેન્દ્રભાઈ મોદીના વિઝનના પરિણામે આજે વિકાસના ફળ દરેક સેક્ટરમાં, દરેક શહેરો-ગામડાઓમાં છેવાડાના માનવી સુધી પહોંચ્યા છે.
અમદાવાદમાં તો કાંકરિયા લેકફ્રન્ટથી લઈને સાબરમતી રિવરફ્રન્ટ સુધીનું વિશ્વસ્તરીય ટ્રાન્સફોર્મેશન એ વાતનું… pic.twitter.com/ghlYziIifE
— Bhupendra Patel (@Bhupendrapbjp) September 24, 2026
‘વિકાસની રાજનીતિના કેન્દ્રમાં સામાન્ય માનવી’
કાર્યક્રમને સંબોધતાં મુખ્યમંત્રી ભૂપેન્દ્ર પટેલે જણાવ્યું હતું કે વડાપ્રધાન નરેન્દ્ર મોદીની વિકાસની રાજનીતિના કેન્દ્રમાં હંમેશાં સામાન્ય નાગરિક રહ્યો છે.
તેમણે અમદાવાદના વિકાસનો ઉલ્લેખ કરતાં કાંકરિયા તળાવના કાયાકલ્પ અને સાબરમતી રિવરફ્રન્ટને નરેન્દ્ર મોદીના વિકાસ વિઝન સાથે જોડ્યાં હતાં. આ ઉપરાંત સ્વચ્છતા અભિયાન અને આયુષ્માન યોજના જેવી પહેલોનો પણ તેમણે ઉલ્લેખ કર્યો હતો.
મુખ્યમંત્રીએ કહ્યું કે, ‘વિકસિત ગુજરાતથી વિકસિત ભારત’ના સંકલ્પને સાકાર કરવામાં ગુજરાત ગ્રોથ એન્જિન તરીકે આગળ વધી રહ્યું છે.
દૃઢ રાજકીય ઇચ્છાશક્તિ અને દૂરંદેશી વિઝનથી કેવી રીતે વિકાસ કરી શકાય છે તેનું ઉત્તમ ઉદાહરણ માનનીય નરેન્દ્રભાઈએ અમદાવાદમાં પૂરું પાડ્યું છે.
કાંકરિયા તળાવથી લઈને સાબરમતી રિવરફ્રન્ટ સુધીનું વર્લ્ડ ક્લાસ ટ્રાન્સફોર્મેશન એ વાતની સાબિતી છે કે લોકોની સુખાકારી અને પુનર્વસનને પ્રાથમિકતા… pic.twitter.com/IAb8vfYcU4
— Bhupendra Patel (@Bhupendrapbjp) September 24, 2026
‘ફાઇનાન્શિયલ મેનેજમેન્ટમાં ગુજરાત ટોચના સ્થાને’
મુખ્યમંત્રી ભૂપેન્દ્ર પટેલે પોતાના સંબોધનમાં નીતિ આયોગના અહેવાલનો ઉલ્લેખ કરતાં જણાવ્યું હતું કે ફાઇનાન્શિયલ મેનેજમેન્ટમાં ગુજરાત દેશના ટોચના રાજ્યોમાં સ્થાન ધરાવે છે.
તેમણે નાગરિકોને હકારાત્મક અભિગમ સાથે વિકસિત ગુજરાત અને વિકસિત ભારતના સંકલ્પમાં યોગદાન આપવા અપીલ કરી હતી.
અમદાવાદના સર્વાંગી વિકાસને વધુ ગતિ આપવાનો પ્રયાસ
અમદાવાદના મેયર હિતેશ બારોટે કાર્યક્રમને શહેર માટે આનંદ અને ગૌરવનો દિવસ ગણાવ્યો હતો. તેમણે નવનિયુક્ત કર્મચારીઓને અમદાવાદ શહેરની સેવામાં જોડાવા બદલ અભિનંદન પાઠવ્યા હતા.
‘સેવા, સંકલ્પ અને સમર્પણ અભિયાન’ અંતર્ગત અમદાવાદના ઈન્ફ્રાસ્ટ્રક્ચર, આવાસ, સ્વચ્છતા, માનવ સંસાધન અને અન્ય નાગરિક સુવિધાઓને વધુ મજબૂત કરવા માટે વિવિધ કાર્યક્રમો અને વિકાસકાર્યો હાથ ધરવામાં આવી રહ્યા છે.
મંત્રીઓ, સાંસદો અને ધારાસભ્યો રહ્યા ઉપસ્થિત
કાર્યક્રમમાં શહેરી વિકાસ રાજ્યમંત્રી દર્શનાબેન વાઘેલા, સાંસદ હસમુખ પટેલ અને દિનેશ મકવાણા ઉપરાંત ધારાસભ્યો જીતુ પટેલ, હર્ષદ પટેલ, બાબુ પટેલ, કૌશિક જૈન, અમિત ઠાકર, ડૉ. હસમુખ પટેલ સહિતના આગેવાનો ઉપસ્થિત રહ્યા હતા.
આ ઉપરાંત અમૂલ ભટ્ટ, દિનેશસિંહ કુશવાહ, મ્યુનિસિપલ કમિશનર બંછાનિધિ પાની, શહેર અધ્યક્ષ પ્રેરક શાહ, AMCના અધિકારીઓ અને પદાધિકારીઓ તેમજ નિમણૂક મેળવનારા કર્મચારીઓ અને તેમના પરિવારજનો પણ મોટી સંખ્યામાં ઉપસ્થિત રહ્યા હતા.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
