દેશમાં ડોમેસ્ટિક એર કનેક્ટિવિટીને મજબૂત બનાવવા માટે કેન્દ્ર સરકારે મહત્વપૂર્ણ પગલું લીધું છે. UDAN 2.0 Scheme હેઠળ દેશભરમાં 100 નવા એરપોર્ટ બનાવવાની જાહેરાત કરવામાં આવી છે. આ માટે આશરે ₹28,840 કરોડનું રોકાણ મંજૂર કરવામાં આવ્યું છે. આ યોજના હેઠળ ગુજરાતને પણ મોટો ફાયદો થવાનો છે, જ્યાં 11 નવા ગ્રીનફીલ્ડ એરપોર્ટ બનાવવાની યોજના છે.
ગુજરાતમાં પ્રસ્તાવિત એરપોર્ટ : વિકાસને મળશે નવી ગતિ
રાજ્યમાં પ્રસ્તાવિત એરપોર્ટ માટેના શહેરોમાં અંકલેશ્વર, મોરબી, રાજપીપળા, બોટાદ, દ્વારકા, ધોળાવીરા, દાહોદ, અંબાજી, ધોળાવીરા અને પાલિતાણા જેવા મહત્વપૂર્ણ વિસ્તારોનો સમાવેશ થાય છે. આ એરપોર્ટ્સ રાજ્યમાં પ્રાદેશિક કનેક્ટિવિટી વધારવા સાથે પર્યટન અને ઔદ્યોગિક વિકાસને નવી દિશા આપશે.
ખાસ કરીને આદિવાસી વિસ્તાર દાહોદ માટે આ પ્રોજેક્ટ અત્યંત મહત્વપૂર્ણ છે, કારણ કે અહીં પ્રથમ વખત મજબૂત હવાઈ જોડાણ ઉપલબ્ધ થશે, જે સ્થાનિક વિકાસને પ્રોત્સાહન આપશે.
ઔદ્યોગિક વિસ્તારોને મળશે બૂસ્ટ
નવા એરપોર્ટ્સનો સૌથી મોટો ફાયદો ઔદ્યોગિક વિસ્તારોને થશે. અંકલેશ્વર અને મોરબી જેવા વિસ્તારોમાં બિઝનેસ ટ્રાવેલ, નિકાસ અને લોજિસ્ટિક્સ ક્ષેત્રે નોંધપાત્ર વૃદ્ધિ જોવા મળશે. આથી રોકાણમાં વધારો અને રોજગારીના નવા અવસર ઉભા થશે.
પર્યટન અને ધાર્મિક સ્થળોને મળશે પ્રોત્સાહન
આ એરપોર્ટ્સના કારણે રાજ્યના મુખ્ય પર્યટન અને ધાર્મિક સ્થળોને સીધો લાભ મળશે. દ્વારકા, અંબાજી અને ધોળાવીરા જેવા સ્થળોએ પ્રવાસીઓની સંખ્યા વધવાની સંભાવના છે. ઉપરાંત, કચ્છના ઘોડાઓ સુધી પહોંચવું વધુ સરળ બનશે, જે ટૂરિઝમ ઇન્ડસ્ટ્રીને મોટો બૂસ્ટ આપશે.
દ્વારકા અને દાહોદમાં જમીન અધિગ્રહણ શરૂ
આ પ્રોજેક્ટ્સમાં દ્વારકા અને દાહોદ સૌથી આગળ છે, જ્યાં જમીન અધિગ્રહણ પ્રક્રિયા શરૂ થઈ ગઈ છે. જ્યારે મોરબી, ધોરડો અને ધોળાવીરાને ટેક્નિકલ રીતે યોગ્ય ગણવામાં આવ્યા છે. બીજી તરફ બોટાદ, રાજુલા અને પાલિતાણા જેવા વિસ્તારોમાં પ્રોજેક્ટને લઈ કેટલાક પ્રેક્ટિકલ પડકારો છે, જેના કારણે કામગીરી ધીમી ગતિએ ચાલી રહી છે.
હાલના એરપોર્ટ પર વધતું ભારણ
ગુજરાતમાં હાલ કુલ 19 એરપોર્ટ છે, જેમાં 3 ઇન્ટરનેશનલ અને 9 ડોમેસ્ટિક એરપોર્ટનો સમાવેશ થાય છે. છતાં, માત્ર 8 થી 10 એરપોર્ટ જ નિયમિત રીતે કાર્યરત છે. તેના કારણે રાજ્યનો મોટાભાગનો હવાઈ ટ્રાફિક સરદાર વલ્લભભાઈ પટેલ ઈન્ટરનેશનલ એરપોર્ટ પર કેન્દ્રિત થાય છે, જેના કારણે અહીં ભારે ભારણ જોવા મળે છે.
નવી એરપોર્ટ યોજના અમલમાં આવ્યા પછી આ ભારણ ઘટાડવામાં મદદ મળશે અને રાજ્યમાં હવાઈ સેવાઓ વધુ વ્યાપક બનશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
