ગુજરાત સરકારે ખેડૂતો અને જમીનધારકોને મોટી રાહત આપતા વારસાઈ સંબંધિત જમીનના આંતરિક વ્યવહારો માટે સ્ટેમ્પ ડ્યુટીમાં મહત્વપૂર્ણ છૂટછાટ જાહેર કરી છે. Gujarat Stamp Act 1958 ની કલમ 9 હેઠળ રાજ્ય સરકારે જંત્રી આધારિત સ્ટેમ્પ ડ્યુટીની જોગવાઈમાંથી રાહત આપીને હવે માત્ર ₹300 ટોકન સ્ટેમ્પ ડ્યુટી લાગુ કરવાનો નિર્ણય કર્યો છે. આ પગલાથી ખાસ કરીને ખેતીની જમીનની વારસાઈ મિલકતના વ્યવહારોમાં ખેડૂતો પર પડતો આર્થિક ભાર નોંધપાત્ર રીતે ઘટશે.
રાજ્યમાં લાંબા સમયથી ખેડૂતો અને વિવિધ સંગઠનો દ્વારા જંત્રી આધારિત ઊંચી સ્ટેમ્પ ડ્યુટીમાં રાહત આપવા માંગ કરવામાં આવી રહી હતી. આ રજૂઆતોને ધ્યાનમાં રાખીને રાજ્ય સરકારે આ નિર્ણય લીધો છે. નવા નિયમ મુજબ, વારસાઈ નોંધ હેઠળ સંયુક્ત ખાતેદારોમાં કોઈ એક અથવા વધુ વારસદારોના હકક ઉઠાવવાના કિસ્સામાં દરેક હક્ક-કમીના દસ્તાવેજ પર હવે માત્ર ₹300 સ્ટેમ્પ ડ્યુટી વસૂલવામાં આવશે.
આ જોગવાઈ સીધી લીટીના (Direct Line) અને આડી લીટીના (Collateral Line) વારસદારો બંને માટે લાગુ પડશે. જો મૂળ ખાતેદારના સીધી લીટીના વારસદારો હાજર ન હોય તો આડી લીટીના વારસદારોને પણ આ લાભ મળશે. તેમજ સમયગાળા મુજબ એક અથવા વધુ તબક્કામાં નામ દાખલ કરવાના અને હક્ક ટ્રાન્સફર કરવાની પ્રક્રિયામાં પણ દરેક દસ્તાવેજ પર ₹300 જ સ્ટેમ્પ ડ્યુટી લાગશે.
ખાસ કરીને ખેતીની જમીન માટે આ નિર્ણય અત્યંત મહત્વપૂર્ણ છે. જમીનની વહેંચણી અને હક્ક નોંધણીની પ્રક્રિયા હવે સરળ અને સસ્તી બનશે. અગાઉ ઊંચી સ્ટેમ્પ ડ્યુટીના કારણે ઘણા પરિવારોમાં જમીન વહેંચણી બિનદસ્તાવેજી રહેતી હતી, જેના કારણે ભવિષ્યમાં વિવાદ અને કોર્ટ કેસો ઊભા થતા હતા. હવે ઓછા ખર્ચે કાયદેસર નોંધણી શક્ય બનતા પારદર્શિતા વધશે અને કાનૂની વિવાદોમાં ઘટાડો થશે.
આ નિર્ણયથી ખેડૂતોને માત્ર આર્થિક રાહત જ નહીં, પરંતુ જમીન સંબંધિત વ્યવહારોમાં સરળતા અને સુરક્ષા પણ મળશે. રાજ્ય સરકારના આ પગલાને કૃષિ ક્ષેત્ર માટે મહત્વપૂર્ણ સુધારાના રૂપમાં જોવામાં આવી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
