Cyclone Montha Updates: ભારતીય હવામાન વિભાગ (IMD) અનુસાર, બંગાળની ખાડીમાં રચાયેલું ચક્રવાત મોન્થા ઝડપથી મજબૂત થઈ રહ્યું છે અને 28 ઓક્ટોબરની સવાર સુધીમાં તે તીવ્ર ચક્રવાતી વાવાઝોડામાં પરિવર્તિત થઈ શકે છે. આગાહી મુજબ, 28 ઓક્ટોબરની સાંજ કે રાત સુધીમાં આ વાવાઝોડું માછલીપટ્ટનમ અને કલિંગપટ્ટનમ વચ્ચે કાકીનાડા નજીક લેન્ડફોલ કરી શકે છે. પવનની ગતિ 90થી 100 કિલોમીટર પ્રતિ કલાક રહેવાની આશંકા છે, જેમાં મહત્તમ 110 કિલોમીટર પ્રતિ કલાકની ઝડપે પવન ફૂંકાઈ શકે છે. વધુમાં, આંધ્રપ્રદેશ અને ઓડિશાના દરિયાકાંઠા માટે ભારે વરસાદની ચેતવણી જારી કરવામાં આવી છે. વહીવટીતંત્રે સંવેદનશીલ અને નીચાણવાળા વિસ્તારોના લોકોને સતર્ક રહેવા અપીલ કરી છે. આ સાથે ગુજરાતના અનેક વિસ્તારોમાં પણ ભારે વરસાદની આગાહી આપવામાં આવી છે.
હવામાન વિભાગે (IMD) આંધ્રપ્રદેશ, છત્તીસગઢ અને ઓડિશા માટે રેડ એલર્ટ જારી કર્યું છે. IMD એ આંધ્રપ્રદેશના દરિયાકાંઠે આવેલા કાકીનાડા, કોનાસીમા, પશ્ચિમ ગોદાવરી, કૃષ્ણા, બાપટલા, પ્રકાશમ અને SPSR નેલ્લોર જિલ્લાઓ માટે રેડ એલર્ટ જારી કર્યું છે. તમિલનાડુના તિરુવલ્લુર જિલ્લામાં તેમજ ઓડિશાના દક્ષિણ જિલ્લાઓ, જેમાં મલકાનગિરી, કોરાપુટ, કાલાહાંડી, ગજપતિ, નબરંગપુર, બાલનગીર, કંધમાલ અને ગંજમનો સમાવેશ થાય છે, ભારે વરસાદની આગાહી છે.
હવામાન વિભાગે મંગળવારે દરિયાકાંઠાના કર્ણાટક, પૂર્વી રાજસ્થાન, ગંગા પશ્ચિમ બંગાળ, ગુજરાત અને ઝારખંડ માટે મુશળધાર વરસાદની ચેતવણી જારી કરી હતી. કેરળ, કોંકણ, ગોવા, મધ્ય મહારાષ્ટ્ર, ઉત્તરીય આંતરિક કર્ણાટક અને વિદર્ભમાં છૂટાછવાયા સ્થળોએ ભારેથી અતિ ભારે વરસાદની પણ આગાહી છે. આ ઉપરાંત, આજે છત્તીસગઢમાં 50-60 કિલોમીટર પ્રતિ કલાકની ઝડપે વાવાઝોડા સાથે ભારે પવન ફૂંકાશે તેવી શક્યતા છે. અનેક રાજ્યોમાં વીજળી પડવાની ચેતવણી પણ જારી કરવામાં આવી છે. આંધ્રપ્રદેશ, પૂર્વી મધ્યપ્રદેશ, ગંગા પશ્ચિમ બંગાળ, ગુજરાત, કર્ણાટકના આંતરિક વિસ્તારો, ઝારખંડ, કોંકણ-ગોવા, મધ્ય મહારાષ્ટ્ર, મરાઠવાડા, ઓડિશા, રાજસ્થાન, તમિલનાડુ, પુડુચેરી-કરૈકલ અને તેલંગાણામાં છૂટાછવાયા સ્થળોએ વીજળી પડી શકે છે.
હવામાન વિભાગ પાસેથી મળતી માહિતી પ્રમાણે, પશ્ચિમ મધ્ય અને દક્ષિણપશ્ચિમ બંગાળની ખાડીને અડીને આવેલા દક્ષિણપશ્ચિમ પર ચક્રવાતી તોફાન “મોન્થા” છેલ્લા 6 કલાક દરમિયાન 15 કિમી પ્રતિ કલાકની ઝડપે ઉત્તર-ઉત્તરપશ્ચિમ તરફ આગળ વધ્યું અને ગઈકાલે, 27 ઓક્ટોબર 2025 ના રોજ ભારતીય સમય મુજબ 2330 કલાકે, પશ્ચિમ મધ્ય બંગાળની ખાડી પર, 14.0° ઉત્તર અક્ષાંશ અને 83.5° પૂર્વ રેખાંશની નજીક, માછલીપટ્ટનમ (આંધ્ર પ્રદેશ) થી લગભગ 280 કિમી દક્ષિણ-દક્ષિણપૂર્વમાં, કાકીનાડા (આંધ્ર પ્રદેશ) થી 360 કિમી દક્ષિણ-દક્ષિણપૂર્વમાં, વિશાખાપટ્ટનમ (આંધ્ર પ્રદેશ) થી 410 કિમી દક્ષિણમાં, ગોપાલપુર (ઓડિશા) થી 610 કિમી દક્ષિણ-દક્ષિણપશ્ચિમમાં કેન્દ્રિત થયું.
તે ઉત્તર-ઉત્તરપશ્ચિમ તરફ આગળ વધવાની અને 28 ઓક્ટોબરની સવાર સુધીમાં તીવ્ર ચક્રવાતી (severe cyclonic storm) તોફાનમાં ફેરવાવાની સંભાવના છે. ઉત્તર-ઉત્તરપશ્ચિમ તરફ આગળ વધતા, તે 28 ઓક્ટોબરની સાંજે/રાત્રે કાકીનાડાની આસપાસ માછલીપટ્ટનમ અને કલિંગપટ્ટનમ વચ્ચે આંધ્રપ્રદેશના દરિયાકાંઠે એક તીવ્ર ચક્રવાતી તોફાનના રૂપમાં પાર કરે તેવી શક્યતા છે, જેમાં મહત્તમ 90-100 કિમી પ્રતિ કલાકથી 110 કિમી પ્રતિ કલાકની ગતિએ પવન ફૂંકાશે.
પૂર્વ-મધ્ય અરબી સમુદ્ર પર ડિપ્રેશનની વાત કરીએ તો, તે ડિપ્રેશન છેલ્લા 6 કલાક દરમિયાન સ્થિર રહ્યું હતું અને ગઈકાલે, 27 ઓક્ટોબર 2025 ના રોજ 2330 કલાકે, વેરાવળ (ગુજરાત) થી લગભગ 570 કિમી દક્ષિણપશ્ચિમ, મુંબઈ (મહારાષ્ટ્ર) થી લગભગ 650 કિમી પશ્ચિમ-દક્ષિણપશ્ચિમ, પણજી (ગોવા) થી લગભગ 710 કિમી પશ્ચિમ-ઉત્તરપશ્ચિમ, અમીનીદિવી (લક્ષદ્વીપ) થી 850 કિમી ઉત્તરપશ્ચિમ અને મેંગલોર (કર્ણાટક) થી લગભગ 920 કિમી પશ્ચિમ-ઉત્તરપશ્ચિમમાં કેન્દ્રિત હતું. આગામી સમયમાં દરમિયાન તે પૂર્વ-મધ્ય અરબી સમુદ્રમાં લગભગ ઉત્તર-ઉત્તરપૂર્વ તરફ આગળ વધવાની સંભાવના છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
