ભારતના ચૂંટણી પંચની સૂચના અનુસાર ગુજરાતમાં હાથ ધરાયેલી મતદાર યાદીની ખાસ સઘન સુધારણા ઝુંબેશ (SIR) પૂર્ણ થયા બાદ આજે 19 ડિસેમ્બરે રાજ્ય ચૂંટણી પંચ દ્વારા ડ્રાફ્ટ મતદાર યાદી જાહેર કરવામાં આવી છે. આ યાદી સત્તાવાર વેબસાઇટ http://ceo.gujarat.gov.in પર ઉપલબ્ધ કરાવવામાં આવી છે. 27 ઓક્ટોબર 2025થી શરૂ થયેલી આ ઝુંબેશ લગભગ દોઢ મહિના સુધી રાજ્યભરમાં ચલાવવામાં આવી હતી. સ્થાનિક સ્વરાજ્યની ચૂંટણીઓ નજીક હોવાના પગલે આ પ્રક્રિયાને ખાસ મહત્વ આપવામાં આવ્યું હતું. ડ્રાફ્ટ મતદાર યાદી અનુસાર રાજ્યમાં કુલ 4.34 કરોડ મતદારો નોંધાયેલા છે, જ્યારે SIR દરમિયાન 73.73 લાખ મતદારોના નામ યાદીમાંથી દૂર કરવામાં આવ્યા છે. અગાઉ રાજ્યમાં 5,08,43,436 મતદારો નોંધાયેલા હતા, જે હવે ઘટીને 4,34,70,109 થયા છે.
ચૂંટણી પંચે સ્પષ્ટ કર્યું છે કે ડ્રાફ્ટ મતદાર યાદીમાં જો કોઈ મતદારનું નામ ન હોય અથવા વિગતોમાં ભૂલ હોય તો તે અંગે વાંધા અને દાવા રજૂ કરી શકાય છે. મતદારોને 18 જાન્યુઆરી 2026 સુધી વાંધા-દાવા રજૂ કરવાની તક આપવામાં આવી છે. આ સમયગાળા દરમિયાન મતદાર પોતાનું નામ ચકાસી શકે છે અને જરૂરી સુધારા માટે અરજી કરી શકે છે. 10 ફેબ્રુઆરી 2026 સુધી ચૂંટણી અધિકારીઓ દ્વારા તમામ વાંધાઓની ચકાસણી કરીને તેનો નિકાલ કરવામાં આવશે.
SIR અભિયાન દરમિયાન BLO દ્વારા ડોર-ટુ-ડોર સર્વે કરવામાં આવ્યો હતો, જેમાં અવસાન પામેલા, કાયમી સ્થળાંતર કરેલા, ગેરહાજર અને બે જગ્યાએ નોંધાયેલા મતદારોની ઓળખ કરવામાં આવી હતી. દૂર કરાયેલા મતદારોમાં 18,07,278 અવસાન પામેલા, 9,69,662 ગેરહાજર, 40,25,553 કાયમી સ્થળાંતર કરેલા, 3,81,470 બે જગ્યાએ નોંધાયેલા અને 1,89,364 અન્ય કારણોસર હતા.
મતદારો પોતાનું નામ ડ્રાફ્ટ મતદાર યાદીમાં વેબસાઇટ, voters.eci.gov.in પોર્ટલ, ECINET એપ, BLO અથવા જિલ્લા ચૂંટણી અધિકારી/ERO/AERO કચેરીમાંથી ચકાસી શકે છે. 1 જાન્યુઆરી 2026ની લાયકાતની તારીખે 18 વર્ષ પૂર્ણ કરનાર યુવાનો ફોર્મ નં. 6 ભરીને પોતાનું નામ અંતિમ મતદાર યાદીમાં દાખલ કરાવી શકે છે, જે 17 ફેબ્રુઆરી 2026ના રોજ પ્રસિદ્ધ થવાની છે.
ઉલ્લેખનીય છે કે 27 ઓક્ટોબરે શરૂ થયેલું SIR અભિયાન વિવાદમાં પણ આવ્યું હતું. વધુ પડતા કામના બોજને કારણે પાંચ જેટલા બુથ લેવલ ઓફિસરોના મૃત્યુ થયા હોવાના અહેવાલો સામે આવ્યા હતા, જેના કારણે રાજ્ય ચૂંટણી પંચ પર ટીકા થઈ હતી. તેમ છતાં, ચૂંટણી પંચનું કહેવું છે કે આ સમગ્ર પ્રક્રિયાનો હેતુ મતદાર યાદીને વધુ શુદ્ધ અને વિશ્વસનીય બનાવવાનો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
