દિલ્હીમાં આયોજિત પ્રતિષ્ઠિત AI Summit 2026 દરમિયાન રાહુલ ગાંધી દ્વારા કરવામાં આવેલા વિવાદાસ્પદ નિવેદનના વિરોધમાં આજે ભારતીય જનતા પાર્ટીના આણંદ જિલ્લા સંગઠન અને યુવા મોરચા દ્વારા શહેરના મુખ્ય ટાઉનહોલ ચોકડી ખાતે પૂતળા દહન કરી ઉગ્ર વિરોધ પ્રદર્શન કરવામાં આવ્યું હતું.
યુવા મોરચાના કાર્યકરો સાંજે ૫:૩૦ કલાકે ટાઉનહોલ ચોકડી ખાતે એકત્રિત થયા હતા અને ‘રાહુલ ગાંધી હાય-હાય’ તેમજ ‘દેશનું અપમાન નહીં સહે ભારત’ જેવા સૂત્રોચ્ચાર સાથે વાતાવરણ ગજવી દીધું હતું. વિરોધ દરમિયાન રાહુલ ગાંધીનું પૂતળું સળગાવી કડક વિરોધ નોંધાવવામાં આવ્યો હતો.
તાજેતરમાં દિલ્હીમાં યોજાયેલી ગ્લોબલ AI સમિટ દરમિયાન રાહુલ ગાંધીએ ભારતની ડિજિટલ તથા ટેકનોલોજીકલ પ્રગતિને ‘PR સ્ટન્ટ’ અને ‘હાસ્યાસ્પદ’ ગણાવી હોવાનું ભાજપ યુવા મોરચાનું કહેવું છે. આણંદ ભાજપ યુવા મોરચાના નેતાઓએ આક્ષેપ કર્યો કે જ્યારે સમગ્ર વિશ્વ ભારતની AI ક્ષમતાની પ્રશંસા કરી રહ્યું છે, ત્યારે આંતરરાષ્ટ્રીય મંચ પર દેશની છબી ખરડવાનો પ્રયાસ કરવામાં આવ્યો છે.
ટાઉનહોલ ચોકડી ખાતે મોટી સંખ્યામાં યુવા કાર્યકરો હાજર રહ્યા હતા. કાર્યકરોએ દેશવિરોધી નિવેદનો સામે કડક પગલાં લેવાની માંગ કરી હતી અને જણાવ્યું હતું કે ભારતની ટેકનોલોજીકલ પ્રગતિ પર આ પ્રકારની ટિપ્પણીઓ અયોગ્ય છે.
આણંદ જિલ્લા સંગઠનના યુવા મહામંત્રી જગત પટેલે જણાવ્યું હતું કે,“રાહુલ ગાંધી વારંવાર વિદેશી મંચો પર ભારતની મજાક ઉડાવે છે. AI ક્ષેત્રે ભારત વિશ્વગુરુ બનવા તરફ આગળ વધી રહ્યું છે ત્યારે આવી માનસિકતા દેશના યુવા ટેલેન્ટનું અપમાન છે. આણંદનો યુવાન આ અપમાન ક્યારેય સહન નહીં કરે.”
ઉલ્લેખનીય છે કે વિરોધ દરમિયાન કાયદો અને વ્યવસ્થા જળવાઈ રહે તે માટે પોલીસ બંદોબસ્ત પણ ગોઠવવામાં આવ્યો હતો.
ભાવેશ સોની (આણંદ)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
