આણંદ જિલ્લામાં એન્ટી કરપ્શન બ્યુરો (ACB) દ્વારા ગોઠવાયેલા સફળ ટ્રેપમાં આણંદ ગ્રામ્ય મામલતદાર કચેરીમાં ફરજ બજાવતા રેવન્યુ તલાટી ગૌરવ રાજેશકુમાર રાજપુત તથા તેમના સાગરીત બદરૂદીન શરફુભાઈ મલેકને રૂ.૧૦ હજારની લાંચ લેતા રંગેહાથ ઝડપી લેવામાં આવ્યા છે.
ફરીયાદી એક જાગૃત નાગરિકે એ.સી.બી. સમક્ષ ફરિયાદ નોંધાવતા કાર્યવાહી હાથ ધરાઈ હતી. ફરિયાદ મુજબ, બાકરોલ ખાતે આવેલી વડીલોપાર્જીત સંયુક્ત માલિકીની જમીનની વારસાઇ નોંધ નામંજુર થતા તેની અપીલની કામગીરી કરવા માટે આરોપી તલાટીએ શરૂઆતમાં રૂ.૧,૨૦,૦૦૦/-ની લાંચની માંગણી કરી હતી. જેમાંથી અગાઉ ગુગલ પે મારફતે રૂ.૩૦,૦૦૦/- લેવામાં આવ્યા હતા. બાદમાં વધુ રૂ.૧૦,૦૦૦/-ની માંગણી કરતા ફરીયાદીએ લાંચ આપવા ઇનકાર કરી એ.સી.બી.નો સંપર્ક કર્યો હતો.
ફરીયાદના આધારે તા.૨૦/૦૨/૨૦૨૬ના રોજ ટ્રેપ ગોઠવવામાં આવ્યો. ટ્રેપ દરમિયાન આરોપી તલાટીએ લાંચની રકમ પોતાના બદલે સાગરીત બદરૂદીન મલેકને લેવા કહ્યું. ત્યારબાદ આણંદ જિલ્લા સેવાસદન કચેરી બહાર જાહેર રોડ પર ચાની લારી પાસે બદરૂદીન મલેકે રૂ.૧૦,૦૦૦/-ની લાંચ સ્વીકારતા જ એ.સી.બી. ટીમે બન્ને આરોપીઓને ઝડપી લીધા.
આ ટ્રેપની કામગીરી પોલીસ ઇન્સ્પેક્ટર એમ.એલ. રાજપુતની આગેવાનીમાં કરવામાં આવી હતી, જેમાં મદદનીશ નિયામક એમ.એચ. પુવારનું સુપરવિઝન અને નાયબ નિયામક હરેશ મેવાડાનું માર્ગદર્શન રહ્યું.
એ.સી.બી.એ સ્પષ્ટ કર્યું છે કે સરકારી કર્મચારીઓ દ્વારા લાંચ અને ભ્રષ્ટાચાર સામે આવી કડક કાર્યવાહી આગળ પણ સતત ચાલુ રહેશે.
ભાવેશ સોની (આણંદ)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
