લો-કોસ્ટ એરલાઈન કેરિયર ફ્લાયદુબઈ, બિઝી બી એરવેઝ સાથે ભાગીદારી દ્વારા ભારતમાં એરલાઇન કારોબાર શરૂ કરવાની શક્યતા શોધી રહી છે. બિઝી બી એરવેઝ નાદાર ગો ફર્સ્ટને ખરીદવા માટે લેણદારો સાથે વાટાઘાટો કરી રહી છે. મીડિયા રિપોર્ટ અનુસાર, બિઝી બી ગો ફર્સ્ટના ટ્રેડમાર્ક, ફ્લાઈંગ લાઇસન્સ અને એરપોર્ટ સ્લોટ્સ મેળવવા માટે ગો ફર્સ્ટની કમિટી ઓફ ક્રેડિટર્સ સાથે વાતચીત કરી રહી છે.
બિઝી બીએ અગાઉ માર્ચ, ૨૦૨૪માં પણ ૧૧,૦૦૦ કરોડના નાદારીનો કેસ લડી રહેલી ગો ફર્સ્ટ માટે બિડ પણ મૂકી હતી અને હવે ફરી એકવાર રસ દાખવ્યો છે. એક બેકિંગ સિનિયર અધિકારીના જણાવ્યા અનુસાર બોલી લગાવનારની નજર ગો ફર્સ્ટની એસેટ કરતાં બ્રાન્ડ પર વધુ છે. ટ્રેડમાર્ક અને લાઇસન્સ માટે જ લગભગ રૂ. ૧૦૦૦ કરોડની ઓફર થઈ ચૂકી છે.
ગો ફર્સ્ટ એરલાઈન્સ, જે મે 2023થી નાદારી પ્રક્રિયામાં છે, હાલમાં તેની મિલકતોના લિક્વિડેશનનો સામનો કરી રહી છે. એનસીએલટીએ (NCLT) જાન્યુઆરી 2025માં ગો ફર્સ્ટને લિક્વિડેશનમાં મૂકવાનો આદેશ આપ્યો હતો, જે મુજબ કંપનીની મિલકતો વેચીને દેવું ચૂકવવામાં આવશે.
આ પરિસ્થિતિમાં, બિઝી બી એરવેઝ, જેનું સ્થાપન એપ્રિલ 2017માં ફ્લાયદુબઈના દક્ષિણપૂર્વ એશિયાના કોમર્શિયલ ઓપરેશન્સના ડિરેક્ટર પ્રાણ સથાદાસને કર્યું હતું, ગો ફર્સ્ટની મિલકતો ખરીદવા માટેની પ્રક્રિયામાં સામેલ છે. બિઝી બી એરવેઝ, જે દુબઈ સરકારની મુખ્ય રોકાણ શાખા, ઇન્વેસ્ટમેન્ટ કોર્પોરેશન ઓફ દુબઈ (ICD)ની માલિકીની છે, ગો ફર્સ્ટની મિલકતો ખરીદીને ભારતમાં નવી ડોમેસ્ટિક એરલાઈન શરૂ કરવાની યોજના પર કામ કરી રહી છે.
ગો ફર્સ્ટની મિલકતો માટેની બોલી પ્રક્રિયામાં સ્પાઈસજેટના પ્રમોટર અજય સિંહ પણ સામેલ છે. તેમણે બિઝી બી એરવેઝ સાથે મળીને ગો ફર્સ્ટને ખરીદવા માટે બોલી લગાવી છે, જેના દ્વારા તેઓ ગો ફર્સ્ટના સ્લોટ્સ અને આંતરરાષ્ટ્રીય ઉડાન અધિકારોનો ઉપયોગ કરીને તેમની કામગીરી મજબૂત બનાવવા ઈચ્છે છે.
ભારતીય નાગરિક ઉડ્ડયન ક્ષેત્રે 100% વિદેશી સીધી રોકાણ (FDI)ની મંજૂરી છે, જેથી વિદેશી કંપનીઓને ભારતીય એરલાઈન ઉદ્યોગમાં રોકાણ કરવાની તક મળે છે. જો બિઝી બી એરવેઝ ગો ફર્સ્ટની મિલકતો ખરીદવામાં સફળ થાય છે, તો તે ભારતના ઉડ્ડયન ક્ષેત્રમાં નવી ડોમેસ્ટિક એરલાઈન તરીકે પ્રવેશ કરશે, જે ભારતીય ઉડ્ડયન ક્ષેત્રમાં સ્પર્ધા અને સેવાઓમાં વધારો કરશે.
