ગુજરાત વિધાનસભાના આગામી બજેટ સત્રને લઈને રાજ્ય રાજકારણમાં મોટી જાહેરાત સામે આવી છે. મુખ્યમંત્રીની અધ્યક્ષતામાં મળેલી કેબિનેટ બેઠકમાં બજેટની તૈયારીઓ અને રાજ્યના વિવિધ વિકાસ પ્રોજેક્ટ્સની સમીક્ષા કર્યા બાદ બજેટ સત્રની તારીખો જાહેર કરવામાં આવી છે. સાથે સાથે વિધાનસભાની કામકાજ સલાહકાર સમિતિની પુનઃ રચના પણ કરવામાં આવી છે. રાજ્યના નાણામંત્રી કનુભાઈ દેસાઈ આ સત્ર દરમિયાન નાણાકીય વર્ષ 2026-27 માટેનું અંદાજપત્ર રજૂ કરશે, જે રાજ્યના વિકાસની દિશા નક્કી કરનારું મહત્વપૂર્ણ બજેટ માનવામાં આવી રહ્યું છે.
બજેટ સત્રનો પ્રારંભ 16 ફેબ્રુઆરીથી થશે અને તે 25 માર્ચ સુધી ચાલશે. સત્રની શરૂઆત રાજ્યપાલના સંબોધનથી થશે. કુલ 23 કામકાજના દિવસોમાં 26 બેઠકો યોજવાની યોજના છે. આ દરમિયાન વિધાનસભાના ઉપાધ્યક્ષની ચૂંટણી પણ યોજાશે. સરકાર આ સત્રમાં સાત જેટલા નવા વિધેયકો રજૂ કરવાની તૈયારીમાં છે, જેમાં સમાન નાગરિક સંહિતા (UCC) સંબંધિત મહત્વપૂર્ણ કાયદાકીય પ્રસ્તાવો આવવાની પ્રબળ શક્યતા છે. સાથે જ કેન્દ્ર સરકાર સાથે સંકળાયેલા રાજ્યના ચાલુ અને પડતર પ્રોજેક્ટ્સની પણ વિગતવાર સમીક્ષા કરવામાં આવશે.
બજેટના કદ અંગે મળતી માહિતી મુજબ, આ વખતે ગુજરાતના ઇતિહાસનું સૌથી મોટું બજેટ રજૂ થવાની શક્યતા છે. ગયા વર્ષની સરખામણીએ અંદાજે 15 ટકાના વધારા સાથે રાજ્ય સરકાર લગભગ 3.90 લાખ કરોડ રૂપિયાનું બજેટ રજૂ કરી શકે છે. નાણાં વિભાગ દ્વારા તેની તૈયારીઓ તેજ કરી દેવામાં આવી છે. કેબિનેટ બેઠકમાં ખાસ કરીને શિક્ષણ, આરોગ્ય, અને માળખાગત સુવિધાઓ પર વધુ રોકાણ કરવાની દિશામાં ચર્ચા કરવામાં આવી હોવાનું જાણવા મળ્યું છે. ફેબ્રુઆરીના ત્રીજા અઠવાડિયામાં શરૂ થનારા આ બજેટ સત્ર પર હવે સમગ્ર રાજ્યની જનતાની નજર ટકી છે, કારણ કે આ સત્રમાંથી ગુજરાતના વિકાસ માટે અનેક મહત્વપૂર્ણ નિર્ણયો બહાર આવવાની અપેક્ષા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
