ગુજરાતમાં આગામી સ્થાનિક સ્વરાજ્યની ચૂંટણીઓ પહેલા રાજકીય માહોલ ગરમાયો છે. આ વચ્ચે ગુજરાત રાજ્ય ચૂંટણી પંચ દ્વારા ઉમેદવારો માટે ચૂંટણી ખર્ચની નવી મર્યાદા જાહેર કરવામાં આવી છે. વર્ષ 2021ના જૂના ઠરાવમાં સુધારો કરીને મોંઘવારી અને વધતા પ્રચાર ખર્ચને ધ્યાનમાં રાખીને આ મર્યાદામાં નોંધપાત્ર વધારો કરવામાં આવ્યો છે.
નવા નિયમો અનુસાર, મ્યુનિસિપલ કોર્પોરેશનની ચૂંટણીમાં હવે ઉમેદવાર મહત્તમ 9 લાખ રૂપિયા સુધી ખર્ચ કરી શકશે. અગાઉ આ મર્યાદા માત્ર 6 લાખ રૂપિયા હતી, એટલે કે તેમાં સીધો 50 ટકા વધારો કરવામાં આવ્યો છે. તેવી જ રીતે જિલ્લા પંચાયતની ચૂંટણીમાં પણ ખર્ચ મર્યાદા વધારીને 6 લાખ રૂપિયા કરવામાં આવી છે, જે ઉમેદવારો માટે મહત્વપૂર્ણ રાહતરૂપ સાબિત થશે.
રાજ્ય ચૂંટણી પંચનો આ નિર્ણય પાછળનું મુખ્ય કારણ મોંઘવારી અને ચૂંટણી પ્રચારમાં થતાં વધતા ખર્ચ છે. છેલ્લા કેટલાક વર્ષોમાં સોશિયલ મીડિયા કેમ્પેઇન, ડિજિટલ માર્કેટિંગ, જાહેર સભાઓ અને પ્રચાર સામગ્રીના ખર્ચમાં નોંધપાત્ર વધારો થયો છે. ઉમેદવારો દ્વારા પણ સતત આ મર્યાદા વધારવાની માંગ કરવામાં આવી રહી હતી, જેને ધ્યાનમાં રાખીને આ ફેરફાર કરવામાં આવ્યો છે.
જો કે, આ વધારાની સાથે જવાબદારી પણ વધારવામાં આવી છે. ઉમેદવારોને હવે તેમના તમામ ખર્ચનો સચોટ હિસાબ ગુજરાત રાજ્ય ચૂંટણી પંચને આપવો ફરજિયાત રહેશે. ચૂંટણી દરમિયાન ખર્ચની પારદર્શિતા જળવાઈ રહે તે માટે પંચ દ્વારા કડક દેખરેખ રાખવામાં આવશે.
આગામી દિવસોમાં જેમ જેમ ચૂંટણીનો જંગ તેજ બનશે, તેમ આ નવી ખર્ચ મર્યાદા ઉમેદવારોને વધુ અસરકારક પ્રચાર કરવાની તક આપશે. સાથે જ, આ નિર્ણય ગુજરાતના રાજકીય પરિસ્થિતિમાં નવી દિશા નક્કી કરશે તેવું માનવામાં આવે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
