ડિસેમ્બર 2025માં ગુજરાતની GST આવક રાજ્યની આર્થિક મજબૂતી અને વપરાશ ક્ષમતા વિશે સકારાત્મક સંકેત આપી રહી છે. કેન્દ્રીય નાણા મંત્રાલય દ્વારા જાહેર આંકડાઓ અનુસાર, ડિસેમ્બર 2025માં પોસ્ટ-સેટલમેન્ટ SGST (સ્ટેટ જીએસટી) વસૂલાત ગયા વર્ષના ડિસેમ્બર 2024ના ₹5,651 કરોડની સરખામણીમાં 12.37% વધીને ₹6,351 કરોડ સુધી પહોંચી છે. એ સાથે પ્રી-સેટલમેન્ટ SGSTમાં પણ 7%નો વધારો નોંધાયો છે, જે ગયા વર્ષના ₹3,328 કરોડથી વધીને ₹3,549 કરોડ સુધી પહોંચ્યું છે. આ વધારો રાજ્યમાં વધતી આર્થિક પ્રવૃત્તિઓ, વપરાશમાં વૃદ્ધિ, કર અનુપાલન અને અસરકારક કર વસૂલાત વ્યવસ્થાને કારણે થયો હોવાનું જણાવાયું છે.
GST ઉપરાંત, રાજ્યની અન્ય આવકો પણ મજબૂત બની છે. પેટ્રોલિયમ પ્રોડક્ટ્સ પર VAT દ્વારા ₹2,711 કરોડ, વીજળી કર દ્વારા ₹976 કરોડ અને વ્યવસાયિક કરમાંથી ₹67 કરોડની આવક નોંધાઇ છે. આ તમામને એકત્રિત કરી ગુજરાતમાં ડિસેમ્બરમાં કુલ આવક ₹10,104 કરોડની ઊંચાઈએ પહોંચી છે. આ સાથે, મોબાઇલ સ્ક્વોડ દ્વારા કરચોરી રોકવાના પ્રયાસોમાં પણ વૃદ્ધિ નોંધાઇ છે, જેમાં ₹32.61 કરોડની વસૂલાત થઈ છે, જે ગયા વર્ષની સરખામણીમાં 28.3% વધારે છે.
દેશવ્યાપી દૃષ્ટિકોણથી જોતા, ડિસેમ્બર 2025માં કુલ ગ્રોસ GST વસૂલાત 6.1% વધીને ₹1.74 લાખ કરોડથી વધુ થઇ છે, જેમાં આયાતી માલમાંથી 19.7%નો વધારો મુખ્ય ભૂમિકા ભજવી રહ્યો છે, જ્યારે ઘરેલુ વ્યવહારોમાંથી આવક માત્ર 1.2% વધી છે. ઘરેલુ આવકમાં મર્યાદિત વૃદ્ધિનું મુખ્ય કારણ સપ્ટેમ્બર 2025થી અમલમાં આવેલા GST દરોમાં મોટા પ્રમાણમાં ઘટાડો છે, જેના કારણે લગભગ 375 વસ્તુઓની કિંમત ઘટી છે. જોકે, આયાતમાં વધારો અને વેપારી વોલ્યુમમાં વૃદ્ધિએ કુલ આવકને ટકાવી રાખવામાં મહત્વનો ફાળો આપ્યો છે. આ આંકડા દર્શાવે છે કે ગુજરાતમાં જીએસટી વસૂલાત મજબૂત છે અને આર્થિક પ્રવૃત્તિઓ સ્થિર અને સક્રિય રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
