આર્થિક મુશ્કેલીઓના તણાવમાં ઘેરાયેલ પાકિસ્તાને પોતાની પ્રતિષ્ઠિત સરકારી એરલાઇન Pakistan International Airlines (PIA)નું ખાનગીકરણ પૂર્ણ કરી દીધું છે. મંગળવારે ઇસ્લામાબાદમાં યોજાયેલી હરાજીમાં પાકિસ્તાનની જ ઇન્વેસ્ટમેન્ટ ફર્મ આરિફ હબીબ ગ્રુપ સૌથી વધુ બોલી લગાવીને PIAને ખરીદવામાં સફળતા મેળવી. આ હરાજીમાં ત્રણ મુખ્ય બિડર્સ—લકી સિમેન્ટ, એર બ્લૂ અને આરિફ હબીબ ગ્રુપ—મેદાનમાં હતા, અને સરકારે સમગ્ર પ્રક્રિયાને પારદર્શક બનાવવા માટે લાઈવ પ્રસારણનું આયોજન કર્યું હતું. PIA માટે સરકાર દ્વારા 100 અબજ રૂપિયાની બેઝ પ્રાઇસ નક્કી કરવામાં આવી હતી, જ્યારે અંતિમ વિજેતા આરિફ હબીબ ગ્રુપે 135 અબજ રૂપિયાની બોલી લગાવી હતી.
ખાનગીકરણની શરતો અનુસાર, પાકિસ્તાન સરકારે PIAનો 75% હિસ્સો તાત્કાલિક વેચી દીધો છે, જ્યારે બાકી 25% હિસ્સો સફળ બિડરને 90 દિવસમાં ખરીદવાની તક મળશે. આ ખરીદી માત્ર માલિકીના બદલીને મર્યાદિત નથી, પરંતુ એરલાઇનના પુનરુત્થાન માટે કડક શરતો પણ સામેલ છે. નવા માલિકને આગામી પાંચ વર્ષમાં એરલાઇનના સંચાલન અને સુધાર માટે 80 અબજ રૂપિયાનું નવું રોકાણ કરવું ફરજિયાત રહેશે. હરાજીમાંથી મળનારી કુલ રકમની વહેંચણી એવી રીતે કરવામાં આવી છે કે 92.5% રકમ ફરીથી એરલાઇનમાં રોકાણ માટે જ ઉપયોગ થશે, જ્યારે બાકીનો માત્ર 7.5% હિસ્સો સરકારની તિજોરીમાં જમા થશે.
PIA એક સમય દુનિયાની શ્રેષ્ઠ એરલાઈન્સમાં ગણાતી હતી અને અન્ય દેશો પણ તેની પાસેથી સલાહ લેતા હતા. પરંતુ વર્ષોના કુશાસન, ભ્રષ્ટાચાર અને ખોટા વ્યવસ્થાપનને કારણે આ એરલાઇન સતત ખોટામાં રહી. પીએમ શાહબાઝ શરીફએ જણાવ્યું કે, આ પાકિસ્તાનના ઈતિહાસનો સૌથી મોટો આર્થિક વ્યવહાર છે અને PIAને બચાવવા માટે ખાનગીકરણ સિવાય કોઈ વિકલ્પ બચ્યો ન હતો. સફળ હરાજી બાદ શાહબાઝ શરીફે કેબિનેટ બેઠકમાં પ્રાઇવેટાઇઝેશન કમિશન અને સરકારી અધિકારીઓનો આભાર વ્યક્ત કર્યો. નોંધનીય છે કે આ બીજી વખતનો પ્રયાસ હતો, કારણ કે અગાઉ યોગ્ય કિંમત ન મળવાને કારણે હરાજી રદ કરવી પડી હતી. આ હરાજી પાકિસ્તાની અર્થતંત્ર માટે મહત્વપૂર્ણ છે અને PIAને ફરીથી મજબૂત અને આર્થિક રીતે સ્થિર બનાવવાનો પ્રયાસ માનવામાં આવી રહ્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
