ઉત્તર પ્રદેશના ગાઝિયાબાદમાં ત્રણ નાની બહેનોના સામૂહિક આત્મહત્યાના કેસે સમગ્ર રાજ્યમાં ચકચાર મચાવી છે. આ દુઃખદ ઘટનાએ પરિવારિક સંજોગો, બાળકોની માનસિક સ્થિતિ અને મોબાઇલ તથા સોશિયલ મીડિયા પર વધતા આધારને લઈને અનેક ગંભીર પ્રશ્નો ઉભા કર્યા છે. પોલીસ દરેક સંભવિત દિશાથી તપાસ આગળ ધપાવી રહી છે.
પિતાના બે લગ્ન અને જટિલ પરિવારિક રચના
પોલીસ તપાસમાં ખુલાસો થયો છે કે છોકરીઓના પિતાએ બે લગ્ન કર્યા હતા. પ્રથમ પત્નીથી ઘણા વર્ષો સુધી સંતાન ન થવાથી તેણે પોતાની પત્નીની નાની બહેન સાથે બીજું લગ્ન કર્યું હતું. બીજા લગ્નથી ત્રણ સંતાનો થયા હતા, જ્યારે બાદમાં અચાનક પ્રથમ પત્નીથી પણ બે સંતાન થયા. આમ, એક જ ઘરમાં બે પત્નીઓ અને પાંચ બાળકો સાથે રહેતા હતા, જે પરિવારિક તણાવનું કારણ બન્યું હોઈ શકે છે.
ત્રણ બહેનો અલગ માતાની હોવા છતાં મજબૂત બોન્ડિંગ
આત્મહત્યા કરનાર ત્રણ બહેનોમાં બે બીજી પત્નીની દીકરીઓ હતી, જ્યારે એક પહેલી પત્નીની દીકરી હતી. આશ્ચર્યજનક વાત એ છે કે અલગ માતાની દીકરીઓ હોવા છતાં ત્રણેય વચ્ચે ખૂબ જ ગાઢ લાગણીસભર બોન્ડિંગ હતું. તેઓ એકબીજાથી અલગ રહેવાનો વિચાર પણ ન કરી શકતી.
છેલ્લા બે વર્ષથી શાળાથી દૂર, મોબાઇલ બની દુનિયા
ત્રણેય બહેનો છેલ્લા બે વર્ષથી શાળાએ જતી નહોતી. પરિવારનું કહેવું છે કે તેઓ અભ્યાસમાં નબળી હોવાથી તેમને ઘરે જ રાખવામાં આવી હતી. શાળા, મિત્રો અને બહારની દુનિયાથી કટ થઈ ગયા બાદ તેમનું જીવન સંપૂર્ણપણે મોબાઇલ ફોન અને સોશિયલ મીડિયા સુધી સીમિત બની ગયું હતું.
‘ટાસ્ક આધારિત પ્રવૃત્તિ’ની આશંકા, અંતિમ દિવસની ચર્ચા
પોલીસને શંકા છે કે ત્રણેય બહેનો કોઈ ટાસ્ક આધારિત પ્રવૃત્તિમાં સામેલ હતી, જેમાં કુલ 50 કાર્યો હોવાનું કહેવાય છે. ઘટના થયેલા દિવસે છેલ્લું ટાસ્ક પૂર્ણ થવાનું હતું તેવી માહિતી સામે આવી છે. જોકે, હાલ સુધી કોઈ ચોક્કસ ગેમ કે સંગઠિત જૂથ સાથે સીધો સંબંધ સાબિત થયો નથી.
તપાસમાં પોલીસનું માનવું છે કે વચલી બહેન સમગ્ર પ્રવૃત્તિની આગેવાન હતી. તે જ નક્કી કરતી કે શું કરવું, ક્યારે કરવું અને કેવી રીતે કરવું. બીજી બે બહેનો તેના કહેવા મુજબ ચાલતી. ત્રણેય સાથે જ ઊઠતી, ખાતી અને સમય પસાર કરતી હોવાથી તેમની દુનિયા એકબીજામાં જ સમાઈ ગઈ હતી.
પિતાનો દાવો: કોરિયન કન્ટેન્ટ જોતી હતી દીકરીઓ
ઘટના બાદ પિતા મીડિયા સામે બોલતા ટાળતા રહ્યા. તેમણે માત્ર એટલું જણાવ્યું કે તેમની દીકરીઓ કોરિયન ગેમ્સ અને કોરિયન કન્ટેન્ટ જોતી હતી. “કાલે છેલ્લું ટાસ્ક હતું” એવી વાત હવે તેમને ખબર પડી હોવાનો તેમણે દાવો કર્યો છે.
પોલીસે તમામ બાળકોના મોબાઇલ ફોન જપ્ત કરી લીધા છે. ડિજિટલ ફોરેન્સિક્સ ટીમ કોલ રેકોર્ડ, ચેટ્સ, સોશિયલ મીડિયા એકાઉન્ટ્સ, એપ્લિકેશન્સ, વીડિયો અને સુસાઇડ નોટની વિગતવાર તપાસ કરી રહી છે. સુસાઇડ નોટમાં કોઈ વ્યક્તિ કે ચોક્કસ પ્લેટફોર્મનું નામ નથી, પરંતુ કોરિયન સંસ્કૃતિનો ઉલ્લેખ મળી આવ્યો છે.
અનેક એંગલથી તપાસ ચાલુ, કારણ હજુ અસ્પષ્ટ
DCPના જણાવ્યા મુજબ હાલ સુધી કોઈ ચોક્કસ ગેમ, ચેલેન્જ અથવા સંગઠિત જૂથના પુરાવા મળ્યા નથી. પરિવારિક પરિસ્થિતિ, બાળકો પર માનસિક દબાણ, મોબાઇલ પર નિયંત્રણ અને સામાજિક એકાંત — દરેક દિશામાં તપાસ ચાલુ છે. સાચું કારણ તપાસ પૂર્ણ થયા બાદ જ સ્પષ્ટ થઈ શકશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
