દેશની ભાવિ પેઢીના આરોગ્યને સુરક્ષિત કરવા માટે કેન્દ્ર સરકારે સર્વાઈકલ કેન્સર સામે રાષ્ટ્રીય સ્તરે ઐતિહાસિક પગલું ભર્યું છે. 14થી 15 વર્ષની કિશોરીઓને વિનામૂલ્યે HPV રસી આપવાનું રાષ્ટ્રવ્યાપી રસીકરણ અભિયાન શરૂ કરવામાં આવ્યું છે. આ અભિયાનનો મુખ્ય હેતુ કિશોરીઓને ભવિષ્યમાં સર્વાઈકલ કેન્સર જેવી જીવલેણ બીમારીથી બચાવવાનો છે. ગુજરાતમાં પણ આ રસીકરણ ઝુંબેશનો સત્તાવાર પ્રારંભ થઈ ગયો છે.
LIVE: માનનીય વડાપ્રધાન શ્રી નરેન્દ્રભાઈ મોદી દ્વારા વર્ચ્યુઅલ માધ્યમથી સર્વાઇકલ કેન્સર સામે રાષ્ટ્રીય HPV રસીકરણ અભિયાનનો શુભારંભ. https://t.co/wz7lByqYAl
— Bhupendra Patel (@Bhupendrapbjp) February 28, 2026
ગુજરાતમાં 5.5 લાખથી વધુ કિશોરીઓને મળશે લાભ
રાજ્ય સરકાર દ્વારા મળતી માહિતી અનુસાર, ગુજરાતની આશરે 5.5 લાખ કિશોરીઓને આ અભિયાન હેઠળ આવરી લેવામાં આવશે. રસીકરણ શાળાઓ તેમજ સરકારી આરોગ્ય કેન્દ્રો ખાતે કરવામાં આવશે, જેથી વધુમાં વધુ કિશોરીઓ સુધી આ સુવિધા સરળતાથી પહોંચી શકે.
રાજ્યના આરોગ્ય મંત્રી પ્રફુલ પાનસેરીયાએ જણાવ્યું છે કે રાજ્ય સરકાર આરોગ્ય સુવિધાઓને વધુ સશક્ત બનાવવા પ્રતિબદ્ધ છે. હાલના 27ના મહેકમને વધારીને 40ના મહેકમ મુજબ સામુદાયિક આરોગ્ય કેન્દ્રોને અપગ્રેડ કરવાની યોજના હાથ ધરવામાં આવી છે.
ધાનેરા સામુદાયિક આરોગ્ય કેન્દ્રમાં નવીન મહેકમ મુજબ વધારાના નિષ્ણાતો જેવી કે:
-
બાળરોગ નિષ્ણાત
-
સ્ત્રીરોગ નિષ્ણાત
-
ફિઝિશિયન
-
જનરલ સર્જન
-
એનેસ્થેશિયોલોજિસ્ટ
તેમજ પેરામેડિકલ સ્ટાફમાં એક્સ-રે ટેક્નિશિયન, લેબ ટેક્નિશિયન, સ્ટાફ નર્સ અને વર્ગ-3 અને વર્ગ-4ની વધારાની જગ્યાઓને સૈદ્ધાંતિક મંજૂરી આપવામાં આવી છે. આગામી સમયમાં તબક્કાવાર રાજ્યભરના તમામ સામુદાયિક આરોગ્ય કેન્દ્રોમાં આ માળખું અમલમાં મુકવામાં આવશે.
સર્વાઈકલ કેન્સર: ચિંતાજનક આંકડા
આરોગ્ય મંત્રાલયના આંકડા મુજબ, ગત વર્ષે દેશમાં 79,000થી વધુ સર્વાઈકલ કેન્સરના કેસ નોંધાયા, જેમાંથી આશરે 34,000 મહિલાઓના મૃત્યુ થયા. આ આંકડા દર્શાવે છે કે સમયસર રસીકરણ કેટલી મહત્વપૂર્ણ ભૂમિકા ભજવી શકે છે.
શું છે સર્વાઈકલ કેન્સર?
સર્વાઈકલ કેન્સર મુખ્યત્વે હ્યુમન પેપિલોમા વાયરસ (HPV)ના સંક્રમણને કારણે થાય છે. ખાસ કરીને HPV-16 અને HPV-18 પ્રકારના વાયરસ આ કેન્સર માટે જવાબદાર ગણાય છે.
જો 14થી 15 વર્ષની વયે HPV રસી આપવામાં આવે, તો શરીરમાં મજબૂત રોગપ્રતિકારક શક્તિ વિકસે છે અને ભવિષ્યમાં સર્વાઈકલ કેન્સર થવાનો ખતરો અત્યંત ઓછો થઈ જાય છે. તબીબી નિષ્ણાતો અનુસાર, આ રસી મહિલાઓના આરોગ્ય અને માતૃત્વ સુરક્ષા માટે અત્યંત અસરકારક છે.
મહિલા સશક્તિકરણ તરફ મહત્વનું પગલું
કેન્દ્ર અને રાજ્ય સરકારની આ પહેલથી અત્યાર સુધી મોંઘી ગણાતી HPV રસી હવે સામાન્ય અને મધ્યમવર્ગીય પરિવારોની દીકરીઓને પણ વિનામૂલ્યે ઉપલબ્ધ થશે. આ અભિયાન માત્ર આરોગ્ય સુરક્ષા જ નહીં, પરંતુ મહિલા સશક્તિકરણ અને આરોગ્યપ્રદ સમાજના નિર્માણ તરફનું મજબૂત પગલું છે.
સરકારનું લક્ષ્ય છે કે દરેક કિશોરી સમયસર રસીકરણનો લાભ લે અને ભવિષ્યમાં સર્વાઈકલ કેન્સર જેવી ગંભીર બીમારીથી સુરક્ષિત રહે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
