ગુજરાતમાં પ્રદેશ ભાજપનું નવું સંગઠન જાહેર થયા બાદ આજે અમદાવાદ સ્થિત કમલમ ખાતે તેની પ્રથમ સત્તાવાર બેઠક યોજાઈ હતી. પ્રદેશ પ્રમુખ જગદીશ વિશ્વકર્માની અધ્યક્ષતામાં યોજાયેલી આ બેઠકમાં નવા નિયુક્ત પદાધિકારીઓએ ઔપચારિક રીતે પોતાનો પદભાર સંભાળ્યો હતો. આ પ્રસંગે પ્રદેશ પ્રમુખે તમામ પદાધિકારીઓનું મોઢું મીઠું કરાવી તેમને શુભેચ્છા પાઠવી હતી.
બેઠકમાં મુખ્યમંત્રી ભૂપેન્દ્ર પટેલ ખાસ ઉપસ્થિત રહ્યા હતા અને તેમણે સંગઠનના તમામ આગેવાનોને સ્પષ્ટ સંદેશ આપ્યો હતો કે જૂની અને નવી ટીમે પરસ્પર સંકલન સાથે કામ કરવું ખૂબ જ જરૂરી છે. તેમણે ભારપૂર્વક જણાવ્યું કે દરેક હોદ્દેદારે પોતાની જવાબદારીને ગંભીરતાથી લઈને પાર્ટીને વધુ મજબૂત બનાવવા માટે કાર્ય કરવું જોઈએ.
પ્રદેશ પ્રમુખ જગદીશ વિશ્વકર્માએ પણ પદાધિકારીઓને ટકોર કરતા કહ્યું કે સંગઠનશક્તિ ભાજપની સૌથી મોટી તાકાત છે અને આ તાકાતને જાળવવા માટે શિસ્ત, સંકલન અને સમર્પણ જરૂરી છે. તેમણે જણાવ્યું કે નવી ટીમે જનતા સાથે સીધો સંપર્ક વધારવો અને સરકારની યોજનાઓને અંતિમ વ્યક્તિ સુધી પહોંચાડવાની જવાબદારી નિભાવવી પડશે.
બેઠક દરમિયાન વિવિધ મોરચાના પ્રમુખોએ પણ પોતાનો ચાર્જ સંભાળ્યો હતો. સાથે સાથે આગામી સમયમાં યોજાનારી સ્થાનિક સ્વરાજ્યની ચૂંટણીઓ અંગે વિગતવાર ચર્ચાઓ કરવામાં આવી હતી. આગેવાનોનો પરિચય, ચૂંટણી માટેનો રોડમેપ અને સંગઠનને ગ્રાસરૂટ લેવલ પર વધુ મજબૂત બનાવવાની રણનીતિ પર પણ ચર્ચા કરવામાં આવી હતી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
