બિહાર વિધાનસભા ચૂંટણીના મતદાનથી એક દિવસ પહેલાજ મુંગેર વિધાનસભા ક્ષેત્રમાં રાજકીય સમીકરણો અચાનક બદલાઈ ગયા છે. જનસૂરાજ પાર્ટીના ઉમેદવાર સંજય કુમાર સિંહએ બુધવારે અચાનક નિર્ણય લઈને ભારતીય જનતા પાર્ટી (BJP)નો હાથ પકડી લીધો છે. તેઓ NDAના ઉમેદવાર કુમાર પ્રણયની હાજરીમાં ઔપચારિક રીતે ભાજપમાં જોડાયા હતા. તેમના આ પગલાંએ માત્ર મુંગેર જ નહીં, પરંતુ સમગ્ર બિહારના રાજકીય વર્તુળોમાં ચર્ચાનો માહોલ સર્જી દીધો છે.
સંજય કુમાર સિંહે ભાજપમાં જોડાતા જણાવ્યું કે, “હું રાષ્ટ્રવાદ અને વિકાસના મુદ્દાઓ પર વિશ્વાસ રાખું છું. NDAની સરકારોએ છેલ્લા કેટલાંક વર્ષોમાં જે કામ કર્યું છે તે જનહિતમાં છે. આ જ વિચારધારાને આગળ ધપાવવા માટે મેં ભાજપમાં જોડાવાનો નિર્ણય કર્યો છે.” સાથે જ તેમણે મુંગેરના NDA ઉમેદવાર કુમાર પ્રણયને ખુલ્લું સમર્થન આપવાની જાહેરાત પણ કરી છે.
ભાજપના ઉમેદવાર કુમાર પ્રણયએ સંજય કુમાર સિંહનું સ્વાગત કરતા કહ્યું કે, “તેમના જોડાવાથી ભાજપનું સંગઠન વધુ મજબૂત બનશે અને મુંગેરમાં NDAનો વિજય હવે નિશ્ચિત છે.” તેમણે ઉમેર્યું કે સંજય સિંહ જેવા અનુભવી નેતા અને ક્ષેત્રમાં લોકપ્રિય ચહેરાના જોડાવાથી મતદાતાઓમાં NDA પ્રત્યેનો વિશ્વાસ વધશે.
આ પગલાંથી મુંગેરના રાજકીય સમીકરણોમાં નોંધપાત્ર ફેરફાર થવાની સંભાવના વ્યક્ત કરવામાં આવી રહી છે. કારણ કે સંજય કુમાર સિંહનો સ્થાનિક સ્તરે મજબૂત આધાર છે અને તેઓ છેલ્લા કેટલાંક વર્ષોથી વિસ્તારના સામાજિક તથા રાજકીય ક્ષેત્રમાં સક્રિય રહ્યા છે. તેમનું જનસૂરાજ પાર્ટી છોડીને ભાજપમાં જોડાવું NDA માટે મોટો ફાયદો સાબિત થઈ શકે છે, ખાસ કરીને મતદાનના એક દિવસ પહેલાં આ પગલું પડવાથી.
રાજકીય વિશ્લેષકોના જણાવ્યા અનુસાર, આ પક્ષપલટાથી મુંગેરમાં NDAને સીધો લાભ થઈ શકે છે, જ્યારે વિરોધી ગઠબંધન માટે આ એક ઝટકો છે. હવે જોવું એ રહ્યું કે મતદાતાઓ આ નવી રાજકીય ચાલને કેવી રીતે સ્વીકારશે અને તેના પરિણામો ચૂંટણીમાં કેવી રીતે દેખાશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
