મધ્યપ્રદેશના જબલપુર જિલ્લામાં ગુરુવારે રાત્રે બે સમુદાયો વચ્ચે થયેલી હિંસક અથડામણથી તણાવપૂર્ણ સ્થિતિ સર્જાઈ હતી. જિલ્લાના સિહોરા તાલુકાના આઝાદ ચોક વિસ્તારમાં આવેલ દુર્ગા મંદિર અને મસ્જિદ સામસામે હોવાને કારણે ધાર્મિક વિધિઓ દરમિયાન થયેલી સામાન્ય બોલાચાલીએ ઉગ્ર સ્વરૂપ ધારણ કર્યું હતું. રાત્રે આશરે નવ વાગ્યાના સુમારે જ્યારે મંદિરમાં આરતી ચાલી રહી હતી અને મસ્જિદમાં નમાજ માટે લોકો એકત્રિત થયા હતા, ત્યારે કોઈ મુદ્દે બંને પક્ષના યુવકો વચ્ચે વાદવિવાદ થયો હતો. વિવાદ ત્યારે વધુ ભડક્યો જ્યારે મંદિરની રક્ષણાત્મક ગ્રીલને નુકસાન પહોંચાડવાનો પ્રયાસ થયો હોવાનું કહેવાય છે, જેના કારણે એક પક્ષમાં ભારે રોષ ફાટી નીકળ્યો અને પરિસ્થિતિ ઝડપથી બેકાબૂ બની ગઈ.
#WATCH | Jabalpur, Madhya Pradesh: SP, Jabalpur Sampat Upadhyay says, "… An incident of stone pelting occured in Azad chowk… Police reached the spot and controlled the crowd… More than 15 people have been arrested… " (19.02) pic.twitter.com/veqFRHGcL7
— ANI (@ANI) February 20, 2026
જોતજોતામાં બોલાચાલી મારામારી અને પથ્થરમારમાં ફેરવાઈ ગઈ હતી. અંદાજે દસ મિનિટ સુધી વિસ્તારમાં અફરાતફરીનો માહોલ રહ્યો હતો અને પથ્થરમારાને કારણે નાસભાગ મચી ગઈ હતી. કેટલાક લોકો ઈજાગ્રસ્ત થયા હોવાના અહેવાલ મળ્યા છે. પરિસ્થિતિ કાબૂમાં લેવા પોલીસે તાત્કાલિક કાર્યવાહી હાથ ધરી, હળવો લાઠીચાર્જ કર્યો અને ટીયર ગેસના શેલ છોડીને તોફાની ટોળાને વિખેર્યું હતું. હાલ સુધીમાં આ મામલે 15થી વધુ લોકોની ધરપકડ કરવામાં આવી છે.
ઘટનાની ગંભીરતા જોતા કલેક્ટર રાઘવેન્દ્ર સિંહ અને પોલીસ અધિક્ષક સંપત ઉપાધ્યાય તાત્કાલિક ઘટનાસ્થળે પહોંચી પરિસ્થિતિની સમીક્ષા કરી હતી. જબલપુર શહેરમાંથી વધારાનું પોલીસ બળ બોલાવી સમગ્ર વિસ્તારમાં કડક બંદોબસ્ત ગોઠવવામાં આવ્યો છે. પોલીસ અધિકારીઓએ જણાવ્યું છે કે કોઈ પણ ધાર્મિક સ્થળને મોટું નુકસાન થયું નથી અને હાલ પરિસ્થિતિ સંપૂર્ણપણે નિયંત્રણમાં છે. તંત્ર દ્વારા લોકોને અફવાઓથી દૂર રહેવા અને શાંતિ જાળવવાની અપીલ કરવામાં આવી છે.
ઉલ્લેખનીય છે કે સિહોરાનો આ વિસ્તાર અગાઉથી જ સંવેદનશીલ ગણાય છે અને અહીં અવારનવાર જૂથ અથડામણોની ઘટનાઓ સામે આવતી રહી છે. હાલ સમગ્ર શહેરમાં પોલીસ પેટ્રોલિંગ વધારી દેવામાં આવ્યું છે, મોડી રાત સુધી ખુલ્લી રહેતી દુકાનો બંધ કરાવી દેવામાં આવી છે અને સુરક્ષા દળો સતત નજર રાખી રહ્યા છે જેથી કોઈ અનિચ્છનીય ઘટના ફરી ન બને.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
