ગોવાના ચર્ચિત નાઈટ ક્લબ અગ્નિકાંડ કેસમાં પોલીસ તપાસ સતત ઝડપી ગતિએ આગળ વધી રહી છે. લૂથરા બ્રધર્સની અગાઉની પોલીસ કસ્ટડી પૂર્ણ થયા બાદ તેમને માપુસા મેજિસ્ટ્રેટ કોર્ટમાં રજૂ કરવામાં આવ્યા હતા, જ્યાં સુનાવણી દરમિયાન પોલીસે વધુ 7 દિવસની પોલીસ કસ્ટડીની માંગ કરી હતી. જોકે, કોર્ટે તમામ દલીલો પર વિચાર કર્યા બાદ લૂથરા બ્રધર્સને માત્ર 4 દિવસના પોલીસ રિમાન્ડ પર મોકલવાનો આદેશ આપ્યો છે.
પોલીસનું કહેવું છે કે લૂથરા બ્રધર્સ સાથે જોડાયેલા કેટલાક મહત્વપૂર્ણ દસ્તાવેજોની તપાસ હજુ બાકી છે અને આ દસ્તાવેજોના આધારે કેસમાં બનાવટી દસ્તાવેજો અને ફ્રોડ સંબંધિત કલમો પણ ઉમેરવામાં આવી શકે છે. આ ઉપરાંત નાઈટ ક્લબના ત્રીજા પાર્ટનર અજય ગુપ્તાને કોર્ટે 14 દિવસની ન્યાયિક કસ્ટડીમાં મોકલી દીધા છે. પોલીસએ કોર્ટને જાણ કરી હતી કે સમગ્ર કેસની તપાસ બનાવટી દસ્તાવેજો અને ગેરકાયદે લેવડદેવડના એંગલથી પણ કરવામાં આવી રહી છે.
આ ભીષણ આગની ઘટના સાથે જોડાયેલા અન્ય એક મુખ્ય આરોપી અને બ્રિટિશ નાગરિક સુરિન્દ્ર કુમાર ખોસલાની વિરુદ્ધ પણ કાર્યવાહી તેજ બની છે. પોલીસે સેન્ટ્રલ એજન્સીઓના માધ્યમથી ખોસલાની સામે બ્લુ કોર્નર નોટિસ જાહેર કરવાની પ્રક્રિયા શરૂ કરી દીધી છે. પોલીસ અધિકારીઓ મુજબ ઘટના સમયે ખોસલા ગોવામાં હાજર હતો, પરંતુ આશંકા છે કે તે 7 ડિસેમ્બરે યૂનાઈટેડ કિંગડમ ભાગી ગયો હતો. તેને ભારત પરત લાવવા માટે જરૂરી તમામ આંતરરાષ્ટ્રીય કાનૂની પ્રક્રિયા શરૂ કરી દેવામાં આવી છે અને સેન્ટ્રલ એજન્સીઓ સાથે સંકલન કરીને તમામ ઔપચારિકતાઓ પૂર્ણ કરવામાં આવી રહી છે.
તપાસમાં સામે આવ્યું છે કે અરપોરા સ્થિત ‘બર્ચ બાય રોમિયો લેન’ નાઈટ ક્લબના માલિકોમાંથી એક ખોસલા છે અને જે જમીન પર નાઈટ ક્લબ બનાવાયો હતો તે જમીન ખોસલાને લીઝ પર આપવામાં આવી હતી, જેને લઈને જમીનના મૂળ માલિક પ્રદીપ ઘાડી અમોનકર સાથે કાનૂની વિવાદ પણ ચાલી રહ્યો છે. આ આગની દુર્ઘટનામાં કુલ 25 લોકોના મોત થયા હતા અને આ મામલે પોલીસ અત્યાર સુધી 8 આરોપીઓની ધરપકડ કરી ચૂકી છે, જેમાં નાઈટ ક્લબના માલિક સૌરભ લૂથરા, ગૌરવ લૂથરા, અજય ગુપ્તા અને અન્ય પાંચ આરોપીઓનો સમાવેશ થાય છે. પોલીસનું કહેવું છે કે પૂછપરછ અને દસ્તાવેજોની વધુ તપાસ બાદ આ કેસમાં હજી અનેક મોટા ખુલાસા થવાની શક્યતા છે અને હાલ સમગ્ર મામલાની ઊંડાણપૂર્વક તપાસ ચાલુ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
