ગુજરાતના વિકાસ અને ભવિષ્યની યોજનાઓ માટે અત્યંત મહત્વપૂર્ણ એવા નિર્ણય અંતર્ગત રાજ્યમાં આજથી સત્તાવાર રીતે વસ્તી ગણતરી (Census)નો પ્રારંભ થઈ ગયો છે. આ વખતની ગણતરી અનેક રીતે ઐતિહાસિક છે, કારણ કે ભારતના ઇતિહાસમાં પ્રથમવાર સમગ્ર પ્રક્રિયા સંપૂર્ણપણે પેપરલેસ અને ડિજિટલ માધ્યમથી હાથ ધરવામાં આવી રહી છે.
આ પ્રાથમિક તબક્કો આજથી શરૂ થઈને 30 જૂન સુધી રાજ્યભરમાં સક્રિય રહેશે. આ દરમિયાન રાજ્યના તમામ ઘરો અને મકાનોની યાદી તૈયાર કરવામાં આવશે તેમજ તેમની વિગતવાર માહિતી એકત્રિત કરવામાં આવશે.
વહીવટી તંત્ર દ્વારા આ પ્રક્રિયાને વધુ સચોટ બનાવવા માટે કુલ 33 મહત્વના મુદ્દાઓ નક્કી કરવામાં આવ્યા છે, જેના આધારે નાગરિકો પાસેથી માહિતી લેવામાં આવશે.
આ મહત્ત્વાકાંક્ષી કાર્યને સફળ બનાવવા માટે ગુજરાતભરમાં 1.09 લાખથી વધુ તાલીમબદ્ધ ગણતરીદારો અને સુપરવાઈઝરોને મેદાનમાં ઉતારવામાં આવ્યા છે.
ડિજિટલ ઇન્ડિયાના આ યુગમાં નાગરિકોને ઓનલાઈન Self-Enumeration નો વિકલ્પ પણ આપવામાં આવ્યો છે. અત્યાર સુધીમાં ગુજરાતના 3.74 લાખથી વધુ લોકોએ પોર્ટલ પર પોતાની માહિતી સ્વયં નોંધાવી દીધી છે.
અધિકારીઓના જણાવ્યા મુજબ, જૂન મહિનામાં મુખ્યત્વે મકાનોની યાદી અને વિગતો અદ્યતન કરવાની પ્રક્રિયા થશે, જ્યારે નાગરિકોની મુખ્ય વસ્તી ગણતરી ફેબ્રુઆરી 2027માં દેશવ્યાપી સ્તરે હાથ ધરાશે.
સરકાર દ્વારા તમામ નાગરિકોને આ રાષ્ટ્રીય કાર્યમાં સહકાર આપવા અને ગણતરીદારોને સચોટ માહિતી આપવા અપીલ કરવામાં આવી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
