દક્ષિણ અમેરિકાના દેશ બોલિવિયામાં શુક્રવારે (27 ફેબ્રુઆરી) સાંજે એક ભયાનક વિમાન દુર્ઘટના સર્જાઈ હતી. અલ અલ્ટો શહેરમાં બોલિવિયન એરફોર્સનું હર્ક્યુલસ C-130 કાર્ગો વિમાન રનવે પરથી લપસીને વ્યસ્ત રોડ પર ખાબક્યું હતું. આ ભયાનક અકસ્માતમાં ઓછામાં ઓછા 15 લોકોનાં મોત થયા છે જ્યારે 30થી વધુ લોકો ગંભીર રીતે ઘાયલ થયા હોવાનું સ્થાનિક મીડિયાના અહેવાલોમાં જણાવાયું છે.
લા પાઝ નજીક સાંજે સર્જાયો અકસ્માત
આ દુર્ઘટના સ્થાનિક સમય મુજબ સાંજે લગભગ 6 વાગ્યે લા પાઝ નજીક આવેલા અલ અલ્ટો વિસ્તારમાં બની હતી. માહિતી અનુસાર વિમાન સાન્ટા ક્રુઝ શહેરમાંથી આવી રહ્યું હતું. ઉતરાણ દરમિયાન ભારે કરા અને વીજળીવાળા ખરાબ હવામાનને કારણે વિમાન રનવે પરથી લપસી ગયું અને નજીકના વ્યસ્ત કોસ્ટેનેરા એવન્યુ રોડ પર જઈને તૂટી પડ્યું.
રસ્તા પરના વાહનો સાથે ભયાનક અથડામણ
વિમાન રોડ પર પડતાં જ ત્યાંથી પસાર થતા લગભગ 12થી 15 જેટલા વાહનો સાથે તેની જોરદાર અથડામણ થઈ હતી. આ અકસ્માતમાં અનેક કાર અને ટ્રકનો કચ્ચરઘાણ વળી ગયો હતો. ઘટનાસ્થળે ભારે અફરાતફરીનો માહોલ સર્જાયો હતો. પ્રાથમિક માહિતી મુજબ મૃત્યુ પામનારામાં વિમાનમાં સવાર લોકો તેમજ રસ્તા પરના વાહનોમાં રહેલા નાગરિકોનો પણ સમાવેશ થાય છે.
નોટોથી ભરેલું કાર્ગો વિમાન
અહેવાલો મુજબ આ કાર્ગો વિમાનમાં સેન્ટ્રલ બેંક ઑફ બોલિવિયા દ્વારા છપાયેલી નવી કરન્સી નોટોનો મોટો જથ્થો લઈ જવામાં આવી રહ્યો હતો. વિમાન ક્રેશ થતા જ લાખોની સંખ્યામાં નોટો રસ્તા પર વેરવિખેર થઈ ગઈ હતી.
લોકો પૈસા વીણવા દોડી આવ્યા
અકસાન બાદ બચાવ કામગીરી શરૂ થાય તે પહેલાં જ સેંકડો સ્થાનિક લોકો રસ્તા પર પડેલી નોટો વીણવા માટે દોડી આવ્યા હતા. પરિસ્થિતિ કાબૂ બહાર જતાં સુરક્ષાદળોએ ભીડને નિયંત્રણમાં લેવા માટે વોટર કેનન અને ટીયર ગેસનો ઉપયોગ કર્યો હતો.
સેન્ટ્રલ બેંક ઑફ બોલિવિયાએ સ્પષ્ટતા કરી છે કે આ નોટો હજી સત્તાવાર રીતે ચલણમાં મૂકવામાં આવી નહોતી, તેથી તેની કોઈ કિંમત નથી. બેંકે લોકોને ચેતવણી આપી છે કે આ નોટો ઉઠાવવી કે તેનો ઉપયોગ કરવાનો પ્રયાસ કરવો કાયદેસર ગુનો ગણાશે.
15 લોકોનાં મોત, અનેક ઘાયલ
ફાયર વિભાગના વડા કર્નલ પાવેલ ટોવરે જણાવ્યું કે આ દુર્ઘટનામાં અત્યાર સુધી 15 લોકોનાં મોતની પુષ્ટિ થઈ છે જ્યારે 30થી વધુ લોકો ઘાયલ થયા છે. તમામ ઘાયલોને નજીકની હોસ્પિટલોમાં સારવાર માટે ખસેડવામાં આવ્યા છે, જેમાંથી કેટલાકની હાલત ગંભીર હોવાનું કહેવામાં આવે છે.
આ અકસ્માત બાદ સુરક્ષાના કારણોસર અલ અલ્ટો ઇન્ટરનેશનલ એરપોર્ટને અસ્થાયી રીતે બંધ કરી દેવામાં આવ્યું હતું. બોલિવિયાના સંરક્ષણ મંત્રાલયે સમગ્ર ઘટનાની ઉચ્ચસ્તરીય તપાસના આદેશ આપ્યા છે. પ્રાથમિક તપાસમાં ખરાબ હવામાન આ અકસ્માતનું મુખ્ય કારણ હોવાનું માનવામાં આવી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
