વડાપ્રધાન નરેન્દ્ર મોદીએ મંગળવારે જોર્ડનમાં યોજાયેલા ભારત-જોર્ડન બિઝનેસ ફોરમને સંબોધતા જોર્ડનના વેપારી સમુદાયને ભારતામાં રોકાણ કરવા માટે ખુલ્લું અને ભારપૂર્વકનું આમંત્રણ આપ્યું હતું. પીએમ મોદીએ ભારતને 8 ટકાથી વધુ દરે વિકાસ કરતી ઝડપી અર્થવ્યવસ્થા તરીકે વર્ણવી અને કહ્યું કે ભારત આજે વૈશ્વિક રોકાણકારો માટે ઉત્તમ વળતર આપતી વિશ્વસનીય બજાર બની ગયું છે. તેમણે જણાવ્યું કે ભારત ઝડપી ગતિએ આગળ વધી રહ્યું છે અને ટૂંક સમયમાં વિશ્વની ત્રીજી સૌથી મોટી અર્થવ્યવસ્થા બનવા તરફ આગળ વધી રહ્યું છે. આવી સ્થિતિમાં જોર્ડનની કંપનીઓ માટે ભારતની વિકાસ યાત્રામાં ભાગીદાર બનવાની આ એક સુવર્ણ તક છે.
પીએમ મોદીએ સ્પષ્ટ કર્યું કે તેમની જોર્ડન મુલાકાત માત્ર વેપાર અથવા રોકાણ સુધી સીમિત નથી, પરંતુ તેનો મુખ્ય ઉદ્દેશ્ય ભારત અને જોર્ડન વચ્ચે લાંબા ગાળાના, મજબૂત અને વિશ્વાસ પર આધારિત દ્વિપક્ષીય સંબંધોને વધુ ઘનિષ્ઠ બનાવવાનો છે. તેમણે જણાવ્યું કે ભારતની ઊંચી GDP વૃદ્ધિ ઉત્પાદકતા આધારિત શાસન, સુધારેલી નીતિઓ અને નવીનતા આધારિત વિકાસ મોડલનું પરિણામ છે. ભારત અને જોર્ડન વચ્ચેના સંબંધો ઐતિહાસિક વિશ્વાસ અને ભવિષ્યની આર્થિક સંભાવનાઓનું સુંદર સંગમ છે, એમ તેમણે કહ્યું.
રોકાણના મુદ્દે વાત કરતાં પીએમ મોદીએ જોર્ડનની કંપનીઓને ખાતરી આપી કે ભારતનો ઝડપી આર્થિક વિકાસ તેમના માટે નવી તકો ખોલી રહ્યો છે, જેનાથી તેઓ તેમના રોકાણ પર સારો અને સ્થિર વળતર મેળવી શકે છે. તેમણે દ્વિપક્ષીય સહયોગ માટે ચોક્કસ ક્ષેત્રોનું સૂચન પણ કર્યું. પીએમ મોદીએ જણાવ્યું કે ભારતીય કંપનીઓ જોર્ડનમાં દવાઓ અને તબીબી ઉપકરણોનું ઉત્પાદન કરી શકે છે. આથી માત્ર જોર્ડનના નાગરિકોને ગુણવત્તાયુક્ત અને સસ્તી આરોગ્યસેવા મળશે એવું જ નહીં, પરંતુ જોર્ડન પશ્ચિમ એશિયા અને આફ્રિકા માટે એક વિશ્વસનીય ઉત્પાદન અને સપ્લાય હબ તરીકે પણ વિકસી શકે છે.
કૃષિ ક્ષેત્રમાં સહયોગ અંગે પણ પીએમ મોદીએ વિશેષ ભાર મૂક્યો. તેમણે જણાવ્યું કે ભારત પાસે શુષ્ક અને અર્ધ-શુષ્ક પ્રદેશોમાં ખેતીનો વ્યાપક અને સફળ અનુભવ છે, જે જોર્ડન માટે ખૂબ ઉપયોગી સાબિત થઈ શકે છે. આ ક્ષેત્રમાં બંને દેશો સાથે મળીને પ્રિસિઝન ફાર્મિંગ, માઇક્રો ઈરિગેશન, કોલ્ડ ચેન, ફૂડ પાર્ક અને સ્ટોરેજ ઈન્ફ્રાસ્ટ્રક્ચર જેવા ક્ષેત્રોમાં કામ કરી શકે છે. આ સહયોગથી જોર્ડનની કૃષિ ઉત્પાદકતા વધશે અને ખાદ્ય સુરક્ષા વધુ મજબૂત બનશે.
ઉલ્લેખનીય છે કે વડાપ્રધાન નરેન્દ્ર મોદી સોમવારે જોર્ડનના રાજા અબ્દુલ્લા દ્વિતીયના આમંત્રણ પર જોર્ડનની રાજધાની અમ્માન પહોંચ્યા હતા. તેમની આ મુલાકાત ચાર દિવસના ત્રણ દેશોના પ્રવાસનો પ્રથમ તબક્કો છે. જોર્ડન બાદ પીએમ મોદી ઇથોપિયા અને ઓમાનની મુલાકાત લેશે, જ્યાં તેઓ દ્વિપક્ષીય સહયોગ, વેપાર, રોકાણ અને પ્રાદેશિક મુદ્દાઓ પર ચર્ચા કરશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
