મેક્સિકોની સેનાએ દેશના સૌથી શક્તિશાળી ડ્રગ માફિયા અને અમેરિકામાં મોસ્ટ વોન્ટેડ અપરાધી Nemesio Oseguera Cervantesને વિશેષ સૈન્ય ઓપરેશન દરમિયાન ઠાર માર્યો હોવાનો દાવો કરવામાં આવ્યો છે. ઓસેગુએરા ‘અલ મેંચો’ તરીકે જાણીતા હતા અને તેઓ Jalisco New Generation Cartel (CJNG)ના વડા હતા. મેક્સિકો સરકાર માટે આ મોટું સફળ ઓપરેશન ગણાઈ રહ્યું છે, પરંતુ તેમની મોતની ખબર જાહેર થતા જ દેશના અનેક રાજ્યોમાં હિંસા, આગજની અને ગોળીબારની ઘટનાઓ સામે આવી છે.
હિંસક પ્રતિક્રિયા: દુકાનો, બસો અને ઈમારતોને નિશાન
અલ મેંચોના સમર્થકોએ વિવિધ શહેરોમાં રિટેલ શોપ, જાહેર પરિવહન સેવાઓના વાહનો અને સરકારી-ખાનગી ઈમારતોમાં આગજની કરી હતી. અનેક વિસ્તારોમાં ગોળીબારની ઘટનાઓ નોંધાઈ છે, જેના કારણે લોકોમાં ભયનો માહોલ સર્જાયો છે. કેટલાક શહેરોમાં શાળા-કોલેજો બંધ રાખવામાં આવ્યા છે અને સુરક્ષા દળોને તૈનાત કરીને પરિસ્થિતિ કાબૂમાં લેવા પ્રયત્નો ચાલી રહ્યા છે.
કોણ હતો અલ મેંચો?
60 વર્ષીય Nemesio Oseguera Cervantes છેલ્લા ત્રણ દાયકાથી સંગઠિત ગુનાખોરીમાં સક્રિય હતા. શરૂઆતમાં તેઓ પોલીસ વિભાગમાં કાર્યરત હતા, પરંતુ 1990ના દાયકામાં તેઓ માદક પદાર્થોની દાણચોરીમાં પ્રવેશ્યા. 1994માં અમેરિકામાં હેરોઈનની દાણચોરીના કેસમાં તેમને ત્રણ વર્ષની સજા થઈ હતી. જેલમાંથી બહાર આવ્યા બાદ તેઓ મેક્સિકો પરત ફર્યા અને ઝડપથી પોતાના ડ્રગ નેટવર્કને મજબૂત બનાવ્યું.
અહેવાલો મુજબ તેમનું નેટવર્ક અમેરિકાના 50 રાજ્યો સુધી ફેલાયેલું હતું. તેઓ કોકીન, મેથામ્ફેટામાઇન અને ફેન્ટેનિલ જેવા ઘાતક નશીલા પદાર્થોની હેરાફેરીમાં સંકળાયેલા હતા.
CJNG: સૌથી ખતરનાક અને ઝડપથી ફેલાતું કાર્ટેલ
અલ મેંચોએ 2009માં CJNGની સ્થાપના કરી હતી. આ ગેંગ હાલમાં મેક્સિકોની સૌથી ઝડપથી વિકસતી અને ખતરનાક ડ્રગ કાર્ટેલમાંની એક ગણાય છે. સંગઠન પર ગેરકાયદે ઇમિગ્રેશન નેટવર્ક, હથિયારોની તસ્કરી અને અદ્યતન હિંસક પદ્ધતિઓનો ઉપયોગ કરવાનો આરોપ છે.
CJNGએ હિંસા માટે ડ્રોન અને IED (Improvised Explosive Device) જેવા આધુનિક હથિયારોનો ઉપયોગ શરૂ કરીને ડ્રગ વોરને વધુ ઘાતક બનાવ્યો હતો.
ભારતીય નાગરિકો માટે દૂતાવાસની એડવાઈઝરી
હિંસક પરિસ્થિતિને ધ્યાનમાં રાખીને Embassy of India, Mexico Cityએ મેક્સિકોમાં રહેતા ભારતીય નાગરિકોને સાવધ રહેવાની સલાહ આપી છે. દૂતાવાસે વિનાકારણ બહાર ન નીકળવા, ભીડવાળા વિસ્તારોમાંથી દૂર રહેવા અને સ્થાનિક સત્તાવાળાઓની સૂચનાઓનું પાલન કરવાની અપીલ કરી છે.
ભારતીયોને કોઈપણ અપડેટ માટે સ્થાનિક મીડિયા અને સત્તાવાર જાહેરાતો પર નજર રાખવા સૂચવાયું છે.
અલ મેંચોના મોતને મેક્સિકોના ડ્રગ વોરમાં ઐતિહાસિક ઘટના માનવામાં આવી રહી છે. જોકે નિષ્ણાતો ચેતવણી આપે છે કે કાર્ટેલની અંદર નેતૃત્વ માટેની લડાઈ અને બદલો લેવા માટેની હિંસા આગામી દિવસોમાં વધુ ઉગ્ર બની શકે છે. હાલ મેક્સિકોમાં સુરક્ષા તંત્ર હાઈ અલર્ટ પર છે અને પરિસ્થિતિ ઉપર સતત નજર રાખી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
