ઝારખંડની રાજધાની રાંચીથી દિલ્હી જતી ‘રેડબર્ડ એરવેઝ’ની એર એમ્બ્યુલન્સ દુર્ઘટનાગ્રસ્ત થતાં મોટી જાનહાનિ થઈ છે. ટેકઑફ કર્યા બાદ થોડા જ સમયમાં વિમાન રડાર પરથી ગાયબ થઈ ગયું હતું. બાદમાં માહિતી મળી કે વિમાન ઝારખંડના ચતરા જિલ્લામાં જંગલ વિસ્તારમાં ક્રેશ થયું છે. આ ભયાનક દુર્ઘટનામાં પાયલટ, દર્દી અને તબીબી સ્ટાફ સહિત કુલ 7 લોકોનાં મોત નિપજ્યા છે.
ટેકઑફ પછી 23 મિનિટમાં સંપર્ક તૂટી ગયો
અહેવાલ મુજબ બીચક્રાફ્ટ C90 મોડલના આ એર એમ્બ્યુલન્સ વિમાને રાંચીના Birsa Munda Airportથી સાંજે 7:11 વાગ્યે દિલ્હી માટે ઉડાન ભરી હતી. ટેકઑફ પછી વિમાને કોલકાતા એર ટ્રાફિક કંટ્રોલ (ATC) સાથે સંપર્ક સ્થાપિત કર્યો હતો.
સાંજે 7:34 વાગ્યે ક્રૂ મેમ્બર્સે હવામાનની પ્રતિકૂળ પરિસ્થિતિને કારણે રૂટ ડેવિએશનની વિનંતી કરી હતી. પરંતુ ટેકઑફના આશરે 23 મિનિટ બાદ વિમાનનો ATC સાથે સંપર્ક તૂટી ગયો અને તે રડાર પરથી ગાયબ થઈ ગયું.
પછી જાણવા મળ્યું કે વિમાન ચતરા જિલ્લાના સિમારિયા બ્લોક હેઠળ આવેલા કસારિયા પંચાયત અને બરિયાતુ વિસ્તારના જંગલ વિસ્તારમાં ક્રેશ થયું.
દુર્ગમ વિસ્તારમાં રેસ્ક્યુ ઓપરેશન
વિમાન દુર્ગમ જંગલ વિસ્તારમાં ક્રેશ થતા સ્થાનિક વહીવટીતંત્રે તાત્કાલિક રાજ્ય સરકારને જાણ કરી અને બચાવ કામગીરી શરૂ કરી હતી. પરંતુ ઘટનાસ્થળે પહોંચતા જ જાણવા મળ્યું કે વિમાનમાં સવાર તમામ 7 લોકોનાં ઘટનાસ્થળે જ મોત થઈ ચૂક્યાં હતાં.
મૃતકોમાં કોણ-કોણ?
વિમાનમાં કુલ 7 લોકો સવાર હતા, જેમાં બે ક્રૂ મેમ્બર (પાયલટ્સ) અને પાંચ અન્ય લોકોનો સમાવેશ થાય છે. મૃતકોમાં નીચેના નામો સામેલ છે:
- કેપ્ટન વિવેક વિકાસ ભગત (પાયલટ)
- કેપ્ટન સવરજદીપ સિંઘ (સહ-પાયલટ)
- સંજય કુમાર (દર્દી)
- ડૉ. વિકાસ કુમાર ગુપ્તા
- સચિન કુમાર મિશ્રા
- અર્ચના દેવી
- ધુરુ કુમાર
આ દુર્ઘટનાએ સમગ્ર વિસ્તારમાં શોકની લાગણી ફેલાવી છે.
DGCA અને AAIB કરશે ઉચ્ચ સ્તરીય તપાસ
ઘટના બાદ Council of Indian Aviationએ દુઃખ વ્યક્ત કરીને મૃતકોના પરિવારો પ્રત્યે સંવેદના વ્યક્ત કરી છે. રાજ્ય સરકાર પણ સમગ્ર મામલે નજર રાખી રહી છે.
આ મામલે Directorate General of Civil Aviation (DGCA) અને Aircraft Accident Investigation Bureau (AAIB) દ્વારા ઉચ્ચ સ્તરીય તપાસના આદેશ આપવામાં આવ્યા છે. વિમાન કયા કારણોસર ક્રેશ થયું, તેમાં ટેકનિકલ ખામી હતી કે હવામાનની પ્રતિકૂળતા જવાબદાર હતી તે બાબત બ્લેક બોક્સ અને ટેકનિકલ ડેટાની તપાસ બાદ જ સ્પષ્ટ થશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
