સોશિયલ મીડિયા પર હાલ 80ના દાયકાનો રેટ્રો AI ફોટો ટ્રેન્ડ જોરદાર વાયરલ થઈ રહ્યો છે. સામાન્ય યુઝર્સથી લઈને બોલિવૂડ સેલેબ્રિટીઝ સુધી અનેક લોકો પોતાની તસવીરોને આર્ટિફિશિયલ ઇન્ટેલિજન્સ (AI)ની મદદથી 1980ના દાયકાની ફિલ્મી અને ફેશન સ્ટાઈલમાં બદલીને શેર કરી રહ્યા છે. કિયારા અડવાણી, સિદ્ધાર્થ મલ્હોત્રા, પરિણીતી ચોપરા, રાઘવ ચઢ્ઢા, રવિ કિશન, શ્રુતિ હાસન, તાહિરા કશ્યપ, રિદ્ધિમા કપૂર સાહની અને ડેઝી શાહ સહિત અનેક જાણીતા ચહેરાઓ આ ટ્રેન્ડમાં જોડાયા છે.
રંગીન આઉટફિટ, મોટા વાળ, ડેનિમ, એવિએટર સનગ્લાસ, હૂપ ઇયરિંગ્સ, બૂમબોક્સ અને વિન્ટેજ ફિલ્મી બેકગ્રાઉન્ડ જેવી વિગતો સાથે તૈયાર થતી આ AI તસવીરો સોશિયલ મીડિયા યુઝર્સને 80ના દાયકાની યાદ અપાવી રહી છે.
સિદ્ધાર્થ-કિયારાનો રેટ્રો લુક વાયરલ
કિયારા અડવાણીએ ઇન્સ્ટાગ્રામ સ્ટોરી પર પતિ સિદ્ધાર્થ મલ્હોત્રા સાથે AI દ્વારા બનાવેલી રેટ્રો તસવીર શેર કરી હતી. તસવીરમાં બંને 1980ના દાયકાના સ્ટાઈલિશ બોલિવૂડ કપલના અંદાજમાં જોવા મળ્યા.
સિદ્ધાર્થ ડબલ-ડેનિમ લુક અને ડાર્ક એવિએટર સનગ્લાસમાં જોવા મળ્યો હતો. બીજી તરફ કિયારાએ 80ના દાયકાની રંગીન ફેશન અપનાવી હતી. તે પફ સ્લીવ્સવાળા પિંક આઉટફિટ, મોટી હૂપ ઇયરિંગ્સ અને બંગડીઓ સાથે રેટ્રો અવતારમાં જોવા મળી.
કિયારાએ આ તસવીર સાથે સિદ્ધાર્થની આગામી ફિલ્મ ‘ધ વ્વાન’ના રોમેન્ટિક ટ્રેક ‘સમજો ના’ને પણ જોડ્યો હતો.
પરિણીતી ચોપરા અને રાઘવ ચઢ્ઢા પણ બન્યા રેટ્રો કપલ
પરિણીતી ચોપરાએ પણ પતિ રાઘવ ચઢ્ઢા સાથે વિન્ટેજ સ્ટાઈલમાં તૈયાર કરેલી અનેક AI તસવીરો સોશિયલ મીડિયા પર શેર કરી હતી. બંનેનો લુક જૂના દાયકાની ફિલ્મોના કપલ જેવી ફીલ આપતો જોવા મળ્યો.
બોલિવૂડ સેલેબ્સ દ્વારા આ ટ્રેન્ડમાં ભાગ લેવામાં આવ્યા બાદ સામાન્ય યુઝર્સમાં પણ 80s AI Retro Look પ્રત્યે રસ વધુ વધ્યો છે.
અમીષા પટેલનો નિયોન રેટ્રો અવતાર
અમીષા પટેલ પણ 80ના દાયકાના ફેશન ટ્રેન્ડમાં જોવા મળી. AI તસવીરમાં તેણે વન-શોલ્ડર ટોપ અને ડેનિમ શોર્ટ્સ સાથે નિયોન પિંક સ્ટાઈલ અપનાવી હતી.
લેગ વોર્મર્સ, વ્હાઇટ-પિંક સ્નીકર્સ અને મોટા બૂમબોક્સ સાથેનો તેનો લુક 1980ના દાયકાની પોપ કલ્ચરની યાદ અપાવતો હતો.
રવિ કિશન બન્યા 80s બોલિવૂડ હીરો
અભિનેતા રવિ કિશને પણ વાયરલ AI ટ્રેન્ડમાં ભાગ લીધો છે. તેમણે સોશિયલ મીડિયા પર 80ના દાયકાની શૈલીમાં તૈયાર કરેલી પોતાની AI-જનરેટેડ તસવીર શેર કરી હતી. તસવીરમાં રવિ કિશનનો લુક જૂના બોલિવૂડ ફિલ્મોના હીરો જેવો જોવા મળ્યો. તેમના ફેન્સે પણ આ નવા રેટ્રો અવતારને પસંદ કર્યો.
શ્રુતિ હાસન 1960ના દાયકાના લુકમાં
જ્યારે મોટાભાગના સેલેબ્સ 80ના દાયકાની સ્ટાઈલ અપનાવી રહ્યા હતા, ત્યારે શ્રુતિ હાસને થોડો અલગ અંદાજ પસંદ કર્યો. તે 1960ના દાયકાથી પ્રેરિત લુકમાં જોવા મળી. તસવીરમાં શ્રુતિ પ્રિન્ટેડ ટોપ, મેચિંગ હેડસ્કાર્ફ અને બ્લુ જીન્સમાં જોવા મળી હતી. તેના વિન્ટેજ લુકે સોશિયલ મીડિયા પર ખાસ ધ્યાન ખેંચ્યું.
તાહિરા કશ્યપ અને રિદ્ધિમા કપૂર પણ ટ્રેન્ડમાં જોડાયા
આયુષ્માન ખુરાનાની પત્ની અને ફિલ્મમેકર તાહિરા કશ્યપે પણ પોતાની રેટ્રો AI તસવીર સોશિયલ મીડિયા પર શેર કરી હતી.
રણબીર કપૂરની બહેન અને અભિનેત્રી રિદ્ધિમા કપૂર સાહની પણ આ ટ્રેન્ડમાં જોડાઈ હતી. તેણે 1980ના દાયકાની સ્ટાઈલમાં બનાવેલી AI તસવીરો શેર કરતાં લખ્યું હતું, “જ્યારે 80ના દાયકાએ બોલાવ્યો, ત્યારે મેં આ જ અંદાજમાં જવાબ આપ્યો.”
ડેઝી શાહનો 80s હિરોઈન લુક
ડેઝી શાહે પણ AI દ્વારા તૈયાર કરેલી તસવીરોમાં 80ના દાયકાની બોલિવૂડ અભિનેત્રી જેવી સ્ટાઈલ અપનાવી હતી. તેની હેરસ્ટાઇલ, આઉટફિટ અને આખું પ્રેઝન્ટેશન જૂના સમયની ફિલ્મી ગ્લેમરની યાદ અપાવતું હતું.
અભય વર્માએ અપનાવ્યો ડેનિમ અને કર્લી હેર લુક
અભય વર્માએ પણ 1980ના દાયકાની શૈલીને AI ફોટોઝમાં ફરી જીવંત કરી. તેણે લાંબા વાંકડિયા વાળ અને ડેનિમ આઉટફિટ સાથે પોતાની તસવીરો શેર કરી હતી. તેનો લુક 80ના દાયકાના યુવા બોલિવૂડ હીરોની સ્ટાઈલથી પ્રેરિત લાગતો હતો.
કેવી રીતે બનાવી શકાય 80ના દાયકા જેવો AI ફોટો?
80ના દાયકાથી પ્રેરિત AI ફોટો બનાવવા માટે યુઝર્સ પોતાની સ્પષ્ટ તસવીર કોઈ AI ઇમેજ જનરેશન ટૂલમાં અપલોડ કરી શકે છે. ત્યારબાદ ચહેરાની ઓળખ જાળવી રાખીને 1980ના દાયકાની ફિલ્મી અને ફેશન સ્ટાઈલમાં તસવીર બનાવવા માટે યોગ્ય સૂચના આપી શકાય છે.
વોલ્યુમિનસ હેરસ્ટાઇલ, રંગીન કપડાં, ડેનિમ જેકેટ, એવિએટર સનગ્લાસ, મોટા ઇયરિંગ્સ, વિન્ટેજ ઇન્ટિરિયર, બોલિવૂડથી પ્રેરિત બેકગ્રાઉન્ડ, વોર્મ લાઇટિંગ, ફેડેડ કલર્સ અને ફિલ્મ-ગ્રેન જેવી વિગતો ઉમેરવાથી ફોટોને વધુ અસરકારક રેટ્રો લુક મળી શકે છે.
યુઝર્સ પોતાની પસંદ મુજબ હેરસ્ટાઇલ, આઉટફિટ, પોઝ અને બેકગ્રાઉન્ડમાં ફેરફાર કરીને તસવીરને વધુ પર્સનલાઇઝ પણ કરી શકે છે.
અગાઉ પણ વાયરલ થઈ ચૂક્યા છે AI Photo Trends
AI આધારિત ફોટો ટ્રેન્ડ સોશિયલ મીડિયા માટે નવા નથી. જાન્યુઆરી 2026માં લોકો પોતાની 10 વર્ષ જૂની એટલે કે 2016ની તસવીરો શેર કરી રહ્યા હતા. અનેક બોલિવૂડ સેલેબ્સે પણ પોતાના જૂના ફોટોઝ શેર કરીને આ ટ્રેન્ડમાં ભાગ લીધો હતો.
માર્ચ 2025માં AIની મદદથી તસવીરોને એનિમેશનથી પ્રેરિત લુક આપવાનો ટ્રેન્ડ પણ સોશિયલ મીડિયા પર ખૂબ લોકપ્રિય થયો હતો. યુઝર્સ પોતાની, પરિવાર અને મિત્રોની તસવીરોને એનિમેટેડ સ્ટાઈલમાં બદલતા હતા.
આ પહેલાં વર્ષ 2019માં ‘10 Year Challenge’ પણ સોશિયલ મીડિયાનો સૌથી ચર્ચિત ફોટો ટ્રેન્ડ બન્યો હતો. તેમાં લોકો 10 વર્ષ જૂની અને વર્તમાન તસવીર સાથે શેર કરીને પોતાના લુકમાં આવેલા ફેરફાર બતાવતા હતા.
હવે 80s AI Retro Trendએ ફરી એકવાર સાબિત કર્યું છે કે ટેક્નોલોજી અને નૉસ્ટેલ્જિયાનું કોમ્બિનેશન સોશિયલ મીડિયા પર ઝડપથી લોકપ્રિય થઈ શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
