ગાંધીનગરના શાહપુર બ્રિજ નજીક આવેલી કન્સ્ટ્રકશન સાઈટની ઓરડીમાંથી રવિવારે સગીરાનો મૃતદેહ શંકાસ્પદ હાલતમાં મળી આવ્યો હતો. સગીરાને ૩૬ દિવસ પહેલા બિહારનો વિધર્મી યુવક અપહરણ કરી નસાડી ગયો હતો. સગીરાને ગંભીર હાલતમાં એકલી મૂકીને આ યુવક નાસી ગયો હતો. સગીરાની હત્યા થઈ છે કે બીમારીના પગલે મોત થયું છે તે જાણવા પોલીસે પેનલ ડોક્ટરોની ટીમ પાસે પોસ્ટમોર્ટમ કરાવ્યું છે.
સગીરાનું અપહરણ કરનારા યુવક સામે ઈન્ફોસિટી પોલીસ મથકમાં અપહરણનો ગુનો દાખલ થયો છે. પોલીસ સૂત્રો પાસેથી મળતી માહિતી મુજબ, બિહારથી ૧૭ વર્ષની સગીરા પોતાના ભાઈ-ભાભી સાથે આવી હતી અને તેઓ બોગનવેલી કન્સ્ટ્રક્શન સાઈટ પર મજૂરી કરતા હતા. તેમની સાથે બિહારનો એમડી હસન નામનો યુવાન પણ મજૂરી કામ કરતો હતો. ૩૬ દિવસ અગાઉ આ યુવક લગ્ન કરવાની લાલચ આપી જારકર્મ કરવાના ઈરાદે સગીરાનું અપહરણ કરીને ભાગી ગયો હતો.
સગીરાના ભાઈ સહિતના કુટુંબીઓએ ગાંધીનગર – બિહારમાં બંનેની શોધખોળ કરી હતી, પરંતુ બંનેનો ક્યાંય પત્તો લાગ્યો ન હતો. રવિવારે અચાનક વિધર્મી યુવાન સગીરાને ગંભીર હાલતમાં બોગનવેલી નામની કન્સ્ટ્રક્શન સાઈટ પર મૂકીને નાસી ગયો હતો. સગીરાના હાથ પર બાટલા ચડાવવાની ડ્રીપ પણ ભરાવેલી હતી. થોડા સમય બાદ ઓરડીમાંથી સગીરાની લાશ મળી આવી હતી.આ બનાવ અંગે જાણ થતાં સગીરાનાં ભાઈ ભાભી સહીતના અન્ય મજૂરો દોડી આવ્યા હતા. આ બનાવની જાણ થતાં ઈન્ફોસિટી પોલીસ ઘટનાસ્થળે દોડી ગઈ હતી. પેનલ ડોક્ટરો પાસે પોસ્ટમોર્ટમ કરાવવાની સાથે પોલીસે તપાસ હાથ ધરી છે. હાલ પોલીસે યુવક સામે અપહરણ અને પોકસો એક્ટ હેઠળ ગુનો દાખલ કર્યો છે.
