દેશની સૌથી મોટી પ્રાઈવેટ બેંક HDFC બેંકે (HDFC Bank) જૂનમાં પૂરા થયેલા ક્વાર્ટરમાં તગડો નફો કર્યો છે. આ દરમિયાન બેંકે 30 ટકાનો ચોખ્ખો નફો મેળવ્યો છે. આ ક્વાર્ટરમાં HDFC બેંકનો નફો વધીને 11,952 કરોડ રૂપિયા થઈ ગયો છે. જે અગાઉના ક્વાર્ટરમાં રૂ. 9,196 કરોડ હતો.
HDFC બેંકના નફામાં માત્ર રેકોર્ડ વધારો જોવા મળી રહ્યો નથી. તેના બદલે HDFC અને HDFC બેંકના મર્જર પછી તે વિશ્વની સાતમી સૌથી મોટી બેંક બની ગઈ છે. HDFC બેંકના પરિણામોમાં બેંકની ચોખ્ખી વ્યાજની આવકમાં પણ મોટો વધારો નોંધવામાં આવ્યો છે. આ સમયગાળા દરમિયાન બેંકની ચોખ્ખી વ્યાજ આવક 21.1 ટકા વધીને રૂ. 23,599 કરોડને પાર કરી ગઈ છે.
માર્કેટ કેપ પણ રેકોર્ડ સ્તરે
HDFC બેંકના ત્રિમાસિક પરિણામો પહેલા મર્જર પછી HDFC બેંક વિશ્વની સાતમી સૌથી મોટી બેંક બની ગઈ છે. હકીકતમાં નવા શેરના લિસ્ટિંગ પછી HDFC બેન્કનું બજાર મૂલ્ય રૂ. 12.4 લાખ કરોડને વટાવી ગયું છે. મર્જર પછી 17 જુલાઈએ એચડીએફસી બેંકના રૂ. 311 કરોડના શેર શેરબજારમાં લિસ્ટ થયા હતા.
હવે શું બદલાશે
મર્જર પછી શેરધારકોને નવી પેટર્નમાં HDFCના દરેક 25 શેર માટે 42 શેર મળશે. આજથી માર્કેટમાં આ શેરોનું ટ્રેડિંગ શરૂ થઈ ગયું છે. આ બદલાવ બાદ હવે HDFC બેંકે મોર્ગન સ્ટેનલી, ચાઈના કન્સ્ટ્રક્શન બેંક, બેંક ઓફ ચાઈના જેવી વિશ્વની દિગ્ગજ કંપનીઓને પાછળ છોડી દીધી છે. સમગ્ર વિશ્વની વાત કરીએ તો HDFC બેંક હવે જેપી મોર્ગન, બેંક ઓફ અમેરિકા, એગ્રીકલ્ચર બેંક ઓફ ચાઈના જેવા દિગ્ગજો સાથે સીધી સ્પર્ધા કરશે. તમને જણાવી દઈએ કે માર્કેટ કેપની દ્રષ્ટિએ HDFC બેંક દેશની સૌથી મોટી પ્રાઈવેટ સેક્ટરની બેંક છે. જ્યારે સરકારી ક્ષેત્રે આ બિરુદ સ્ટેટ બેંક ઓફ ઈન્ડિયા પાસે છે.
