કપડવંજ તાલુકાના મલકાણા ગામની સીમમાં પોલીસે વાહન ચેકીંગ દરમિયાન વિદેશી દારૂ ભરેલી પીક અપ વાન ઝડપી પાડી હતી. વાનમાં પ્લાસ્ટિકની મીણીયા ખાલી કોથળીઓ નીચેથી રૂપિયા 31 હજારનો વિદેશી દારૂ મળી આવ્યો હતો. આ બનાવ અંગે કપડવંજ ગ્રામ્ય પોલીસે 2 શખ્સોની અટકાયત કરી ફરિયાદ નોંધી છે.
કપડવંજ ગ્રામ્ય પોલીસ મલકાણા ગામની સીમમાં વાહન ચેકિંગમાં હતી, તે દરમિયાન મોડાસા તરફથી આવતી પીક અપ વાન શંકાના આધારે ઉભી રાખી તપાસ કરી હતી. વાનની પાછળના ભાગે ચેક કરતા પ્લાસ્ટિકની મીણીયા ખાલી કોથળીઓ ભરી હતી જે હટાવી ચેક કરતા વિદેશી દારૂના ક્વાર્ટર મળી આવ્યા હતા. આ બાદ પોલીસે ઝડપી પાડેલા રમેશ બાબુભાઈ વણઝારા રહે. વડોદરા અને દિનેશ જોધાભાઈ વણઝારા રહે. વિજયપુર જિ. ડુંગરપૂરની પૂછપરછ કરતા કોઈ સંતોષકારક જવાબ આપ્યો ન હતો. આ બનાવ અંગે કપડવંજ ગ્રામ્ય પોલીસે રૂ 31 હજારનો વિદેશી દારૂ, રૂ 5 હજાર મોબાઇલ, પીક અપ વાન રૂ 7.50 લાખ મળી કુલ રૂ 7.86 લાખના મુદ્દામાલ સાથે રમેશ વણઝારા અને દિનેશ વણઝારાની અટકાયત કરી ફરિયાદ નોંધી છે.
