નેશનલ હાઈવે પર ટ્રાફિકના નિયમનને સરળ બનાવવા માટે જીઆઈએસ-આધારિત સૉફ્ટવેરનો ઉપયોગ કરવામાં આવી રહ્યો છે, જેના દ્વારા લગભગ 100 ટૉલ પ્લાઝા પર નજર રાખવામાં આવશે. નેશનલ હાઈવે ઓથોરિટી ઓફ ઈન્ડિયા (NHAI) એ આ અંગેની માહિતી આપતી સત્તાવાર રીલીઝ બહાર પાડી છે.
આ ટૉલ પ્લાઝાની પસંદગી NHAI હેલ્પલાઇન દ્વારા લોકો તરફથી મળેલા પ્રતિસાદના આધારે કરવામાં આવી છે. આ ટેક્નોલોજી સાથે લાઇવ મૉનિટરિંગ સિસ્ટમ રિયલ ટાઇમમાં ભીડભાડ માટે ચેતવણીઓ આપશે અને જો ટૉલ પ્લાઝા પર વાહનોની કતારો નિર્ધારિત મર્યાદા કરતાં વધી જાય તો, લેન એડજસ્ટમેન્ટની ભલામણ કરશે. આ સાથે વધુ ટૉલ પ્લાઝાને આવરી લેવા માટે ધીમે ધીમે મૉનિટરિંગ સેવાનો વિસ્તાર કરવામાં આવશે.
કઇ રીતે કામ કરશે આ સૉફ્ટવેર ?
આ સૉફ્ટવેર દરેક ટૉલ પ્લાઝાનું નામ, સ્થાન, કતારની લંબાઈની સ્થિતિ, રાહ જોવાનો સમય અને વાહનની ઝડપ સહિત ઘણી મહત્વપૂર્ણ માહિતી આપશે. આ સાથે, તે ભીડભાડની ચેતવણી પણ જાહેર કરશે, અને જો વધુ ભીડ હોય તો લેન બદલવાનું પણ સૂચન કરશે. GIS સૉફ્ટવેરની રજૂઆત સાથે NHAI ટ્રાફિક ભીડભાડની સ્થિતિ અંગે નિયમિત અહેવાલો મેળવી શકશે.
એટલું જ નહીં આ સૉફ્ટવેર વર્તમાન હવામાનની સ્થિતિ અને સ્થાનિક તહેવારોની માહિતી પણ આપશે. આ સાથે NHAI અધિકારીઓ ટ્રાફિકનું સંચાલન કરવા અને ટૉલ પ્લાઝા પર ટ્રાફિક ઘટાડવા માટે વધુ સારી યોજનાઓ શોધી શકશે.
ટૉલ પ્લાઝા માટે મોટી ટેકનિકલ પહેલ
આ સિસ્ટમ ટ્રાફિકની સ્થિતિનું વિશ્લેષણ કરવામાં મદદ કરશે. આ સાથે કલાકદીઠ, દૈનિક, સાપ્તાહિક અને માસિક ધોરણે ટ્રાફિકની ભીડ અંગેની માહિતી ઉપલબ્ધ થશે. તેની અત્યાર સુધીની સૌથી મોટી ટેકનિકલી પહેલમાં નેશનલ હાઈવે ઓથોરિટી ઓફ ઈન્ડિયા (NHAI) એ દેશના 100 ટૉલ પ્લાઝા પર GIS-આધારિત સૉફ્ટવેરનો અમલ કર્યો છે.
