ગીરસોમનાથ જીલ્લાના કોડિનાર નગરપાલિકા ચૂંટણીમાં 7 વોર્ડની 28 બેઠકો માટે આગામી 16 ફેબ્રુઆરીના રોજ મતદાન યોજાશે. જેમાં ભાજપની ચાર બેઠકો બિનહરીફ થઈ છે. પાલિકામાં કુલ 43 ઉમેદવાર વચ્ચે ચૂંટણી જંગ ખેલાશે. જેમાં ભાજપના 24, કોંગ્રેસના 18 અને આમ આદમી પાર્ટીનો એક ઉમેદવાર છે.તેમજ કોંગ્રેસના 10 ઉમેદવાર ચૂંટણી પૂર્વે જ મેદાન બહાર થતાં 28 બેઠક પૈકી 18 બેઠક પર કોંગ્રેસના ઉમેદવાર બચ્યા છે. ત્યારે હવે કોડિનાર નગરપાલિકા ચૂંટણી મતદાન પહેલા કોંગ્રેસમાં ભડકો થવા પામ્યો છે. જેમાં કોંગ્રેસના વોર્ડ નંબર 1 નાં ઉમેદવાર ભરતભાઈ કાતિરા અને વોર્ડ નંબર 2 નાં કોંગી ઉમેદવાર વર્ષા બેન કાતીરા ભાજપ માં જોડાયા હોવાનું સામે આવ્યું છે. ત્યારે પૂર્વ સાંસદ દિનુભાઈ સોલંકી ના નેતૃત્વમાં બંને કોંગી ઉમેદવારો ભાજપ માં જોડાયા હતા ને પોતાનો ટેકો જાહેર કર્યો છે.
